Luka 22

Mawɓe e dawra no nanŋirta Yeesu

(Matiye 26:1-5, Marku 14:1-2, Yuhaana 11:45-53)

1No juulɗe peen ko *ƴuufinaaka bi'eteeɗe *Paska faanii, 2hooreeɓe *liimaamiiɓe e moodiɓɓe tawreeta e daarta laawol no warirta Yeesu, amma ɓee kula himɓe.

3Den Seyɗan naati der Yahuuda bi'eteeɗo Isikariyotu. Der aahiiɓe Yeesu sappo e ɗiɗo (12), gooto mum o laati. 4O yahi o baddoy e hooreeɓe *liimaamiiɓe e mawɓe reenuɓe suudu Alla, dow no o wattirta Yeesu der juuɗe maɓɓe. 5Ɗum weli ɓe, go ɓe nannantiri ɓe kokka mo ceede. 6Yahuuda nootii, yanti e daarta laabi no jammorto Yeesu, to himɓe annu.

Siriyaago hiraane *Paska

(Matiye 26:17-25, Marku 14:12-21, Yuhaana 13:21-30)

7Nyalaane juulɗe peen ko ƴuufinaaka, ne himɓe woowi hiisugo jawdihon *Paska yottii. 8Yeesu lili Piyer e Yuhaana, wi'i ɓe: «Jahee ciriyanoɗon en nyaamdu juulɗe Paska.» 9Ɓe ƴami mo ɓe bi'i: «Toy jiɗuɗaa men ciriyoo ɗum?» 10O wi'i ɓe: «Daaree, to on naatii der siire, gorko dooniiɗo faanu diyam fottan e mon, tokkee mo faa der wuro ŋo o naatata, 11den, bi'on joom wuro ŋon: "Moodibbo e ƴame: Kollaa men suudu, to kanko e aahiiɓe makko ɓe nyaamata hiraane Paska?" 12O hollan on suudu dowrowol manŋol moƴƴinaaŋol, ton nun ciriyotoɗon ne.» 13Ɓe jawti, ɓe tawoy huune fu hande no Yeesu batirnoo ɓe, go ɓe ciriyii ton hiraane *Paska.

Kirtaari Ceniini

(Matiye 26:26-30, Marku 14:22-26)

14No wakkati yottii, Yeesu wari jooɗii e nyaamda e lilaaɓe mum. 15O wi'i ɓe: «Mii yiɗunoo sanne mi nyaamda nafa *Paska ka e mon go mi tooroo. 16Gam mii bata on, mi nyaamataa *Paska ka kade, faa de ko ka fillitii hebba der Laamaare Alla.» 17O etti jarirgel, o yetti Alla o wi'i: «Jaɓee, ceenniron hakkune mon. 18Gam mii bata on, diga jooni, mi yarataa kade jaram innabohi faa to Laamaare Alla wari.» 19Ɓaawo majjum, o etti peen, o yetti Alla, o ŋappiti, o hokki ɓe, o wi'i: «Ɗum ɗo laatii ɓannu am kokkaaŋol gam mooɗon. Gaɗee ɗum gam oon ciwtorammi.» 20No ɓe nyaamdi ɓe keennyi, o etti jarirgel o hokki ɓe, o wi'i: «Jarirgel ŋel ɗo laatii alkawal kesal ŋal Alla tabbitinirta e ƴiiƴam am reƴƴitaaɗam gam mooɗon. 21Amma daaree, jammotooɗo am na'on e nyaamda e am. 22E gooŋa, Ɓii neɗɗo na'on fonni maayoygo hande no Alla resiri, amma bone laatanto jammotooɗo mo!» 23Go ɓe janti ɓee ƴanƴantira to moy nun hakkune maɓɓe waɗata ɗum.

Moy ɓuri manŋu?

