Yuhaana 11
11
Maayde Lasaa
1Gorko gom, bi'eteeɗo Lasaa e tawanoo Baytaniya, o nyawi. Oo wondi e sakikiraaɓe makko ɗiɗo, kamɓe woni Mariyama e Marta. 2Mariyama on nun moomunoo wardi e koyɗe Joomiraawo, go o moytiri ɗe e gaasa hoore makko. Sakiike makko, Lasaa nun nyawunoo. 3Sakikiraaɓe makko lili himɓe yaha to Yeesu wi'a mo: «Moodibbo, beldiijo maa yanɗaa.»
4No Yeesu nani ka, wi'i: «Nyaw ɗum ɗon nyaw maayde bane. Ɗum waru nun gam tedduŋal Alla, gam Ɓiɗɗo Alla teddiniree e majjum.»
5Yeesu e yiɗi Marta, e miiraawo mum, e Lasaa. 6Baa no o nani Lasaa yanɗaa, haɗay mo jooɗaago balɗe ɗiɗi to o wonunoo. 7Ɓaawo majjum o wi'i aahiiɓe makko: «En bittee leydi Yahudiya!» 8Aahiiɓe wi'i: «Moodibbo, baa ɓooyay *Yahuduuɓe e daartano faɗɗugo maa kaaƴe wara, go ton nun bittataa?» 9Yeesu toontii: «Hinaa wakkatiiji sappo e ɗiɗi woni der nyalooma? Jahoowo nyalooma fergataako gam oo yi'a jayŋol duuniyaaru nu. 10Amma jahoowo jemma fergoto gam o yi'ataa jayŋol.»
11Ɓaawo o bati haalaaji ɗii ɗon, o wi'i: «Giɗo meeɗen Lasaa ɗaanake, mi yahan, mi finnina mo.» 12Aahiiɓe wi'i: «Moodibbo, to o ɗaani nun, o yoofoto.» 13Maayde Lasaa nun o batanannoo. Kamɓe ɓe miili haala ɗoyŋol nun o batani. 14Yeesu laaɓinani ɓe wi'i: «Lasaa maayii! 15Ɓerne am welii gam mooɗon ko mi tawaaka ton. Ɗum accan goonɗinon. To non en jahu, to makko.» 16Den Toma bi'eteeɗo Ciwto wi'i aahiiɓe Yeesu horiiɓe: «En jahu enen bo gam maayden e makko.»
Yeesu woni pintinoowo e kokkoowo yonki
17No Yeesu yottii ton, tawi waɗii balɗe naay Lasaa e tawaa der yanaane. 18Hakkune Baytaniya e *Urusaliima ɓuraa kilooji tati. 19*Yahuduuɓe ɗuuɓɓe wari to Marta e Mariyama gam eytugo ɓe e maayde sakiike maɓɓe.
20No Marta nani Yeesu warii, yahi taɓɓitoy mo. Tawi Mariyama kan e jooɗii der suudu. 21Marta wi'i Yeesu: «Moodibbo, to aa na'onno ɗo, sakiike am maayataano. 22Amma baa jooni, mii anni huune fu ko ƴamuɗaa Alla, o waɗante ɗum.» 23Yeesu wi'i mo: «Sakiike maa fintan.» 24Marta wi'i: «Mii anni o fintan nyanne maayɓe fintintee e nyalaane darŋal.»
25Yeesu wi'i mo: «Min woni pintinoowo, min woni kokkoowo yonki. Neɗɗo fu goonɗini am, baa to maayii, wuuran. 26Buuruɗo fu, go e goonɗinimmi, maayataa abada. Aa goonɗini ɗum na?» 27O toontii: «Ee, moodibbo! Mii goonɗini an woni *Almasiihu, Ɓiɗɗo Alla, garoowo e duuniyaaru.»
Yeesu wullii
28Ɓaawo mum Marta yahi noddoygo miiraawo mum Mariyama, o sownii mo: «Moodibbo warii, oo nodde.»
29No Mariyama nani kaa ɗon, ummii doggi, yahi to Yeesu. 30Gam Yeesu naatayno siire nen taw. Oo tawaa to Marta fottunoo e makko. 31*Yahuduuɓe e wondunoo e Mariyama der suudu. Ɓee eyta mo. Ɓe ji'i o ummii lallaw. Ɓe tokki mo, ɓe miili o yahan nun e yanaane o wullaa.
