Yuhaana 6
6
Yeesu nyaamnii himɓe ujune joyo
(Matiye 14:13-21, Marku 6:30-44, Luka 9:10-17)
1Ɓaawo majjum Yeesu joli maayo Galili, bi'eteeŋo Tiberiya. 2Jama'aare ɗuunne e tokki mo gam ɓe ji'ii haaynaareeji ɗi o waɗani nyawɓe. 3Yeesu eenci dow waanne, jooɗodii ton e aahiiɓe mum. 4Tawi juulɗe *Yahuduuɓe bi'eteeɗe *Paska ɓattake. 5Yeesu ɓanti gite, o holliri jama'aare ɗuunne e fonnoy mo. O ƴami Filippu: «Toy keɓeten cooden nyaamdu ko nyaamnata himɓe ɓee ɗo fu?» 6O batu nun makko gam o nana ko Filippu toontotoo, gam oo anni ko o miili waɗugo.
7Filippu toontii mo, wi'i: «Baa ceede cardi keme ɗiɗi (200), heƴataa soodugo peen, faa moy fu heɓa ŋappel.» 8Aahiiɓe makko gooto mum, bi'eteeɗo Andere, miiraawo Simon Piyer, wi'i mo: 9«Suka gorko gom na'on ɗoo, e woodi peen joy e liƴƴi ɗiɗi, amma ume ɗum ɗon waɗanta ɓee ɗo fu?»
10Yeesu wi'i: «Bi'ee ɓe, ɓe jooɗoo.» Tawi nokkuure nen e hebbi fuɗo, ɓe jooɗii. Ɓe gaɗan himɓe ujune joyo (5 000). 11Yeesu etti peen kon, yetti Alla, seennani wonuɓe ɗon. O waɗi liƴƴi ɗii bo hande nun. O hokki ɓe faa ɓe kaari. 12No ɓe nyaami ɓe kaari, Yeesu wi'i aahiiɓe mum: «Kawritee ko horii, baa goɗɗum to halku.»
13Ɓe kawriti ŋappe peen joyo ko himɓe ɓen horii, ko kebbi killaaje sappo e ɗiɗi (12).
14No himɓe yi'i haaynaare ne Yeesu waɗi, ɓe bi'i: «Lalley, kanko woni *Annabiijo bi'aaɗo waran der duuniyaaru.»
15Amma no Yeesu e anni ɓe garan nanŋugo mo e semme, ɓe laamina, o yawti diga ɗon, o eenci kade dow waanne, kanko tan.
Yeesu e yaha dow diyam maayo
(Matiye 14:22-33, Marku 6:45-53)
16Kiikiiɗe mum, aahiiɓe Yeesu yahii takkol maayo. 17Ɓe naati laana diyam gam ɓe jola, ɓe jaha Kafarnahum. Niwre fuɗɗii waɗugo, tawi Yeesu hewtaaki ɓe taw. 18Hennu manŋol e wifa, galmaaji diyam e ummoo. 19Ɓe laanyi laana ŋan faa ɓe keɓi hande kilo joy naa jeego'o. Den ɓe kolliri Yeesu e yaha e koyɗe dow maayo, faa ɓattii ɓe. Go ɓe kuli. 20Yeesu wi'i ɓe: «Min nun, to on kulee!» 21Ɓe jiɗunoo o naata e laana ŋan, amma ɗon maa ɗon ɓe jottii fonŋo to ɓe poonnii.
Himɓe e daarta Yeesu
22Fini mum, jama'aare wonunoone fonŋo maayo, yi'i no laana goota tan yawti. Yeesu bo naatiday e aahiiɓe mum der laana ŋan. Kamɓe tan yawti e magga. 23Laanaaji ƴiwuɗi Tiberiya warii takkol to ɓe nyaami peen ɗon, ɓaawo no Joomiraawo yetti Alla. 24No jama'aare yi'i Yeesu e aahiiɓe mum walaa ɗon, ɓe naati laanaaji diyam, ɓe jahi Kafarnahum daartoygo mo.
