Luka 10

Yeesu lilii aahiiɓe mum lasoy tato e sappo e ɗiɗo

1Ɓaawo majjum, Joomiraawo suɓi himɓe lasoy tato e sappo e ɗiɗo (72), o lili ɓe ɗiɗɗiɗo yeeso makko der ci'e, e nokkuuje ɗe o miili yahugo kanko e hoore makko. 2O wi'i ɓe: «Ko ruggetee ɗuuɗii, amma ruggooɓe ɗuuɗaa, eelee Joomiraawo gese lildaa ruggooɓe der to ruggetee. 3Jahee, nani mii lila on hande baali caka bu'i. 4To on ettee maalaaru ceede, naa bo bogooru, maa bo paɗe, to on cannee goɗɗo der laawol. 5Wuro ŋo naatoton fu, bi'ee taw jam wona e wuro ŋon. 6To neɗɗo jam e tawaa der wuro ŋon, jam mooɗon wonoto dow makko, to mo jam walaa bo, jam mooɗon wittanaan on. 7Jooɗee der maggo, nyaamon jaron ko kokkaɗon fu, gam golloowo e haani heɓa joddi mum. To on jaattitee wurooji. 8To on naatii der wuro gom, go himɓe maggo jaɓɓii on, nyaamee ko ɓe gaddani on fu. 9Nyawtee nyawɓe ɓe tawuɗon ɗon fu, baton ɓe bi'on: "Laamaare Alla ɓattake on." 10Amma to on naatii der siire gom, go himɓe mayre jaɓɓaaki on, burtee e laabi bi'on: 11"Emen piɗɗana on sollaare genni mon, mootiine koyɗe amen. Amma, enon fu, paamee no Laamaare Alla faanake." 12Mii bata on, nyalaane darŋal, kiita siire nen ɓuran kiita Sodoma sattugo.»

Ci'e caliiɗe ko goonɗini

(Matiye 11:20-24)

13«Bone laatante an Korajin! Bone laatante an Baytisayda! Gam kaayeefiiji gaɗaaɗi to mon, to ɗi gaɗaanoma der Tiri e Sidon, maa diga ɓoyɗum, himɓe wanŋarɗe ɗen tuubanno, ɓornoo saakiho, waanjoo dooni. 14Gam majjum nyalaane darŋal, kiita Tiri e Sidon fotoran e ka mooɗon. 15An bo Kafarnahum, aa miiji a ettete faa dow na? Aawo! A leesinte faa der joonne maayɓe.» 16O wi'i kade aahiiɓe makko: «Kettinaniiɗo on, min nun joomum hettinanii, caliiɗo on bo, min o salii, caliiɗo am bo salake liloyɗo am.»

Wittoyki lilaaɓe lasoy tato e sappo e ɗiɗo

17Himɓe lasoy tato e sappo e ɗiɗo (72) ɓen wittoy, e hebbi welwelo, go ɓe bi'i: «Joomiraawo, baa e ginnaaji ɗowtanake men gam inne maa.» 18Yeesu toontii ɓe wi'i: «Mi yi'ii Seyɗan yanoy diga dow kammu hande maƴƴere. 19Nani, mi hokkii on baawɗe jaaɓon bolle, e jahe, e baawɗe ganyo fu, goɗɗum walaa ko toorata on. 20Amma to on accee ɓerɗe mooɗon wela gam ginnaaji ɗowtanake on, amma accee ɓerɗe mon wela gam inɗe mon e winnaa dow kammu.»

Ɓerne Yeesu welii

(Matiye 11:25-27, 13:16-17)

21Der wakkati mum, Ruuhu Ceniiɗo hebbini Yeesu seyo, o wi'i: «Baaba, Joomiraawo mo dow e ley, mi yettii maa gam a hollitii sukaaɓe ko cuuɗuɗaa wooduɓe faamu e annal. Oo, Baaba, ɗum laatake gam non non ɗum fottirani maa.

