Matiye 11

Yuhaana lilii aahiiɓe mum to Yeesu

(Luka 7:18-35)

1No Yeesu heennyi waajaago aahiiɓe mum sappo e ɗiɗo waajuuji ɗii ɗon, o yawti diga ɗon. Den o yahi janŋinoygo e waajaago caka ci'e mawɗe, der weccoore nen.

2Yuhaana gaɗoowo *batisi e wonnoo der kasu, go o nani golle ɗe *Almasiihu waɗata e batanee. Den o lili aahiiɓe makko, 3yaha ƴamaa Yeesu, wi'a: «An woni kaanuɗo wara na, naa men keɗoo goɗɗo?»

4Yeesu toontii ɓe, wi'i: «Jahee, batee Yuhaana ko nanuɗon e ko ji'uɗon fu: 5wumuɓe e wumta, moofiɗinɓe e yaha, sesseɓɓe e nyawtee, pahiɗinɓe e nana, maayɓe e finta, talkaaɓe bo e waajee habaru Laamaare Alla. 6Barke laatanto mo mi laatanaaki daliila fergere dow goonɗinki mum.»

7No lilaaɓe ɓen yawti, Yeesu fuɗɗi batugo jama'aare haala Yuhaana, o wi'i: «Ume jahuɗon daaroygo der ladde yorne? Ƴommal ŋal hennu dimmata na? 8Naa ume daaroyɗon? Gorko ɓorniiɗo gineeji booɗuɗi na? Ɓorniiɓe gineeji booɗuɗi, der wuro laamiiɓe nun tawetee. 9Den, ume jahuɗon daaroygo? *Annabiijo na? Oo! Mii bata on, oo ɓuri *annabiijo. 10Kanko nun Dewte batani wi'i: "Mi lilan lilaaɗo am yeeso maaɗa, o moƴƴinane laawol#11:10 Malakiya 3:1."» 11«E gooŋa batanmi on, der ɓe rewɓe rimi fu, walaa ɓuruɗo Yuhaana gaɗoowo *batisi manŋu. Amma, ɓuruɗo faanɗugo der Laamaare Alla, e ɓuri Yuhaana manŋu.» 12Diga Yuhaana gaɗoowo *batisi fuɗɗi waajaago faa jooni, himɓe e teetontira Laamaare Alla e catte. Sattuɓe bo teetata ne. 13*Annabiiɓe, e dewte *tawreeta fu, waɗii annabaaku dow Laamaare nen faa yottii wakkati Yuhaana gaɗoowo *batisi. 14To oon jiɗi koolee, Yuhaana woni annabi Eliya, kaanuɗo wara. 15Gooduɗo noppi fu, nana.

16Ume nun nanditiniranmi himɓe jaamanuuru nuu ɗo? Ɓee nandi e sukaaɓe jooɗiiɓe caka jayri to himɓe fijata, ɓee kuuɓa igooɓe maɓɓe, ɓee wi'a: 17"Men puuranii on puuraaɗi, on pijay, men jimanii on jimi bojji maayde, on cimaaki." 18Gam no Yuhaana wari, o nyaamataa o yarataa, on bi'ii: "O ginnaajiijo nun." 19Ɓii neɗɗo warii, e nyaama, e yara. Den, himɓe wi'i: "O laati nun deereeruujo, e jaroowo bagi. Oo laatii bo beldiijo jaɓooɓe ceede faada, e waɗooɓe hakke hande maɓɓe." Amma, hakkillo Alla e hollitoo der golle muuɗum.

Yeesu felii genneele caliiɗe ko tuubi

(Luka 10:13-16)

20Ɓaawo majjum, Yeesu feli genneele ɗe o waɗi haaynaareeji ɗuuɗɗi der mum go himɓe majje tuubay. O wi'i: 21«Bone laatante, an Korajin! Bone laatante, an Baytisayda! Gam to haaynaareeji gaɗaaɗi to mooɗon, waɗaanoma der Tiri e Sidon, maa himɓe majje ɓornakeno saakiho, ɓe baanja ko'e maɓɓe dooni, ɓe kollitira no ɓe tuubii. 22Gam majjum, mii wi'a on: Nyalaane darŋal, kiita Tiri e Sidon hoyan e ka mooɗon. 23An bo Kafarnahum, aa miili a towinte faa dow kammu na? Aawo! A leesinte faa der joonne maayɓe. Gam haaynaareeji gaɗaaɗi der maa, to ɗi gaɗaanoma der siire Sodoma, maa ne na'onno faa hanne. 24Gam majjum, mii wi'a on: Nyalaane darŋal, kiita Sodoma hoyan e ka mooɗon.»

Yeesu e nodda himɓe gam siwtaare

(Luka 10:21-22)

25Wakkati mum, Yeesu etti haala wi'i: «Mii yette Baaba, Joomiraawo mo dow kammu, e mo leydi. A suuɗii wooduɓe annal e hakkillo kujje ɗee, ko kollitinɗaa ɗe sukahon petton. 26E gooŋa, mi yettii maa Baaba, gam non ɗum fottirani maa. 27Baaba am hokkii am huune fu der juunŋo am. Walaa annuɗo Ɓiɗɗo to hinaa Baaba. Walaa annuɗo Baaba bo, to hinaa Ɓiɗɗo, e mo Ɓiɗɗo yiɗi hollitingo mo.»

28«Garee to am on fu, onon somuɓe, e rooniiɓe dolle tedduɗe, mi hokkan on siwtaare. 29Ɗowtanee am, accee mi janŋina on. Gam mii yeeɗɗi, mii ɗiggi, den mum yonkiiji mon heɓan siwtaare. 30Gam dongal am e huyfi, ko dooninanmi on bo teddaa.»

Iliyochaguliwa sasa

Matiye 11: BFB

Kuonyesha

Shirikisha

Nakili