Luka 9

Yeesu lilii aahiiɓe mum sappo e ɗiɗo

(Matiye 10:5-15, Marku 6:7-13)

1Yeesu noddii aahiiɓe mum sappo e ɗiɗo, hokki ɓe baawɗe e semme dow ginnaaji fu, ɓe nyawta bo nyawuuji. 2O lili ɓe, ɓe baajoo habaru Laamaare Alla, ɓe nyawta bo nyawɓe. 3O wi'i ɓe: «To on ettee goɗɗum wakkati jahoton, to on ettee sawru, naa bo bogooru, ɗum bo peen, maa bo ceede. To goɗɗo mon joga toggooje ɗiɗi. 4Wuro ŋo beeruɗon e mum fu, jooɗee ɗon faa de wakkati jawtol mon foti. 5Genni ni himɓe mum salii ko jaɓii on fu, burtee e mayri, piɗɗanon ɓe sollaare koyɗe mon, ɗum laatoo seedaaku no ɓe boofii.» 6Ɓe jawti, ɓe jahi der ci'e e ci'e, ɓee piina *linjiila, ɓee nyawta nyawɓe nokku fu.

Hakkillo Eroodu jiɓake

(Matiye 13:4-12, Marku 6:14-29)

7No Eroodu laamiiɗo nani ko Yeesu waɗata, o jiɓii, gam woɓɓe e wi'a: «Yuhaana gaɗoowo *batisi nun finti.» 8Woɓɓe bo e wi'a: «Eliya nun suppitoy.» Woɓɓe kade e wi'a: «Annabiiɓe arandeeɓe gooto mum nun finti.» 9Amma Eroodu wi'i: «Mi waɗii hoore Yuhaana gaɗoowo *batisi taƴaa, moy nun gorko mo nananmi e batanee kujje ɗee kade?» Go oo daarta o yi'a mo.

Yeesu nyaamnii worɓe ujune joyo

(Matiye 14:13-21, Marku 6:30-44, Yuhaana 6:1-14)

10No lilaaɓe ɓen warti, ɓe bati Yeesu ko ɓe gaɗi fu. O etti ɓe feere maɓɓe, ɓe jahi far siire gom wi'eteene Baytisayda. 11Amma jama'aare anniti, tokki ɓe. Yeesu jaɓɓii ɓe, fillanii ɓe haala Laamaare Alla, o nyawti bo nyawɓe.

12No naaŋe faanii yanugo, aahiiɓe sappo e ɗiɗo (12) ɓen ɓattii mo wi'i: «Accu jama'aare sankitoo, yaha der genniije e ci'e piilfitiiɗe gam ɓe daartaa werdude e nafa, gam der ladde yorne nun tawaɗen ɗo.» 13Amma Yeesu wi'i ɓe: «Onon e ko'e mon, kokkee ɓe nafa ɓe nyaama!» Ɓe toontii mo ɓe bi'i: «Peen joyo e liƴƴi ɗiɗi tan nun men goodi. Sey ni to menen e ko'e amen men jahan nun men coodanaa jama'aare nee ɗo fu nyaamdu.» 14Jaka worɓe ujune joyo (5000) nun tawaa ɗon, go Yeesu bati aahiiɓe mum wi'i: «Jooɗinee ɓe ukke lasoy ɗiɗo e sappo sappo.» 15Ɓe gaɗi nun nun, ɓe jooɗini ɓe ɓe fu. 16Yeesu etti peen joyo kon, e liƴƴi ɗiɗi ɗin, ɓanti gite dow kammu. O du'ii gam Alla barkiɗina ɗum. O ŋappi ŋappiti, o hokki aahiiɓe makko ɓe ceennana jama'aare. 17Ɓe fu ɓe nyaami ɓe kaari, ɓe kawriti ko horii ɗum hebbi killaaje sappo e ɗiɗi (12).

