Matiye 26

Mawɓe Yahuduuɓe e dawra no nanŋirta Yeesu

(Marku 14:1-2, Luka 22:1-2, Yuhaana 11:45-53)

1No Yeesu heennyi batugo haalaaji ɗin fu, o wi'i aahiiɓe makko: 2«Oon anni balɗe ɗiɗi nun horii go juulɗe *Paska waɗa, Ɓii neɗɗo bo wattete e juuɗe himɓe, ɓe tigga mo dow leggal palaaŋal.»

3Wakkati mum, hooreeɓe *liimaamiiɓe e *dottiiɓe waɗi hawriine der wuro hooreejo liimaamiiɓe, bi'eteeɗo Kayafasi. 4Ɓe nannantiri ɓe nanŋa Yeesu e ƴoyre, ɓe bara mo. 5Amma ɓe bi'i: «To en gaɗee ɗum wakkati juulɗe, gam to himɓe ummin fitina caka jama'aare.»

Debbo gom waanjii wardi dow hoore Yeesu

(Marku 14:3-9, Yuhaana 12:1-8, Luka 7:36-50)

6Yeesu e wonuno Baytaniya der wuro Simon ceccefo. 7No ɓe nyaamata, ɗon debbo gom ɓattii Yeesu, e jogii faanu gaɗiraaŋol hayre albaatiri kebbuŋol wardi, ɗam ceede ɗuuɗɗe. O waanji ɗam dow hoore Yeesu. 8No aahiiɓe makko yi'i ɗum, ɓerɗe maɓɓe welay, ɓe bi'i: «Gam ume wardi ɗam biisaa baanji? 9Ɗam waaweteno sippeego ceede ɗuuɗɗe, ɗe ceennanee talkaaɓe.»

10Yeesu faamii ka ɓe batata, o wi'i ɓe: «Gam ume ko oon toora debbo on? O waɗanii am golle booɗɗe. 11Gam talkaaɓe e wondi e mooɗon wakkati fu. Amma min, mi wondataa e mooɗon wakkati fu. 12O waanjii ɓannu am wardi, gam siriyaago uwol am. 13E gooŋa batanmi on: To linjiila waajetee e duuniyaaru ɗoo fu, ko debbo on waɗi batante, siwtorte bo.»

Yahuuda jammake Yeesu

(Marku 14:10-11, Luka 22:3-6)

14Den Yahuuda Isikariyotu, gooto der aahiiɓe sappo e ɗiɗo, yahi to hooreeɓe *liimaamiiɓe. 15O wi'i ɓe: «Ume kokkoton am to mi wattanii on Yeesu der juuɗe mon?» Ɓe limi ceede cardi laso e sappo (30), ɓe kokki mo. 16Diga wakkati majjum, oo daarta laabi no o jammortoo Yeesu.

Yeesu nyaamii hiraane *Paska e aahiiɓe mum

(Marku 14:12-31, Luka 22:7-34, Yuhaana 13:1-38)

17Der juulɗe peen ko ƴuufinaaka, nyalaane mum arandeere, aahiiɓe Yeesu wari, ƴami mo, wi'i: «Toy jiɗuɗaa men ciriyane hiraane *Paska?» 18O toontii ɓe, o wi'i: «Jahee siire, naaton wuro waane, bi'on mo: "Moodibbo wi'i, wakkati mum faanake, der wuro maaɗa nun o nyaamata juulɗe *Paska e aahiiɓe makko."» 19Aahiiɓe waɗi ko Yeesu bati ɓe, ɓe ciriyii hiraane *Paska.

20No kiikiiɗe waɗi, o jooɗodii e aahiiɓe makko sappo e ɗiɗo (12), ɓee nyaama. 21Wakkati ɓe nyaamata, Yeesu wi'i ɓe: «E gooŋa batanmi on, gooto mooɗon jammoto am.» 22Ɓerɗe maɓɓe biisii sanne, go ɓee ƴama mo gooto gooto, moy fu e wi'a: «Joomiraawo, min bane hinaa?» 23O toontii ɓe, o wi'i: «Tummidinɗo juunŋo mum e am der heeɗo, joomum nun jammotoo am. 24E gooŋa, Ɓii neɗɗo maayan hande no Dewte batiri dow makko. Amma bone woodani jammiiɗo mo! To o rimaakano, ɗum ɓurananno mo wooɗugo.»

25Yahuuda, jammotooɗo mo, ƴami mo, wi'i: «Moodibbo, min nun na?» O toontii mo, o wi'i: «Ee, an nun.»

