Matiye 12
12
Ƴanɗe dow nyalaane siwteteene
(Marku 2:23-28, 3:1-6, Luka 6:1-5)
1Wakkati mum, Yeesu e aahiiɓe mum e tokki caka gese alkamaari nyalaane siwteteene, go rafo waɗi aahiiɓe makko, ɓe janti ɓee wooca cammeeje ɓee ƴakka. 2No *Farisaaɓe yi'i ɗum, wi'i mo: «Daaru, aahiiɓe maa e waɗa ko haanay waɗeego nyalaane siwteteene!» 3O toontii ɓe, o wi'i: «E gooŋa on janŋay ko Dawda waɗi no rafo waɗi mo, e himɓe makko na? 4O naatu nun der suudu Alla, e himɓe makko, ɓe ƴakki peen cakkanaako Alla. Baa no kanko e himɓe makko ɓe goodaa laawol ƴakkugo ko. *Liimaamiiɓe tan nun woodi laawol ƴakkugo ko. 5Naa, on janŋay der *tawreeta Muusa, no liimaamiiɓe gollotooɓe der suudu Alla waɗiri ko haanaa der nyalaane siwteteene? Amma e nun fu ɓe gaccaaka. 6Mii wi'a on e gooŋa, ɓuruɗo suudu Alla mawnugo nun woni ɗo. 7To on paamiino ko haala Alla kaa ɗo fillitii: "Yurumeene jiɗumi, hinaa kiiseteeɗi", on kiitataakono himɓe ɓe walaa gacce.» 8Gam Ɓii neɗɗo nun laatii Joomiraawo nyalaane siwteteene.
Yeesu nyawtii gorko mo juunŋo waatuŋo
(Marku 3:1-6, Luka 6:6-11)
9Yeesu yawti diga ɗon, yahi der suudu waajorde maɓɓe. 10Gorko mo juunŋo waatuŋo gom e tawaa ɗon, go tawaaɓe ɗon ƴami Yeesu ƴanɗe ɗee ɗo, gam heɓa no gaccorii mo, wi'i: «Laawol hokkii nyawtiigu waɗee nyalaane siwteteene na?» 11O toontii ɓe, o wi'i: «To goɗɗo mooɗon e woodi baalel mum gootel, go nyalaane siwteteene ŋel yanti der ɓunnu, joomum suttoytaa ŋel na? 12Neɗɗo e ɓuri baala faa to woɗɗi! To non, laawol hokkii ko wooɗi waɗee der nyalaane siwteteene.» 13Den, o wi'i gorko on: «Fortu juunŋo maa!»
O forti ŋo, ŋo yoofii hande no ŋoo too. 14Ɗon nun *Farisaaɓe wurtii, yahi dawroygo no ɓe kalkirta Yeesu.
Annabaaku Esaaya hebbii
15No Yeesu nani ka, yawti diga nokkuure nen, himɓe ɗuuɓɓe e tokki mo. O nyawti nyawɓe fu. 16Den o waggini ɓe, to ɓe batu goɗɗo mo o laatii. 17Ɗum laatake non gam haala annabi Esaaya hebba, ka o wi'i:
18«Nani ɗo gollotooɗo am mo cuɓumi.
Kanko woni jiɗaaɗo am, mo ceyoriimi.
Mi jippinan Ruuhu am dow makko,
o fiinan habaru foonnitaare der lenyi fu#12:18-21 Esaaya 42:1-4.
19O yeddontirtaa e goɗɗo, o falmataa goɗɗo,
daane makko nanataake e laabi.
20O heltataa ƴommal turiiŋal,
o nyifataa fitillayel ɓattiiŋel nyifugo,
faa nyalaane o hokki foonnitaare jaalorgal.
21Lenyi fu yowan hoolaare mum dow makko.»
Yeesu e toontoo ka ɓe gaccorii mo
(Marku 3:19-30, Luka 11:14-23)
22Den, Yeesu waddanaa gorko bumɗo muumiɗinɗo, mo ginnawol woni e mum. Yeesu nyawti mo faa oo bata, oo yi'a bo. 23Haaynaare nanŋi himɓe fu, go ɓee bi'a: «Hinaa kanko woni Ɓii Dawda na?»
24Amma no *Farisaaɓe nani ka, yanti e wi'a: «E baawɗe ɗe "Beljebul" hooreejo ginnaaji hokki mo nun o riiwirta ginnaaji.» 25No Yeesu e anni miilooji maɓɓe, o wi'i ɓe: «Laamaare fu to seennii e haɓa hoore mum, ne halkan. Ɗum bo to siire gom, maa bo wuro gom seennii e haɓa hoore mum, ŋo wonataako. 26To Seyɗan seennii e riiwa Seyɗan, den noy laamaare makko wonortoo? 27To laatake e baawɗe "Beljebul" nun diiwiranmi ginnaaji, ɓiɓɓe mooɗon bo na, e baawɗe moy ɓe diiwirta ɗi? Gam majjum, kamɓe e ko'e maɓɓe nun laatoytoo hiitotooɓe on! 28Amma to e Ruuhu Alla nun diiwiranmi ginnaaji, eɗum holla no Laamaare Alla warii faa to mooɗon.