(Matiye 20:24-28, Marku 10:41-45)

24Den, jeddi ummii hakkune aahiiɓe ɓen dow moy nun laatotoo ɓuruɗo mawnugo caka maɓɓe. 25Yeesu wi'i ɓe: «Laamiiɓe leyɗe e dawrana himɓe mum e semme, wooduɓe baawɗe bo, e daarta noddeego himɓe yeeɓɓe. 26Amma onon, non non bane, ɓuruɗo manŋu hakkune mon, sey joomum laatoo hande ɓuruɗo faanɗugo, ardiiɗo bo, sey laatoo gollantooɗo horiiɓe. 27Moy ɓuri manŋu? Jooɗiiɗo e nyaama naa jaggotooɗo? Hinaa baa jooɗiiɗo e nyaama nun? Amma min, mi na'on hakkune mon hande jaggiiɗo! 28Onon, on accay am der tooraaji am, 29gam majjum, hande no Baaba hokkirimmi Laamaare, hande nun min bo, kokkirmi on ne. 30Den mum, on nyaaman, jaron, jooɗoɗon dow kittaal laamaare am, kiitoɗon lenyi Isira'iilaaɓe sappo e ɗiɗi (12).»

Yeesu e bata no Piyer yeddan mo

(Matiye 26:31-35, Marku 14:27-31, Yuhaana 13:36-38)

31Joomiraawo wi'i: «Simon, Simon, Seyɗan eelii wesa on hande gawri. 32Amma mi du'anake maa gam taa yoofu goonɗinki. An, to a wittoy to am, semmiɗin banniraaɓe maa.» 33Piyer wi'i mo: «Joomiraawo, mii siriyii naatidingo e maa der kasu, e maayidingo e maa bo.» 34Yeesu toontii mo wi'i: «Mii bate, Piyer, jakaraari joggataa hanne, go jeddaa am faa de tati bi'aa a annaa am.»

Ciriyee gam wakkati toora

35Den Yeesu wi'i ɓe kade: «No lilunoomi on on jogaaki ceede e bogooru e paɗe, on dullii goɗɗum na?» Ɓe toontii: «Men dullay goɗɗum.» 36Den, o wi'i ɓe: «Amma jooni, gooduɗo ceede fu etta, non bo gooduɗo bogooru fu etta nu, mo walaa kaafahi fu, sippa toggoore mum soodira ki. 37Gam mii bata on, sey haala binnaaka kaa fu hebba dow am: "O limtaama hakkune waɗooɓe ko halli." Ko bataa dow am fu hebban.» 38Aahiiɓe makko wi'i mo: «Joomiraawo, nani ɗo kaafaaje ɗiɗi.» O toontii: «Accee ka kaafaaje.»

Yeesu e du'oo dow waanne jaytuuje

(Matiye 26:36-46, Marku 14:32-42)

39Yeesu wurtii, yahi dow waanne Jaytuuje, hande no o woowunoo, aahiiɓe makko tokki mo. 40No o yottii nokkuure nen, o wi'i ɓe: «Du'ee, gam to on naatee der jarbeeji.» 41O woɗɗodii ɓe seɗɗa hande jaka faɗɗande hayre, o jiccii oo du'oo, 42oo wi'a: «Baaba, to aa yiɗi, woɗɗinanam jarirgel toora ŋel ɗo, amma ko jiɗuɗaa laatoo, hinaa ko jiɗumi.» 43Den malaykaajo gom suppitanii mo diga kammu, gam semmiɗina mo. 44[No biisere ɓerne makko mawni, o du'ii e tinnaare, go guli makko waylitii hande toɓɓe ƴiiƴam, e sinta e leydi.]

45No o du'odii, o ummii o witti to aahiiɓe makko, o tawi ɓee ɗaanii sabbu biisere ɓerne. 46O wi'i ɓe: «Gam ume go oon ɗaanii? Ummee, du'ee, gam to on naatee der jarbeeji.»

Nanŋoore Yeesu

(Matiye 26:47-56, Marku 14:43-50, Yuhaana 18:3-11)

47O heennyay batugo, go jama'aare suppitoy, der aahiiɓe Yeesu sappo e ɗiɗo (12), gooto mum bi'eteeɗo Yahuuda e ardoy ɓe. O ɓattii Yeesu gam o mammiloo mo. 48Amma Yeesu wi'i mo: «Yahuuda, e mammilaaɗe nun jammortoɗaa Ɓii neɗɗo?»