Kirtaari ceniini

(Marku 14:22-26, Luka 22:14-20, Korintu I 11:23-25)

26No ɓe nyaamata, Yeesu etti peen, yetti Alla, ŋappiti, hokki aahiiɓe mum, wi'i: «Jaɓee, nyaamee, kanjum woni ɓannu am.» 27Ɓaawo majjum, o etti jarirgel innabojam, o yetti Alla, o hokki ɓe, o wi'i: «Jaree on fu. 28Kanjam laatii ƴiiƴam am, ƴiiƴam alkawal, reƴƴitiiɗam gam yaafuye hakkeeji himɓe ɗuuɓɓe. 29Mii wi'a on: Mi yarataa innabojam ɗam kade, sey nyanne jaridanmi kesam e mooɗon, der Laamaare Baaba am.»

30Ɓaawo ɓe jimi jimi jettooje, ɓe burtii, ɓe jahi waanne Jaytuuje#26:30 Der tawaaŋal Yahuduuɓe, ɓee jimanno Jabuura 115-118 to ɓee nyaama juulɗe Paska. Woɓɓe e miili ɓee jimanno kade Jabuura 120-137..

Yeesu wi'ii Piyer yeddan mo

(Marku 14:27-31, Luka 22:31-34, Yuhaana 13:36-38)

31Den Yeesu wi'i aahiiɓe mum: «Jemmaare nee ɗo, on fu, on accan am, gam e winnaa der dewtere: "Mi fiyan duroowo, den hoggo baali sankitoo#26:31 Jekariya 13:7.."»

Yeesu ɓeydi, wi'i: 32«Amma to mi fintii, mi yahan mi heɗoo on Galili.» 33Den Piyer, wi'i mo: «Baa to horiiɓe fu ɓe woppi maa, min kan mi woppataa maa sam.» 34Yeesu toontii mo, wi'i: «E gooŋa batan maa mi: Jemmaare nee ɗo, go jakaraari jogga, a wi'an de tati a annaa am.» 35Piyer wi'i mo: «Baa to doole mi maayida e maa, mi wi'ataa sam mi annaa maa.» Aahiiɓe fu bati goota kan.

Yeesu e du'oo der Gesemane

(Marku 14:32-42, Luka 22:39-46)

36Ɓaawo majjum, Yeesu e aahiiɓe mum yottii nokkuure wi'eteene Gesemane. O wi'i ɓe: «Jooɗee ɗo, faa mi waɗaa du'aare.» 37O yaadi e Piyer, e ɓiɓɓe Jebede ɗiɗo, go ɓerne makko fuɗɗi biisaago, oo maata toora ɓerne sanne. 38Den o wi'i ɓe: «Biisere ɓerne am mawnii sanne, faa e yiɗi warugo am. Gonee ɗo, to on ɗaanee.» 39O woɗɗii seɗɗa, o yani o hippii e leydi, oo du'oo, oo wi'a: «Baaba, to waɗoto, woɗɗinanam jarirgel toora ŋel ɗoo. Amma ko jiɗuɗaa laatoo, hinaa ko jiɗumi.»

40O wittoy, o tawi ɓee ɗaani. O wi'i Piyer: «On baaway haɗugo ko'e mon ɗoyŋol baa yanne woore na? 41To on ɗaanee, du'ee, gam to on janee der jarbeeji. Gam ɓerne e yiɗi, amma ɓannu tampii.»

42O witti du'aago kade de ɗiɗawre, o woɗɗii seɗɗa, o wi'i: «Baaba, to waɗataako jarirgel toora ŋel yawta, mi yariray ŋel, den mum, accu yidde maa laatoo!»

43Yeesu wittoy kade, o tawi ɓe ɓee ɗaani, gam ɗoyŋol e jogii ɓe sanne. 44O acci ɓe kade, o witti du'aago de tatawre e boliiɗe goote ɗen. 45Ɓaawo majjum, o wittoy to aahiiɓe makko, o wi'i ɓe: «Faa jooni on na'on ɗaani, oon ciwtii naa? Wakkati waɗii! Ɓii neɗɗo wattete der juuɗe hakkeeɓe. 46Ummee jawten! Jammotooɗo am nani wara!»

Nanŋoore Yeesu

(Marku 14:43-50, Luka 22:47-53, Yuhaana 18:3-12)

47Yeesu heennyay batugo, go Yahuuda, gooto der aahiiɓe makko sappo e ɗiɗo yottii, e himɓe ɗuuɓɓe, jogiiɓe kaafaaje, e cabbi. Hooreeɓe *liimaamiiɓe, e *dottiiɓe nun liloy ɓe. 48Jammotooɗo mo on tintiniino ɓe maane, wi'i: «Neɗɗo mo cannumi e mammilaaɗe fu, kanko nun ɗon. Nanŋee mo.» 49Ɗon maa ɗon, Yahuuda ɓattii Yeesu, wi'i mo: «A hiiri e jam Moodibbo!» Den o mammilii mo. 50Yeesu toontii mo, wi'i: «Igo am, waɗu ko waddu maa.» Himɓe ɓen ɓattii, watti Yeesu juunŋo, nanŋi mo. 51Den gooto der wondunooɓe e Yeesu sorti kaafahi mum, jabbi maccuɗo hooreejo *liimaamiiɓe, setti nowru. 52Go Yeesu wi'i mo: «Wittin kaafahi maa der holgo mum, gam kaɓiroowo e kaafahi, e kaafahi nun joomum halkirta. 53Aa miili mi waawataa ko noddi Baaba am lildanaammi ɗon maa ɗon ko ɓuri malaykaaɓe konunkeeɓe ukke sappo e ɗiɗi (12) na? 54Amma to ɗum laataaki non, noy ko winnaa der Dewtere hebbirta? Gam Dewtere wi'i, non ɗum laatotoo.»