29Naa moy waawata naatugo wuro gorko semmenteejo, teeta jawdi makko, to o haɓɓay joomum taw? Amma to o haɓɓii mo, o waawan ko wuuwi ko woni der wuro ŋon fu. 30Mo wonday e am fu, ganyo am nun. Mo wallay am hawritingo, sankitan nun. 31Gam majjum, mii wi'a on: Himɓe heɓan yaafuye hakkeeji mum, e kalluka ka ɓe bati. Amma to goɗɗo batanii Ruuhu Ceniiɗo kalluka, yaafataake sam. 32To neɗɗo batanii Ɓii neɗɗo kalluka fu, heɓan yaafeego. Amma to neɗɗo batanii Ruuhu Ceniiɗo kalluka, yaafataake der jaamanuuru nuu ɗo, e der jaamanuuru nu yeeso.»
Leggal annitirte nun diga e ɓiɓɓe mum
(Luka 6:43-45)
33«To leggal e wooɗi, ɓiɓɓe maggal bo wooɗan. To leggal wooɗaa, ɓiɓɓe maggal bo wooɗataa, gam leggal fu, diga e ɓiɓɓe mum nun annitirtee. 34Onon ɓiɓɓe bolle pure! Noy baawirton batugo booɗuka, onon laatiiɓe halluɓe? Gam ko hebbi der ɓerne, kan nun hunnuko wurtinta. 35Neɗɗo geeto, wurtinan nun ko wooɗi diga booɗɗum ko suuɗii der ɓerne mum. Neɗɗo kalluɗo bo, wurtinan nun ko halli diga kalluɗum cuuɗiiɗum der ɓerne mum. 36E gooŋa bi'anmi on: nyalaane darŋal himɓe toontoyto haalaaji baanjaaji ɗi ɓe bati fu. 37Gam moy fu, haala mum nun wurtinta mo, ɗum bo ka doƴƴa mo kiita.»
Farisaaɓe e daarta Yeesu waɗana ɓe haaynaare
(Luka 11:29-32, Marku 8:11-12)
38Ɓaawo majjum, woɓɓe der moodiɓɓe tawreeta e *Farisaaɓe, wi'i Yeesu: «Moodibbo, emen jiɗi gaɗanaa men haaynaare.»
39O toontii ɓe, o wi'i: «Himɓe jaamanuuru hallunu, coɓuɓe, e daarta haaynaare. Ɓe ji'ataa haaynaare gom, to hinaa haaynaare annabi Yonasi. 40Yonasi waɗii nyaloomaaje tati e jemmaaje tati der reedu linŋol manŋol. Hande non bo Ɓii neɗɗo waɗirta nyaloomaaje tati e jemmaaje tati der yanaane. 41Nyalaane darŋal, himɓe Niniwe ummanto himɓe jaamanuuru nuu ɗo, gaccoo ɓe. Gam ɓe tuubii no ɓe nani waaji Yonasi. Nani bo, ɓuruɗo Yonasi nun woni ɗo! 42Nyalaane darŋal, laamiiɗo debbo mo leydi hoore fuɗo ummanto himɓe jaamanuuru nuu ɗo, gaccoo ɓe. Gam o ƴiwoy diga keeddin leydi, o wari hettinaago haalaaji Suleymaanu kebbuɗi hakkillo. Nani bo, ɓuruɗo Suleymaanu nun woni ɗo!»
Wittoygo ginnawol der wuro mum hiinŋo
(Luka 11:24-26)
43«To ginnawol wurtike e neɗɗo, ŋol yahan nun ŋol yiilitoo nokkuuje jorɗe, eŋol daarta to ŋol siwtoto, amma ŋol heɓataa. 44Den ŋol wi'an: "Mi wittitinto wuro am ŋo eggunoomi e mum." To ŋol yottake, ŋol tawan goɗɗo walaa der wuro ŋon, eŋo wuuwaa, eŋo moƴƴinaa faa wooɗi. 45Den, ŋol wittan, ŋol waddaa ginnaaji jeeɗiɗi goɗɗi ɓuruɗi ŋol hallugo. Ɗi naata e wuro ŋon, ɗi jooɗoo der maggo. Goonki neɗɗo on cakitiiki ɓuran arandehi mum hallugo. Hande non non ɗum laatantoo himɓe jaamanuuru hallunu nuu ɗo.»
Miiraaɓe Yeesu e inniiko
(Marku 3:31-35, Luka 8:19-21)
46Wakkati Yeesu baddata e jama'aare, inniiko e miiraaɓe makko yottii. Ɓe darii yaasi, ɓee jiɗi baddugo mo. 47Den, goɗɗo bati Yeesu, wi'i: «Inna maa e miiraaɓe maa na'on darii yaasi, e yiɗi baddugo maa.» 48O toontii mo, o wi'i: «Moy woni inna am? Ɓee woni miiraaɓe am?» 49O sappii aahiiɓe makko, o wi'i: «Inna am e miiraaɓe am nun ɗo. 50Miiraaɓe am, e sakikiraaɓe am, e inna am woni, waɗooɓe ko Baaba am gonuɗo dow kammu yiɗi.»
Iliyochaguliwa sasa
Matiye 12: BFB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Bible Fulfulde Bénin © SIM International 2015, 2024.
