Yuhaana 1

Haala laatake jayŋol e yonki

1Diga fuɗɗoode, bi'eteeɗo Haala e wonunoo. Oo wondi e Alla, o laati nun Alla. 2Diga fuɗɗoode, oo wondi e Alla. 3E makko Alla tagiri huune fu. Ko woni fu, goɗɗum mum tagaaka to hinaa e makko. 4Yonki ƴiwii e makko, yonki kin laatanii himɓe jayŋol. 5Jayŋol ŋol e yayna der niwre, niwre bo waaway nyifugo ŋol.

6Wakkati gom, Alla liloy goɗɗo bi'eteeɗo Yuhaana. 7O warii gam o laatoo seedeejo, o waɗana jayŋol seedaaku, gam himɓe fu goonɗina sabbu haala makko. 8Kanko bane woni jayŋol, amma o waru nun gam o seedanoo jayŋol ŋol. 9Kanŋol woni jayŋol gooŋakuwol, garuŋol e duuniyaaru gam yaynana himɓe fu.

10Bi'eteeɗo Haala na'onno der duuniyaaru, e makko duuniyaaru tagiraa, amma himɓe duuniyaaru annitay mo. 11O warii to himɓe makko, amma himɓe makko jaɓɓaaki mo. 12Amma jaɓɓiiɓe mo fu, go goonɗini inne makko, o hokkii ɓe laawol laataago ɓiɓɓe Alla. 13Diga e dingol bane ɓe laatorii ɓiɓɓe Alla, e yidde tagaaɗo bo bane, amma gam Alla hokkii ɓe yonki kesi.

14Haala laatake neɗɗo. Neɗɗo on jooɗodake e meeɗen, oo hebbi moƴƴere e gooŋa. Men ji'ii tedduŋal makko, tedduŋal ŋal Ɓiɗɗo bajjo heɓata e baaba mum. 15Yuhaana seedanii mo, bati e daane towne, wi'i: «Oo ɗo woni mo batannoomi on, bi'umi: Ɓaawo am, ɓuruɗo am waran, gam o na'on diga mi walaano.»

16E gonnan makko, en fu en keɓii moƴƴere dow moƴƴere. 17Diga e Muusa nun tawreeta hokkiraa, amma moƴƴere, e gooŋa warii diga e Yeesu *Almasiihu. 18Goɗɗo yi'ay Alla abada, amma Ɓiɗɗo bajjo, laatiiɗo Alla, gonduɗo e Baaba nun annini en Alla.

Seedaaku Yuhaana gaɗoowo *batisi

(Matiye 3:1-12, Marku 1:1-8, Luka 3:1-18)

19*Yahuduuɓe *Urusaliima lilii *Leewinkeeɓe, e *Liimaamiiɓe to Yuhaana, ɓe ƴama mo, kanko woni moy. 20O toontii ɓe e laaɓuɗum. Nani ko o seedii: «Min, mi *Almasiihu bane.» 21Ɓe ƴamitii mo, ɓe bi'i: «Den kan, moy nun laatiɗaa an? An nun Eliya na?» O wi'i: «Min, mi Eliya bane.» Ɓe bi'i: «An nun *Annabiijo batanaaɗo na?» O toontii: «Aawo, kanko bane laatiimi!» 22Ɓe bi'i mo: «Den mum moy nun laatiɗaa? Batu men ko men batoyta liloyɓe men. Moy nun noddirtaa hoore maa?» 23O toontii, o wi'i:

«Min woni batoowo der ladde yorne e wi'a:

"Moƴƴinee laawol Joomiraawo,"

hande no annabi Esaaya bati.»

24Lilaaɓe ɓen laati nun *Farisaaɓe. 25Ɓe ƴami mo: «Ko woni sabbu go aa waɗa *batisi, nani bo a *Almasiihu bane, a Eliya bane, a *Annabiijo batanaaɗo bane?» 26Yuhaana toontii ɓe, wi'i: «Min, mii waɗira *batisi e diyam, amma e woodi goɗɗo caka mooɗon mo on annaa, 27kanko woni garoowo ɓaawo am. Mi fotay baa firtugo ɓoggi paɗe makko.» 28Ɗum ɗon fu waɗu nun Baytaniya, takkol gooruwol Urudun, to Yuhaana waɗannoo *batisi.

