Yuhaana 5

Yeesu nyawtii moofo

(Marku 2:28, Yuhaana 7:19-26, 9:1-17)

1Ɓaawo majjum, juulɗe *Yahuduuɓe e waɗa. Go Yeesu yahi *Urusaliima. 2*Urusaliima ton, takkol Dammugal baali e be'i, weeldere diyam e woni ɗon, nee wi'ee e Iburaninkoore Betijata. Dammuɗe joy mawɗe e filfitii ne. 3Nyawɓe ɗuuɓɓe e fukkii ley dammuɗe ɗen: wumuɓe, e laƴooɓe, e moofiɗinɓe. [Ɓee keɗii diyam weeldere nen irtee. 4Gam malaykaajo Joomiraawo e jippoo e weeldere nen tife e tife, e irta diyam ɗam. Nyawɗo artuɗo naati e diyam ɗam de ɗam irtaa, e yoofoo no nyaw mum wa'i fu.] 5Gorko nyawɗo diga duuɓi laso e sappo e jeetati (38) e wonunoo ɗon. 6Yeesu yi'i oo fukkii, anniti o ɓooyidii e nyaw, ƴami mo wi'i: «Aa yiɗi yanɗitineego?» 7Nyawɗo on toontii mo, wi'i: «Moodibbo, mi walaa goɗɗo ballanɗo am naatugo e weeldere nen to diyam irtike, go mi yottoo fu, den goɗɗo artii am naatugo.»

8Yeesu wi'i mo: «Umma, ettu daago maa, yahu!»

9Ɗon maa ɗon gorko on yoofii, etti daago mum e yaha. Ɗum fakkii e nyalaane siwteteene. 10Gam majjum hooreeɓe *Yahuduuɓe wi'i nyawtaaɗo on: «Hanne nyalaane siwteteene nun, laawol hokkay maa doonoɗaa daago maa.» 11O toontii ɓe, o wi'i: «Nyawtuɗo am nun wi'immi mi etta daago am, mi yawta!» 12Ɓe ƴami mo: «Moy nun bi'uɗo maa etta daago maa, jahaa?» 13Amma nyawtaaɗo on annaano mo, gam Yeesu mutii caka himɓe sabbu no ɓe ɗuuɗiri e nokkuure nen.

14Ɓaawo mum Yeesu fotti kade e makko der suudu Alla, wi'i mo: «Daaru, jooni kan, a yoofike. Taa waɗu hakke kade, wara ko ɓuri ɗum bonugo heɓe.» 15Gorko on yahi batoy hooreeɓe *Yahuduuɓe o wi'i Yeesu nun nyawti mo.

16Go *Yahuduuɓe fuɗɗi gaccaago Yeesu gam o waɗii ɗum e nyalaane siwteteene. 17Yeesu wi'i ɓe: «Baaba am e golloo faa hanne, min bo, mii golla.»

18Gam majjum hooreeɓe *Yahuduuɓe hocci niiya warugo mo, hinaa gam o biisii nyalaane siwteteene tan, amma gam o wi'i bo, Alla woni Baabiiko. O fotinii hoore makko e Alla.

Baawɗe Ɓiɗɗo Alla

19Yeesu wi'i ɓe: «Mii bata on e gooŋa, Ɓiɗɗo waawataa ko waɗi goɗɗum kan tan, sey ko yi'i Baaba e waɗa. Gam ko Baaba waɗata fu, kanjum Ɓiɗɗo bo waɗata. 20Gam Baaba e yiɗi Ɓiɗɗo, kan waɗi e holla mo huune fu ko o waɗata. O hollan mo golle ɓurɗe ɗee ɗo fu manŋu, faa haaynaare waɗa on. 21Gam hande no Baaba fintinirta maayɓe wuurina ɓe, non Ɓiɗɗo bo wuurinirta mo yiɗi. 22Baaba kan, hiitataako goɗɗo, amma o hokkii Ɓiɗɗo baawɗe hiitaago kiita fu, 23gam himɓe fu teddina Ɓiɗɗo hande no teddiniri Baaba. Mo teddinay Ɓiɗɗo fu, teddinay Baaba liloyɗo mo.

24Mii bata on e gooŋa, nanuɗo haala am ko goonɗini liluɗo am, heɓii yonki tabitiiki, o hiitataake. O wurtake diga e maayde, o wari to yonki. 25Mii bata on e gooŋa: Wakkati e wara, ki yottike du, de maayɓe nanata daane Ɓiɗɗo Alla. Nanuɓe ne bo wuuran. 26Hande no Baaba laatorii ɓulirde yonki, hande non o hokkii Ɓiɗɗo bo laatoo ɓulirde yonki. 27O hokkii mo baawɗe hiitaago, gam o laati nun Ɓii neɗɗo. 28To on accee ɗum haaynoo on. Wakkati waran, de maayɓe wonuɓe der janaale nanata daane makko, 29ɓe burtoo. Waɗuɓe ko wooɗi, finta, heɓa yonki, waɗuɓe ko halli finta, hiitee.»

Haala Yeesu laati nun gooŋa

30«Min e hoore am, walaa fu ko baawumi waɗugo. Mii hiitorto nun hande no Baaba am ekkitinirimmi. Kiita am e foonnitii, gam mi tokkataa sago am, sago lilɗo am nun tokkumi. 31To mi seedanake hoore am, seedaaku am laatataako gooŋa. 32E woodi goɗɗo ceedantooɗo am. Mii anni seedaaku ŋu o seedantoo am laati nun gooŋa. 33Onon, on lilii himɓe to Yuhaana, o seedanake am gooŋa. 34Min, mi bukaaka seedaaku neɗɗo, amma mi batii ka gam kison. 35Yuhaana laatake fitilla kuɓɓoowa, jaaynoowa. On jaɓii welweltugo wakkati seɗɗa e jayŋol makko. 36Min, mii woodi seedaaku ɓurŋu ŋu Yuhaana seedanii am manŋu. Kanŋu woni golle ɗe baaba yowanimmi mi waɗa. Golle ɗe gaɗanmi ɗen nun seedantoo am no Baaba nun liloyimmi. 37Baaba am liloyɗo am, kanko e hoore makko seedanii am. Abada on nanay daane makko, abada on ji'ay mo. 38On jaɓay haala makko, gam on goonɗinay mo o liloy. 39Oon biɗitoo Dewte ceniiɗe gam oon miiji ɗe kokkan on yonki tabitiiki. Kanje seedantoo am. 40Amma, on jaɓay warugo to am gam keɓon yonki tabitiiki.

41Diga e himɓe bane keɓammi tedduŋal am, 42mii anni on. Mii anni yidde Alla walaa e mooɗon. 43Min, mi warii e inne Baaba am, on jaɓɓaaki am. Amma to goɗɗo wardii inne mum, on jaɓɓoto mo. 44Noy baawirton ko goonɗini, onon teddinontirooɓe hakkune mooɗon, go accuɗon daartugo tedduŋal Alla? 45To on miilee min gaccotoo on yeeso Baaba. Muusa, mo goonɗinɗon on nun gaccoytoo on. 46To on goonɗiniino Muusa e gooŋa, on goonɗinanno am min bo, gam min o batani der dewte makko. 47Amma no on goonɗinay ko o winni, noy goonɗinirton haala am?»

Iliyochaguliwa sasa

Yuhaana 5: BFB

Kuonyesha

Shirikisha

Nakili