Yeesu woni nyaamdu kokkoowol yonki
25No ɓe tawi Yeesu fonŋo maayo, ɓe bi'i mo: «Moodibbo, dey garuɗaa ɗo?» 26Yeesu toontii ɓe, wi'i: «To gooŋa nun, hinaa gam on ji'ii haaynaareeji ɗi gaɗumi acci oon daartammi. Gam sabbu mi nyaamnii on faa kaaruɗon acci oon dartammi. 27To on gollee gam nyaamdu keennyoowol, amma gollee gam nyaamdu tabitintooŋol, kokkoowol yonki tabitiiki. Nyaamdu ŋol ɗon nun, Ɓii neɗɗo hokkata on, gam kanko nun Alla Baaba waɗani maane baawɗe mum.»
28Den ɓe ƴami mo, ɓe bi'i: «Ume men gaɗata ko men gaɗa golle ɗe Alla yiɗi?» 29Yeesu toontii ɓe, wi'i: «Golle ɗe Alla yiɗi gaɗon woni goonɗinon mo o liloy.»
30Ɓe toontii mo, ɓe bi'i: «Haaynaare ney gaɗataa men ji'a, faa men goonɗinee? Ume nun gaɗataa? 31Maamiraaɓe amen nyaamii nyaamdu bi'eteeŋol *maannu der ladde yorne, hande no dewte wi'iri: "O hokkii ɓe nyaamdu ƴiwunu dow kammu".» 32Yeesu toontii ɓe, wi'i: «Mii bata on e gooŋa, hinaa Muusa hokki on nyaamdu ƴiwuŋol dow kammu. Baaba am hokki on nyaamdu geetol, ƴiwuŋol dow kammu. 33Nyaamdu ŋol Alla hokkata woni, ƴiwuŋol dow kammu, kokkoowol duuniyaaru yonki.» 34Ɓe bi'i mo: «Moodibbo, hokku men nyaamdu ŋol baadey.»
35Yeesu wi'i ɓe: «Min woni nyaamdu kokkoowol yonki, garuɗo to am rafataake abada, goonɗinɗo am bo ɗonɗataake abada. 36Amma mi batii on: on ji'ii am, go on goonɗinay am. 37Ɓe Baaba hokkimmi fu, waran to am. Garuɗo to am fu, mi salataako mo. 38Gam waɗugo ko jiɗumi bane acci ƴiwmi dow kammu, amma gam mi waɗa ko liloyɗo am yiɗi. 39Nani ko liloyɗo am yiɗi: to baa gooto der himɓe ɓe o hokkimmi ɓen majju, amma gam mi ummitina ɓe nyalaane darŋal. 40Nani ko Baaba am yiɗi: ji'uɗo Ɓiɗɗo fu, to goonɗinii mo, heɓa yonki tabitiiki. Mi ummitinan mo nyalaane darŋal.»
41*Yahuduuɓe e dumbitoo hakkune mum dow haala Yeesu, gam o wi'i: «Min woni nyaamdu ƴiwuŋol dow kammu.» 42Ɓe bi'i: «Oo ɗo, hinaa Yeesu ɓii Yusufu, mo annuɗen inna mum e baaba mum on na? Noy o wi'irta, dow kammu nun o ƴiwoy?»
43Yeesu wi'i ɓe: «To on dumbitee hakkune mooɗon! 44Goɗɗo waawataa ko wari to am, to Baaba liloyɗo am wadday mo to am. Min bo, mi ummitinan mo nyalaane darŋal. 45E winnaa der dewte annabiiɓe: "Ɓe fu Alla janŋinan ɓe." Neɗɗo fu nanuɗo ko Baaba bati, go jaɓi janŋinol makko, waran to am. 46Goɗɗo meeɗay yi'ugo Baaba to hinaa ƴiwuɗo to Alla, kanko tan yi'i Baaba. 47Mii bata on e gooŋa: Goonɗinɗo am, heɓii yonki tabitiiki. 48Min woni nyaamdu kokkoowol yonki. 49Maamiraaɓe mooɗon nyaamii nyaamdu bi'eteeŋol *maannu der ladde yorne, ɓe maayii bo. 50Amma nyaamuɗo nyaamdu ƴiwuŋol dow kammu, maayataa. 51Min woni nyaamdu yonkintewol, ƴiwuŋol dow kammu. To neɗɗo nyaami nyaamdu ŋol, wuuran faa abada. Nyaamdu ŋol kokkanmi gam duuniyaaru wuura, laati nun ɓannu am.»