Piyer batii no Yeesu nun woni Almasiihu

(Matiye 16:13-19, Marku 8:27-29)

18Nyalaane gom, Yeesu e du'oo feere mum, go aahiiɓe makko wari to makko. O ƴami ɓe o wi'i: «Moy himɓe wi'ata mii laatii?» 19Ɓe toontii mo: «Woɓɓe e wi'a, an woni Yuhaana gaɗoowo *batisi, woɓɓe bo e wi'a, an woni Eliya, woɓɓe bo e wi'a, *annabiiɓe arandeeɓe gom nun gooto mum finti.» 20O wi'i ɓe: «Onon bo na, moy bi'oton mii laatii?» Piyer toontii wi'i: «An woni *Almasiihu ƴiwuɗo to Alla.»

Yeesu e batana maayde mum e pintol mum

(Matiye 16:21-28, Marku 8:30–9:1)

21Yeesu waggini ɓe, to ɓe batu ka goɗɗo. 22Yeesu ɓeydi kade o wi'i ɓe: «Ɓii neɗɗo tooroto sanne, *dottiiɓe, e hooreeɓe *liimaamiiɓe e moodiɓɓe tawreeta woppan mo, ɓe bara mo. Amma nyalaane tatawre o fintan.» 23O bati ɓe kade ɓe fu o wi'i: «To goɗɗo e yiɗi tokkugo am, joomum acca miijanaago hoore mum, etta leggal mum palaaŋal nyalaane fu, tokkanmi. 24Gam jiɗuɗo hisina yonki mum dullan ki, amma majjinɗo yonki mum gam am, hisinan ki. 25To goɗɗo heɓii huune fu der duuniyaaru ɗo, go yonki mum halki, ume ɗum nafi mo? 26Neɗɗo fu sentimmi, min e haala am, min Ɓii neɗɗo bo mi sentan joomum to mi waroy der tedduŋal am, e ŋal Baaba, e ŋal malaykaaɓe seniiɓe. 27E gooŋa batanmi on, tawaaɓe ɗo, woɓɓe mum maayataa go ɓe ji'a Laamaare Alla.»

Tagudi Yeesu waylitake

(Matiye 17:1-8, Marku 9:2-8)

28No Yeesu batidi haalaaji ɗin, no waɗi balɗe jeetati, o etti Piyer, e Yuhaana, e Yaakuuba, o eencidi e maɓɓe dow waanne gam o du'oo. 29Wakkati o du'otoo, yeeso makko waylitii, gineeji makko rawni tar e jalba. 30Ɗon himɓe ɗiɗo wari e badda e makko, kamɓe woni Muusa e Eliya. 31Ɓe cuppitii e tedduŋal. Ɓee badda e Yeesu dow no o heennyitirta golle makko, e no o maayiroyta *Urusaliima. 32Piyer e jaadiiɓe mum e ɗaaninoo ɗoyŋol lugguŋol, go ɓe pini ɓe ji'i tedduŋal Yeesu e himɓe ɗiɗo darodiiɓe e makko. 33Wakkati himɓe ɗiɗo ɓen yiɗi accugo Yeesu, Piyer wi'i mo: «Moodibbo, taweego men ɗo e wooɗi. Accu men tigga ɗo bukaaji tati! Wooru gam maa, wooru gam Muusa, wooru gam Eliya.» Amma o annaa ka o batata.

34Wakkati o batata ka, ɗon duula gom wari ommi ɓe, go aahiiɓe huli no duula ŋan ommata ɓe. 35Daane gom nanaa diga der duula ŋan e wi'a: «Oo ɗo nun laatii Ɓiɗɗo am mo cuɓumi, kettinanee mo!» 36No daane nen nanaa, Yeesu horii kan tan. Aahiiɓe ɓen jeeɗii der wakkati mum, fillanaaki goɗɗo ko yi'i.

Yeesu nyawtii suka mo ginnawol toorata

(Matiye 17:14-21, Marku 9:14-29)

37Fini mum, no ɓe jippii diga dow waanne, jama'aare ɗuunne wari fotti e Yeesu. 38Ɗon nun der caka jama'aare nen, goɗɗo yanti e huuɓa, e wi'a: «Moodibbo, mi eelii maa, daaru suka am gorko, gam o laati nun suka am bajjo! 39Ginnawol ŋol nanŋan mo nun, tifere woore o yantan oo huuɓa, ŋol dimma mo e semme, ŋol ƴufina guufo e hunnuko makko, ŋol nawna mo, no boniri ŋol yoofirta mo. 40Mi eelii aahiiɓe maa riiwa ginnawol ŋol, amma ɓe baaway.»