55Den, Yeesu wi'i jama'aare: «Daa on garii nanŋugo am e kaafaaje, e cabbi hande pasotooɗo ni. Der suudu Alla bane gonunoomi de weeti fu, mii janŋina, go on nanŋay am? 56Amma huune ɗum fu waɗii gam ko winnaa der Dewte *annabiiɓe hebba.» Den, aahiiɓe makko fu doggi, acci mo.

Hooreeɓe diina *Yahuduuɓe hiitake Yeesu

(Marku 14:53-65, Luka 22:54,63-65, Yuhaana 18:12-13,19-24)

57Nanŋuɓe Yeesu ɓen yaari mo to Kayafasi hooreejo liimaamiiɓe, go moodiɓɓe tawreeta, e *dottiiɓe genni, hawti. 58Piyer e tokki mo ɓawɓawre, diga woɗɗi, faa der fageere wuro hooreejo liimaamiiɓe. O naati, o jooɗodii e reenooɓe wuro ŋon gam o yi'a no ɗum heennyitirta.

59Hooreeɓe *liimaamiiɓe, e *dawrooɓe fu, e daarta fewre ne ɓe gaccortoo Yeesu gam o waree. 60Himɓe ɗuuɓɓe wari seedii fewre dow makko, amma ɓe keɓay gacce potuɗe warugo mo. Den, worɓe ɗiɗo gom wari, seedii 61wi'i: «Kanko nun wi'unoo, o pusan suudu Alla, o mahitoo ŋol der balɗe tati.» 62Hooreejo *liimaamiiɓe ummii, wi'i Yeesu: «A toontataako gokka na? A nanay ka ɓe batata dow maa na?» 63Amma Yeesu toontaaki gokka. Hooreejo *liimaamiiɓe on wi'i mo: «Mii eele e inne Alla yonkinteejo, batu men to an nun woni *Almasiihu, Ɓiɗɗo Alla.» 64Yeesu toontii mo, wi'i: «Ee, min nun. Amma ka batanmi woni: Diga jooni, on ji'an Ɓii neɗɗo e jooɗii nyaamo Joom Baawɗe, o waran diga dow kammu.»

65Den, mone waɗi hooreejo *liimaamiiɓe faa serkiti toggoore mum, wi'i: «O batii kalluka dow Alla! En kaajaaka seedeeɓe gom kade! On nanii e noppi mooɗon kalluka ka o bati. 66Kaye ji'uɗon?» Ɓe toontii, ɓe bi'i: «Oo haani wareego.» 67Den, ɓe tuuti mo joode e yeeso, ɓee piya mo guƴƴe. Woɓɓe maɓɓe e fiya mo meenye, 68e wi'a: «*Almasiihu! Tinta, moy nun fiyu maa.»

Piyer yeddii wi'i annaa Yeesu

(Marku 14:66-72, Luka 22:56-62, Yuhaana 18:15-18,25-27)

69Piyer e jooɗii yaasi der fageere wuro. Horɓe tawaaɓe ɗon, gooto mum ɓattii mo, wi'i: «An bo aa wondunoo e Yeesu Galilinkeejo on.» 70Amma Piyer yeddi ka yeeso himɓe fu, wi'i: «Mi faamay ko jiɗuɗaa wi'ugo.»

71Ɓaawo majjum, o ummii oo fonnii far dammugal wuro. Korɗo goɗɗo yi'i mo, wi'i wonɓe ɗon: «Gorko oo ɗo e wondunoo e Yeesu Nasaratuujo.» 72Piyer yeddi kade, wi'i: «Mi hunake, mi annaa gorko on.»

73No waɗi tifere, wonuɓe ɗon ɓattii Piyer, wi'i mo: «Seko walaa, a laati nun gooto der aahiiɓe makko, gam batu maa e hollita to ƴiwuɗaa.» 74Den, Piyer hunii wi'i: «Alla hiitoo am to mi fewii, e gooŋa mi annaa gorko on!» Wakkati mum, jakaraari joggi. 75Den Piyer siwtorii ka Yeesu batunoo mo, wi'i: «Go jakaraari jogga, a wi'an de tati a annaa am.» O wurtii yaasi, o wulli bojji kaaɗuɗi.

Iliyochaguliwa sasa

Matiye 26: BFB

Kuonyesha

Shirikisha

Nakili