Luka 21

Dokkal debbo gowniijo

(Marku 12:41-44)

1Yeesu ɓanti gite go o yi'i joom ceedeeɓe gom e watta dokke mum der nokkuure to ceede wattetee. 2Den o yi'i debbo gowniijo talkaajo gom e watta ceeron petton ɗiɗon. 3O wi'i: «E gooŋa batanmi on, debbo gowniijo talkaajo on wattii ceede ɓuri ɓee too fu. 4Gam horiiɓe fu, wattu nun ceede ɗe ɓe bukaaka, amma kanko, der talkaaku makko, o wattii ceede ɗe o woodi oo marorii fu.»

Yeesu e batana pusol suudu Alla

(Matiye 24:1-2, Marku 13:1-2)

5Himɓe woɓɓe e batana suudu Alla e no ŋol wooɗiniraa e kaaƴe booɗɗe, e dokke ɗe Alla hokkaa, go Yeesu wi'i: 6«Ko ji'oton ɗo fu, nyalaane gom waraan baa hayre yowataako dow wonne, ɗum fu ɗum pusete.»

Boneeji garooji go duuniyaaru heennya

(Matiye 24:3-14, Marku 13:3-13)

7Ɓe ƴami mo ɓe bi'i: «Moodibbo, dey nun ɗum waɗoyta? Maane ney nun hollitoyta wakkati ɗum waɗoyta?»

8Yeesu toontii ɓe, wi'i: «Kakkilee, to on accee goɗɗo jammoo on, gam himɓe ɗuuɓɓe waraan e inne am ɓe wi'a kamɓe woni *Almasiihu. Wakkati on yottake du koo! Amma to on tokkee ɓe. 9To on nananii konuuji e fitinaaji, to on kulee, sey ɗum ɗon wara taw, amma keennyol duuniyaaru bane ɗon taw.»

10Go o ɓeydi kade o wi'i: «Lenyi ummontiran hawre, laamu ummanto laamu, 11dimmaaɗe leydi mawɗe waɗan. Der nokkuuje goɗɗe bo nyawuuji, e rafooji waɗan. Kujje kulniiɗe e maaneeji mawɗi laatoto dow kammu. 12Amma ko huune ɗum fu laatoo, on nanŋete, tooreɗon, jaareɗon kiiteɗon der cuuɗi baajorɗe, on maɓɓete der kasu, jaareɗon yeeso laamiiɓe, e mawɓe genni gam inne am. 13Kanjum nun hokkata on laawol seedanaago inne am. 14To on miilee der ɓerɗe mooɗon to noy burtortoɗon, e kaye batoyton. 15Gam mi hokkan on haala ka batoyton e ƴoyre, faa wayɓe mon fu waawataa ko salii naa bo yeddi. 16Saareeji mon, e rimdaaɓe mon, e wondaaɓe mon, e banniraaɓe mon fu jammoto on, ɓe bara woɓɓe mon. 17Himɓe fu wanyan on gam inne am. 18Amma baa gaasayel hoore mon gootel halkataa. 19To oon tinnii, on kisinan yonkiiji mon.»

Yeesu e batana pusol *Urusaliima

20«To on ji'ii haɓooɓe konu e filfitii wanŋarde *Urusaliima, paamee no wakkati muunyitol mayre faanake. 21Den mum, tawaaɓe Yahudiya dogga yaha dow baalle, tawaaɓe *Urusaliima bo dogga wurtoo, wonɓe der gese bo to wittu der wanŋarde. 22Gam nyalaaɗe ɗen laati nun nyalaaɗe wattaago mone, heɓa ko dewte batunoo fu hebba. 23Bone laatanto rewɓe gaamɓe e musinteeɓe der nyalaaɗe ɗen! Gam ɓillaare mawne laatoto dow leydi nin, mone Alla bo yowoto dow himɓe mayri. 24Ɓe bariroyte e kaafaaje, ɓe jaarete ɓe maɓɓee der leyɗe fu, lenyi janani yaaɓan *Urusaliima faa wakkati majji hebba.»

Garki ɓii neɗɗo

(Matiye 24:29-31, Marku 13:24-27)

25«Haaynaareeji waɗan der naaŋe e lewru, e koode. Dow leydi bo, hakkillooji himɓe ummoto faa ɓe annataa ko ɓe gaɗata, gam rimmo diyam maayo e galmaaji mum. 26Kulol waran himɓe to ɓee miilana ko waranoyta duuniyaaru, gam baawɗeeji gonuɗi dow kammu dimmete. 27Den mum, on ji'an Ɓii neɗɗo e wara der duula e baawɗe mawɗe, e tedduŋal. 28To ɗum ɗon fuɗɗii waɗugo, daree wooɗa, ɓanton ko'e, gam kisidam mon faanake.»

Ballool dow ibbi

29Den Yeesu waɗani ɓe ballool ŋol ɗo, wi'i: «Daaree ibbi e leɗɗe koriiɗe fu. 30To on ji'ii baafe majje fuɗɗii wilitingo, oon anni onon e ko'e mon no wakkati setto faanake. 31Hande non bo, to on ji'ii huune ɗum e waɗa, annee no Laamaare Alla faanake. 32E gooŋa batanmi on, himɓe jaamanuuru nuu ɗo maayidintaa, go ɗum fu ɗum waɗa. 33Kammu e leydi yawtan, amma haala am yawtataa faa abada.»

Hakkilango hoore mum e miilooji duuniyaaru

34«Kakkilanee ko'e mon! To on accee nyaamduuji juulɗe, e jaranji, e miilooji duuniyaaru hebba ɓerɗe mon gam to nyalaane nen juhu on. 35Gam ne juhan himɓe woniiɓe der duuniyaaru ɗo fu hande pittol. 36Gam majjum to on ɗaanee, du'ee wakkati fu, gam keɓon semme daɗugo huune ko warata fu, keɓon bo daraago yeeso Ɓii neɗɗo.»

37Nyalooma, Yeesu e janŋina der suudu Alla, jemma bo, oo yaha oo waala dow waanne wi'eteene ‹waanne Jaytuuje›. 38Go himɓe fu e dawaa e wara to makko der suudu Alla, e hettinanii mo.

Iliyochaguliwa sasa

Luka 21: BFB

Kuonyesha

Shirikisha

Nakili