32No Mariyama yottii to Yeesu, no o yi'i mo, o diccii yeeso makko, o wi'i: «Moodibbo, to a na'onno ɗo, sakiike am maayataano.»
33No Yeesu yi'i Mariyama e *Yahuduuɓe wondunooɓe e mum e wulla, ɓerne makko biisii sanne. 34O ƴami: «Toy gattuɗon mo?» Ɓe toontii: «Moodibbo, war, daaru!» 35Yeesu wulli. 36*Yahuduuɓe wi'i: «Daaree no o yiɗiri mo.» 37Woɓɓe e maɓɓe wi'i: «Kanko bumtinɗo bumɗo o waawataano ko haɗi gorko on maayugo na?»
Lasaa fintinaama
38Ɓerne Yeesu biisii kade, o yahi to yanaane woni. Yanaane nen laati nun gayka maɓɓiraaka hayre. 39Yeesu wi'i: «Hikkinee hayre nen!» Marta, sakiike maayɗo, wi'i mo: «Moodibbo, o luuɓii koo, gam hanne waɗi balɗe naay oo woni der yanaane.» 40Yeesu wi'i mo: «Mi wi'ay maa baa, to a goonɗinii, a yi'an baawɗe Alla?»
41Ɓe hikkini hayre nen. Yeesu tiggitii, wi'i: «Baaba, mii yette gam aa nananammi. 42Min kan, mii anni no baadey fu aa nananammi. Amma mi baddu maa nun gam himɓe dariiɓe ɓee ɗo, gam ɓe goonɗina no an nun lilimmi.» 43Ɓaawo no o batidi haalaaji ɗii ɗon, o bati e semme o wi'i: «Lasaa wurta!» 44Maayunooɗo on wurtii, juuɗe mum e koyɗe mum e fiilaa leppi, yeeso mum e soomii. Yeesu wi'i ɓe: «Piilitee mo, accon mo o yaha.»
45*Yahuduuɓe warunooɓe to Mariyama, ɗuuɓɓe mum, yi'uɓe ko Yeesu waɗi, goonɗini mo. 46Amma woɓɓe maɓɓe yahi to *Farisaaɓe, bati ɓe ko Yeesu waɗi. 47*Farisaaɓe ɓen e hooreeɓe *Liimaamiiɓe noddi *dawrooɓe mawɓe, wi'i: «Gorko oo ɗo e waɗa haaynaareeji ɗuuɗɗi. Noy gaɗeten? 48To en accii mo oo waɗa ɗum, ɓe fu, ɓe goonɗinan mo. Romankeeɓe waran, halka en enen e nokkuure meeɗen seniine e leydi meeɗen.»
49Gooto maɓɓe, bi'eteeɗo Kayafasi, laatinooɗo hooreejo *Liimaamiiɓe duuɓol mum, wi'i ɓe: «Onon, on annaa goɗɗum. 50On annaa gomma neɗɗo gooto maayana himɓe men e no leydi nin fu halkirta.» 51Nani e hoore makko bane o bati haalaaji ɗin, amma gam o laatinoo hooreejo *liimaamiiɓe duuɓol mum, o waɗay maa annabaaku e haani Yeesu maayana leydi nin. 52Leydi nin tan bane haani o maayana, amma gam o hawrita ɓiɓɓe Alla sankitiiɓe fu ɓe laatoo gootum.
53Diga nyanne mum, hooreeɓe *Yahuduuɓe dawri warugo mo. 54Jooni kan Yeesu acci woosaago caka *Yahuduuɓe. O yawti diga ɗon, o yahi siire wi'eteene Efurayimu gonune ley ladde yorne. O jooɗodii ton e aahiiɓe makko.
55Juulɗe *Yahuduuɓe bi'eteeɗe *Paska ɓattake. Himɓe leydi nin ɗuuɓɓe mum yahi *Urusaliima gam laaɓina ko'e mum diga juulɗe ɗen yottaaki. 56Ɓee gonii e fageere suudu Alla, ɓee daarta Yeesu, ɓee ƴamontira: «O warataa e juulɗe ɗen? Naa no miiluɗon?»
57Tawi hooreeɓe *Liimaamiiɓe e *Farisaaɓe batiino annuɗo to o woni fu, bata, heɓa o nanŋee.
Iliyochaguliwa sasa
Yuhaana 11: BFB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Bible Fulfulde Bénin © SIM International 2015, 2024.