49No yaadiiɓe Yeesu yi'i ko yiɗi waɗugo, ɓe ƴami mo ɓe bi'i: «Joomiraawo, men peƴƴa ɓe kaafaaje na?»

50Go gooto maɓɓe feƴƴi maccuɗo hooreejo *Liimaamiiɓe, wudditi nowru nyaamowol. 51Amma Yeesu wi'i ɓe: «Accee, heƴii non non.» O meemi nowru neɗɗo on, o nyawti ŋol. 52Go Yeesu bati hooreejo liimaamiiɓe, e mawɗo reenuɓe suudu Alla, e *dottiiɓe waruɓe nanŋugo mo, o wi'i: «Gam ume garuɗon nanŋugo am e kaafaaje, e cabbi, hande gujjo nun daartoton? 53Baadey bane gondumi e mooɗon der suudu Alla go on daartay nanŋugo am? Amma wakkatiire nee ɗo nun laatii ne mon, e baawɗe niwre.»

Piyer yeddii wi'i annaa Yeesu

(Matiye 26:57-58, Marku 14:53-54, Yuhaana 18:12-27)

54No ɓe nanŋi Yeesu, ɓe jaari der wuro hooreejo *Liimaamiiɓe, Piyer e tokki ɓawɓawre. 55Duɗal gom e huɓɓaa caka fageere wuro, himɓe e jooɗii e aytinii, go Piyer jooɗii hakkune maɓɓe. 56Go korɗo gom yi'i mo, oo jooɗii oo aytinii yiite, go tiggi mo gite, wi'i: «Neɗɗo oo ɗo bo e wondunoo e makko!» 57Amma Piyer yeddi mo wi'i: «Debbo, mi annaa mo.» 58No ɓeydii seɗɗa, goɗɗo yi'i mo kade, wi'i: «An bo aa gooto maɓɓe nun!» Amma Piyer toontii mo wi'i: «Aawo, mi laataaki gooto maɓɓe.» 59Kade no jaka yanne woore waɗi, goɗɗo wi'i e semme: «Din din neɗɗo oo ɗo e wondunoo e makko, gam o laati nun Galilinkeejo.» 60Amma Piyer toontii wi'i: «Mi faamay ko jiɗuɗaa batugo.» Wakkati o bati ka, den jakaraari joggi. 61Joomiraawo yeeƴitii daari Piyer, den Piyer siwtori ka Joomiraawo batunoo mo: «Go jakaraari jogga hanne, a wi'an de tati a annaa am.» 62Den Piyer wurtii wulli bojji kaaɗuɗi.

Yeesu yennaama, fiyaa

(Matiye 26:67-68, Marku 14:55-68)

63Himɓe reenuɓe Yeesu e jala mo, e fiya mo, 64ɓee kooma yeeso makko, den ɓee ƴama mo ɓee bi'a: «Tinta, moy nun fiyu maa?» 65Go ɓee jenna mo jennooje naawuɗe.

Yeesu yaaraama yeeso *dawrooɓe

(Matiye 26:59-66, Marku 14:55-64, Yuhaana 18:19-24)

66No weeti, *dottiiɓe *Yahuduuɓe e hooreeɓe *Liimaamiiɓe e moodiɓɓe tawreeta hawritii. Ɓe gaɗi Yeesu waddaa yeeso waalde maɓɓe dawroore mawne, 67go ɓe bi'i mo: «To an woni *Almasiihu, batu men.» O toontii ɓe o wi'i: «To mi batii on, on goonɗintaa, 68to mi ƴamii on bo haala, on toontataako am. 69Amma diga jooni, Ɓii neɗɗo jooɗoto far to nyaamo Alla mo baawɗe.» 70Go ɓe fu ɓe ƴami mo ɓe bi'i: «A laati nun den Ɓiɗɗo Alla na?» O toontii ɓe o wi'i: «On batii ka, non non laatiimi.» 71Go ɓe bi'i: «En bukaaka kade seedeejo! Enen e ko'e men en nanii ka o bati e hunnuko makko.»

Iliyochaguliwa sasa

Luka 22: BFB

Kuonyesha

Shirikisha

Nakili