41Yeesu toontii wi'i: «Hey, onon ɓe walaa goonɗinki, oonyiiɓe, faa dey gondanmi e mooɗon, mii munyani on?» O wi'i gorko on: «Waddu ɗo suka maa on.» 42No suka on ɓattotoo, ginnawol ŋol doƴƴi mo e leydi, talliti mo e semme. Amma Yeesu falmi ŋol, suka on yoofii, o hokkiti mo baabiiko. 43Ɓe fu, haaynaare waɗi ɓe gam sabbu baawɗe Alla.

Yeesu batitake haala maayde mum e pintol mum

(Matiye 17:22-23, Marku 9:30-32)

No moy fu haaynaare nanŋi ɗum dow ko Yeesu waɗata, o bati aahiiɓe makko o wi'i: 44«Onon, nanee ka batanmi on faa wooɗa: Ɓii neɗɗo wattoyte der juuɗe himɓe.» 45Amma ɓe paamay haala ka, ka suuɗi ɓe nun gam to ɓe paamu, ɓee kula bo ƴamugo ka Yeesu.

Moy ɓuri manŋu?

(Matiye 18:1-5, Marku 9:33-37)

46Aahiiɓe ɓen yanti e yeddontira hakkune mum gam ɓe anna hakkune maɓɓe moy nun ɓuri manŋu. 47Yeesu e anni miilooji ɓerɗe maɓɓe, o etti sukayel pettel, o takki ŋel ley makko, 48o wi'i ɓe: «Jaɓɓitiiɗo suka oo ɗo gam inne am, jaɓɓitake am min e hoore am, jaɓɓitiiɗo am bo, jaɓɓitake liloyɗo am, gam laatiiɗo pettel hakkune mooɗon on fu, joomum nun ɓuri manŋu.»

Mo wanyaa on laati nun mo mooɗon

(Marku 9:38-40)

49Yuhaana etti haala wi'i: «Moodibbo, men ji'ii goɗɗo e riiwa ginnaaji e inne maa, go men kaɗi mo, gam o tokkay en.» 50Yeesu toontii mo wi'i: «To on kaɗee mo, gam mo wanyaa on fu laati nun mo mooɗon.»

Himɓe Samariya salake jaɓɓaago Yeesu

51No nyalaane ne Yeesu ettetee dow faanii, o waɗi niiya o yaha *Urusaliima. 52O waɗi lilaaɓe ardii mo, ɓe jahi, ɓe naati der siire Samariyaaɓe gam ɓe ciriyoo garki makko. 53Amma himɓe Samariya jaɓɓaaki mo, gam o fonni nun far *Urusaliima. 54No Yaakuuba e Yuhaana, laatiiɓe aahiiɓe makko yi'i ɗum, ɓe bi'i: «Joomiraawo, aa yiɗi men bi'a yiite jippoo diga dow halka ɓe na?» 55Yeesu yeeƴitii far to maɓɓe wooltani ɓe e semme! 56Den ɓe jawti, ɓe jahi der siire wonne.

Yiɗuɓe tokkugo Yeesu

(Matiye 8:19-22)

57Wakkati ɓe gonii e laawol, goɗɗo bati Yeesu wi'i: «Mi tokkete to jahataa fu.» 58Yeesu wi'i mo: Dondonɗehon e woodi gayɗe mum, pooli bo e woodi daɗɗa mum, amma Ɓii Neɗɗo woodaa nokkuure to siwtotoo. 59O wi'i goɗɗo: «Tokkam!» Amma joomum wi'i mo: «Moodibbo, accu taw mi uwaa baaba am.» 60Yeesu toontii mo wi'i: «Accu maayɓe uwa maayɓe mum, an, yahu waaja habaru Laamaare Alla.» 61Goɗɗo wi'i kade: «Moodibbo, Mi tokkete, amma accu taw mi yaha mi waynoo himɓe am.» 62Yeesu wi'i mo: «Jogiiɗo jalo ga'i fu, go yeeƴitii ɓaawo, heɓataa riiba der Laamaare Alla.»

Iliyochaguliwa sasa

Luka 9: BFB

Kuonyesha

Shirikisha

Nakili