52Dow kaa ɗon *Yahuduuɓe e yeddontira no waawi fu, e wi'a: «Noy neɗɗo oo waawirta ko hokki en ɓannu mum nyaamen?» 53Yeesu toontii ɓe, wi'i: «Mii bata on e gooŋa: To on nyaamay ɓannu Ɓii neɗɗo, to on jaray ƴiiƴam makko, yonki walaa der mooɗon. 54Nyaamuɗo ɓannu am, to yari ƴiiƴam am, heɓii yonki tabitiiki. Mi fintinan mo nyalaane darŋal. 55Gam ɓannu am laati nun nyaamdu lalley, ƴiiƴam am bo laati nun jaram lalley. 56Neɗɗo fu nyaamuɗo ɓannu am, to yarii ƴiiƴam am, oo wondi e am, min bo mii wondi e makko. 57Baaba liloyɗo am laati nun buuruɗo. Gam makko bo buurumi. Hande nun nyaamuɗo am fu, wuurirta gam am. 58Ŋol ɗon nun woni nyaamdu ƴiwuŋol dow kammu. Ŋol nandaa e ŋol kookiraaɓe mooɗon nyaamuno, go ɓe maayii bo. Nyaamuɗo nyaamdu ŋol ɗo wuuran faa abada.»
59Haalaaji ɗii ɗo nun Yeesu bati wakkati janŋinta der suudu waajorde Kafarnahum.
Yonki tabitiiki
60No ɓe nani haalaaji ɗin, aahiiɓe makko ɗuuɓɓe mum wi'i: «Haala ka e tiiɗi. Moy waawata ko jaɓi ka?»
61Yeesu faami der ɓerne mum, aahiiɓe mum e dumbitoo dow majjum, go o wi'i ɓe: «Haala kan jiɓi on nun? 62Jon kan to on ji'ii Ɓii neɗɗo e eenca to wonunoo, den mum noy gaɗoton? 63Ruuhu woni buurinoowo, ɓannu nafataa goɗɗum. Haalaaji ɗi kaalanmi on ɗii, laati nun Ruuhu e yonki. 64Nani e woodi caka mooɗon ɓe goonɗinay.» Gam Yeesu e anni diga fuɗɗoode, ɓe goonɗinay mo, e jammotooɗo mo. 65O ɓeydi o wi'i: «Gam majjum bi'umi on: "Walaa baawoowo ko wari to am, to Baaba hokkay mo no o warirta".»
66Diga den mum tokkuɓe mo ɗuuɓɓe mum dilli, acci tokkugo mo. 67Den Yeesu ƴami aahiiɓe mum sappo e ɗiɗo ɓen: «Onon bo, oon jiɗi dillugo na?» 68Simon Piyer toontii mo, wi'i: «Joomiraawo, to moy men jahata? An woodi haala kokkooha yonki tabitiiki. 69Men goonɗinii, emen anni an woni Ceniiɗo ƴiwoyɗo e Alla.» 70Yeesu toontii ɓe, wi'i: «Hinaa min suɓi on, onon sappo e ɗiɗo (12) na? Amma enon fu gooto mooɗon laati nun seyɗaanuujo.»
71Haala Yahuuda, ɓii Simon Isikariyotu nun o batata ɗon, gooto der sappo e ɗiɗo (12) ɓen. Oo ɗon woni jammotooɗo mo.
Iliyochaguliwa sasa
Yuhaana 6: BFB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Bible Fulfulde Bénin © SIM International 2015, 2024.
