Yuhaana 10

Ballool duroowo e baali mum

1Yeesu wi'i: «Mii bata on e gooŋa, neɗɗo fu naatoowo der hoggo baali go naatiray dammugal, go eenci bombooru naatiri to feere, kanko woni gujjo, e pasotooɗo. 2Amma duroowo baali, dammugal nun naatirta. 3Cakkiiɗo dammugal maɓɓitanan mo, baali ɗin bo nanan daane makko. O noddiran ɗi, ŋaye fu e inne mum, o wurtina ɗi yaasi. 4To o wurtinii ɗi ɗi fu, o ardoo ɗi, ɗi tokka mo gam ɗii anni daane makko. 5Abada ɗi tokkataa koɗo, amma ɗi doggan mo nun faa woɗɗi gam ɗi annaa daane hoɓɓe.»

6Yeesu waɗani ɓe ballool ŋol, amma ɓe paamay ko ŋol fillitii.

Yeesu laatii duroowo geeto

7Yeesu wi'i ɓe kade: «Mii bata on e gooŋa, min woni dammugal baali. 8Artuɓe am warugo fu, laati nun wuyɓe e pasotooɓe, amma baali ɗin nananay ɓe. 9Min woni dammugal. Neɗɗo fu naatiri e am, hisan, o naatan, o wurtoo, o heɓa ko o nyaamata. 10Gujjo warataa maa gam wujja, o wara, o biisa, amma min, mi waru nun gam himɓe heɓa yonki, heɓa ki kii heewi.

11Min woni duroowo geeto. Duroowo geeto woni kokkitiroowo yonki mum gam baali mum. 12Amma biiro, mo laataaki duroowo geeto, mo jeyaa baali, to yi'ii buuru, sey dogga, acca baali. Buuru nanŋa baali ɗin, sankita koriiɗi. 13Biiro on doggan gam faalaaka e majji. 14Min woni duroowo geeto. Mii anni baali am, baali am bo e annimmi. 15Hande no Baaba annirimmi, non annirmi Baaba. Mii hokka yonki am gam baali am. 16Mii woodi kade baali goɗɗi ɗi walaa der hoggo ŋoo ɗoo. Ɗii ɗon bo haani mi wadda ɗi. Ɗi nanan daane am, ɗi laatoo darne woore, ɗi gooda duroowo gooto.

17Baaba e yiɗimmi gam mii hokkitira yonki am gam mi heɓitoo ki kade. 18Goɗɗo ittantaa am ki, min e hoore am nun hokkata ki. Mii woodi baawɗe hokkitirgo ki, mii woodi bo baawɗe heɓitaago ki. Ooda kaa ɗon keɓumi to Baaba am.»

19Haalaaji ɗin seenni kade *Yahuduuɓe. 20Ɗuuɓɓe maɓɓe e wi'a: «Oo ginnaajiijo nun, o haaŋa nun. Gam ume go oon kettinanoo mo?» 21Amma woɓɓe wi'i: «Haalaaji ɗin, haalaaji ginnaajiijo bane. Ginnawol waawan ko wumtini bumɗo na?»

Yahuduuɓe salike Yeesu

22Juulɗe senuki suudu Alla e waɗenoo *Urusaliima. Ɗum fottii e peewol. 23Der suudu Alla ɗon, Yeesu e yaha e warta e nokkuure wi'eteene faranda Suleymaanu. 24*Yahuduuɓe filfitii mo, wi'i mo: «Faa dey accataa men der seko? To an woni *Almasiihu laaɓinan men.»

25Yeesu toontii ɓe: «Mi batii on, on goonɗinay. Golleeji ɗi gaɗirmi inne Baaba am, e seedanoo am. 26Amma on goonɗinay gam on laataaki baali am. 27Baali am e nana daane am. Mii anni ɗi, ɗii tokkimmi. 28Mii hokka ɗi yonki tabitiiki, ɗi kalkataa abada. Goɗɗo teetataa ɗi e juunŋo am. 29Baaba am kokkuɗo am ɗi, ɓuri huune fu. Goɗɗo waawataa ko teeti ɗi e juunŋo Baaba am. 30Min e Baaba fu, men laati nun gootum.»

31Den *Yahuduuɓe etti kade kaaƴe gam ɓe paɗɗa mo. 32Yeesu wi'i ɓe: «Mi waɗii yeeso mooɗon golleeji booɗɗi ɗuuɗɗi e baawɗe Baaba. Der golleeji ɗin, ɗiye e majji jiɗanɗon warirgo am e kaaƴe?» 33*Yahuduuɓe toontii mo wi'i: «Gam golle booɗɗe bane men jiɗi warirgo maa e kaaƴe, men jiɗu nun warugo maa gam a yennii Alla. An a tagaaɗo nun, amma a waɗii hoore maa Alla.»

34Yeesu toontii ɓe: «Ɗum winnaaka der tawreeta mooɗon: "Alla wi'ii on, on allaaɓe na"? 35Tawreeta noddii allaaɓe, ɓe o baddi, een anni ko dewtere bati laati nun gooŋa e baadey 36Onon, mo Alla seni, go lili mo e duuniyaaru, oo ɗon nun bi'oton, o yennii Alla? Gam o wi'ii oo laatii Ɓiɗɗo Alla. 37To mi waɗay golle Baaba am, to on goonɗinee am. 38Amma to mii waɗa ɗe, baa to on goonɗintaa am min e hoore am, goonɗinee golle am, gam annon, paamon Baaba na'on e am, min bo mi na'on e Baaba.»

39Ɓe daarti nanŋugo mo kade, amma ɓe keɓay. 40Yeesu wittii fonŋo gooruwol Urudun, nokkuure to Yuhaana waɗannoo *batisi arande, o jooɗii ton. 41Himɓe ɗuuɓɓe wari to makko, wi'i: «Yuhaana waɗay alaama kaayniika baa goota. Amma, ko o batani gorko on fu laati nun gooŋa.» 42Ton ɗuuɓɓe goonɗini Yeesu.

Iliyochaguliwa sasa

Yuhaana 10: BFB

Kuonyesha

Shirikisha

Nakili