22Baaba, a hokkii am huune fu. Walaa annuɗo mo Ɓiɗɗo laatii sey Baaba, walaa bo annuɗo mo Baaba laatii to hinaa Ɓiɗɗo, e mo Ɓiɗɗo yiɗi hollitingo ɗum.»

23Yeesu yee'itii far to aahiiɓe mum, wi'i ɓe kamɓe tan: «Barke laatanii gite ji'ooje ko ji'oton. 24Gam mii bata on, *annabiiɓe, e laamiiɓe ɗuuɓɓe yiɗii yi'ugo ko ji'oton ɗo, amma ɓe ji'ay ɗum, ɓe jiɗii nanugo ko nanoton, amma ɓe nanay ɗum.»

Ballool samariyaajo geeto

25Ɗon moodibbo tawreeta gom ummii gam jarboo Yeesu, o ƴami mo o wi'i: «Moodibbo, ume haani mi waɗa go mi heɓa yonki tabitiiki?» 26Yeesu toontii mo wi'i: «Ume winnaa der tawreeta? Ume janŋataa ton?» 27O toontii o wi'i: «E haani jiɗaa Alla Joomiraawo maaɗa e ɓerne maa fu, e yonki maa fu, e semme maa fu, e miilo maa fu. Kade bo, jiɗaa banniraawo maa, hande no jiɗirɗaa hoore maa.» 28Go Yeesu wi'i mo: «A toontake no wooɗiri, waɗu non non, a wuuran.»

29Amma moodibbo on yiɗii hokkugo hoore mum gooŋa, go o ƴami Yeesu o wi'i: «Moy woni banniraawo am?» 30Yeesu etti haala toontii mo wi'i: «Goɗɗo gom nun ƴiwoy diga *Urusaliima e fonnii Yeriko, go wuyɓe taytii mo, teeti gineeji makko, witti fiyi mo faa o faanii maayugo, go ɓe jawti ɓe acci mo. 31Foti *Liimaamiijo gom bo ummoykeno e tokkoy laawol ŋol. No o yi'i neɗɗo on, o taarii, o yawti. 32*Leewinkeejo gom bo yottii nokkuure nen, yi'i neɗɗo on, taarii yawti kanun bo. 33Amma samariyaajo gom e yaha genni, go yottii ley neɗɗo on, yurumii mo. 34O ɓattii, o moomi elanɗe makko nebbam, e innabojam, o haɓɓi ɗe, go o etti mo o ɓili dow ko o waɗɗii. O yaari mo der hoɗorde hoɓɓe, o hiinnii mo. 35No weeti, o sutti ceede cardi ɗiɗi o hokki mawɗo nokkuure nen o wi'i mo: "Hiinna neɗɗo on, to a nyaami ceede ɓuri non, mi yoɓete to mii warta."» 36Yeesu ɓeydi wi'i: «Der himɓe tato ɓen moy nun e jiiɗe maa laatii banniraawo gorko mo wuyɓe fiyi on?» 37Moodibbo tawreeta on toontii wi'i: «Gaɗanɗo mo moƴƴere on nun.» Yeesu wi'i mo: «Yahu an bo gaɗaa hande non.»

Yeesu yahii to Marta e Mariyama

38No Yeesu e Aahiiɓe mum yanti laawol, o naati der siire gom, go debbo bi'eteeɗo Marta weerni mo wuro mum. 39Oo woodi miiraawo bi'eteeɗo Mariyama. Mariyama on wari oo jooɗii ley koyɗe Joomiraawo, oo hettinii haala makko. 40Marta e hiinnii golle wuro sanne, go o wari o wi'i: «Joomiraawo, ɗum ɓillaa maa, no miiraawo am e accidimmi golle wuro min tan na? Batu mo o wallammi.» 41Joomiraawo toontii mo wi'i: «Hey Marta! Marta! Aa ɓilla hoore maa, aa hiinnanii kujje ɗuuɗɗe, 42amma huune gootum tan nun laatii ko haani. Mariyama suɓii ko wooɗi, o teetirtaake ɗum.»

Iliyochaguliwa sasa

Luka 10: BFB

Kuonyesha

Shirikisha

Nakili