Yeesu nun woni Jawdiyel Alla

29Fini mum, Yuhaana yi'i Yeesu e wara to mum, o wi'i: «Nani Jawdiyel Alla moytoowel hakkeeji duuniyaaru. 30Kanko nun batannoomi, bi'umi: "Goɗɗo waran ɓaawo am, oo ɓurimmi, gam o na'on diga mi walaano." 31Min, mi annaano mo. Amma mi warii, mii waɗa *batisi e diyam gam mi holla mo himɓe Isira'iila.»

32Yuhaana seedii, wi'i: «Mi yi'ii Ruuhu hande foonu e jippoy diga dow, hoɗi dow makko. 33Min, mi annaano mo. Amma lilɗo am mi waɗa *batisi der diyam, kanko nun wi'immi: "Mo ji'oytaa Ruuhu e jippoo dow mum, kanko woni gaɗiroowo *batisi e Ruuhu Ceniiɗo." 34Yuhaana wi'i: Min, mi yi'ii, mi seedake, kanko woni Ɓiɗɗo Alla.»

Aahiiɓe Yeesu arandeeɓe

(Matiye 4:18-22)

35Fini mum, Yuhaana e darodii kade e aahiiɓe mum ɗiɗo. 36O yi'i Yeesu e yawta, o wi'i: «Nani ɗo Jawdiyel Alla!»

37Aahiiɓe ɗiɗo ɓen nani ka o bati, tokki mo. 38Yeesu yeeƴitii, yi'i ɓee tokki mo, o wi'i ɓe: «Ume daartoton?» Ɓe toontii, ɓe bi'i: «Rabbi (ɗum wi'ay maa Moodibbo), toy tawaɗaa?» 39O wi'i ɓe: «Garee, daaree!» Den ɓe gari, ɓe ji'i to o tawaa. Ɓe jooɗodii e makko nyalaane nen. Wakkati mum, kiikiiɗe nun.

40Andere, miiraawo Simon Piyer, woni gooto der ɗiɗo nanuɓe haala Yuhaana, go ɓe tokki Yeesu. 41Mawniraawo makko, Simon nun o arti o fotti, o wi'i mo: «Men ji'ii *Almasiihu.» (Ɗum wi'ay maa Cuɓaaɗo). 42O yaari mo to Yeesu. Yeesu daari Simon Piyer, wi'i mo: «An, a laati nun Simon ɓii Yuhaana, a innitirte Kefasi.» (Ɗum wi'ay maa Hayre.)

Yeesu noddii Filippu e Natanayel

43Fini mum Yeesu yiɗi yahugo Galili. O fotti e Filippu, o wi'i mo: «Tokkam!» 44Filippu, mo Baytisayda nun, genni Andere e Piyer. 45Filippu fotti e Natanayel, o wi'i mo: «Men ji'ii mo haala mum batanoo der *tawreeta Muusa e der dewte *annabiiɓe. Kanko woni Yeesu ɓii Yusufu mo Nasaratu.» 46Natanayel wi'i mo: «Ko wooɗi waawan ko ƴiwi Nasaratu na?» Filippu toontii mo: «War, daaru!»

47Yeesu yi'i Natanayel e fonnoy mo, wi'i: «Oo ɗo laati nun Isira'iilaajo lalley, jamma fu walaa e makko.» 48Natanayel wi'i mo: «Toy annuɗaa am?» Yeesu toontii mo, wi'i: «Mi yi'ii maa ley ibbi diga Filippu nodday maa.» 49Natanayel toontii, wi'i: «Moodibbo, a laati nun Ɓiɗɗo Alla, a Laamiiɗo Isira'iila nun.» 50Yeesu toontii mo, wi'i: «Gam mi wi'ii mi yi'ii maa ley ibbi, kan acci go goonɗinɗaa na? A yi'an ko ɓuri ɗum ɗon manŋu.»

51Den o wi'i Natanayel: «E gooŋa batanmi on: On ji'an kammu e maɓɓitii, malaykaaɓe Alla e eenca e jippoo dow Ɓii neɗɗo.»

Iliyochaguliwa sasa

Yuhaana 1: BFB

Kuonyesha

Shirikisha

Nakili