Amosu 9
9
Kollitinki joyaɓi ki Alla holli Amosu: suudu Joomiraawo pusete
1Amosu wi'i: Mi yi'ii Joomiraawo e darii dow hiisirde. O wi'i:
Fiyu darŋalal jogiiŋal suudu Joomiraawo,
den bombooji suudu ŋol fu dimmoo!
Pusu ɗi dow ko'e himɓe, ɗi pusa ko'e himɓe fu,
to goɗɗo horake, sey mi wara mo e kaafahi.
Walaa baa gooto doggoowo daɗa.
2To ɓe cuuɗake der jonne maayɓe, juunŋo am happan ɓe wurtina.
To ɓe eencii dow kammu, mi jippinan ɓe.
3To ɓe doggii ɓe cuuɗoy dow waanne Karmel, mi yiitan ɓe ton mi happa ɓe.
To ɓe joolake der maayo lugguŋo gam ɓe cuuɗoo am,
mi lildan ton boddi diyam ni ŋata ɓe.
4To wayɓe maɓɓe nyaamii ɓe konu, happi ɓe maccuŋaaku,
mi accan ɓe baree ton e kaafaaje.
Mi hakkilanan ɓe to ɓe goni fu,
amma hinaa gam mi waɗana ɓe ko wooɗi,
amma gam mi waɗana ɓe ko halli.
5Alla Joomiraawo, Joom huune fu meemii leydi,
go ni diwni,
den jooɗiiɓe der mayri fu jooɗii maaydere,
Ɓe ummoto dow, den ɓe leesa hande to maayo Nili der leydi Misira hebbi diyam faa ŋabbi,
go wittoy deƴƴiti.
6O mahii wuro makko to o jooɗotoo dow kammu,
go ŋo laatii hurde duuniyaaru.
Oo nodda diyam maayo, o waanja ɗam dow leydi.
Inne makko woni Joomiraawo.
Kiita woofuɓe
7Joomiraawo wi'i:
Onon himɓe Isira'iila, on laatanaaki am hande Kusinkeeɓe naa?
Min bane wurtini on diga leydi Misira,
hande no burtinirmi Filisitinkeeɓe diga Kafitor,
e hande no burtinirmi Siriyankeeɓe diga Kir naa?
8Min Alla Joomiraawo, mii daari laamu Isira'iila ŋu hakke.
Mi halkan ŋu diga der duuniyaaru.
Amma lenyol Yaakuubu fu bane kalkanmi.
Min Joomiraawo nun bati ka.
9Mi accan himɓe Isira'iila wesee caka lenyi janani fu,
hande no gawri wesirtee,
baa ɓinŋel mum gootel yanataa e leydi.
10Himɓe am waɗooɓe hakke fu, go e wi'a,
mi accataa bone ɓattoo ɓe,
mi accataa ne yottoo ɓe,
ɓe fu ɓe barete der konu e kaafaaje.
Alla moƴƴitinto Isira'iila
11Nyalaane gom, mi moƴƴitinto laamaare Dawda,
naddune hande suudu januŋol,
mi sukkan pecci maggol,
mi umminan bombooji maggol januɗi,
mi mahitinto ŋol hande no ŋol laatinoo arande.
12Den mum ɓe jeytan leydi Edomu koriini,
e leyɗe lenyi janani to inne am noddetenoo fu.
Min Joomiraawo nun bati ka, mi waɗan ka bo.
13Joomiraawo wi'i:
Wakkati waran de dugge alkamaari heennyataa go aawre wara,
ɓiɗɗugo innabooje bo heennyataa go aawre wara.
Innabojam ɓulan diga dow baalle,
innabojam ilan dow tile hande puttiri.
14Mi wittinaan goonki himɓe am Isira'iilaaɓe hande no ki wa'unoo,
ɓe umminan wanŋarɗe janunooɗe, ɓe jooɗoo der majje.
Ɓe tiggan innabooje,
den ɓe jara innabojam majje.
Ɓe gaɗan deme leɗɗe,
den ɓe nyaama ɓikkon majje.
15Mi tiggan ɓe der leydi maɓɓe,
den ɓe ɗoofataake kade diga leydi ni kokkumi ɓe nin.
Min Alla Joomiraawo nun bati ka.
Iliyochaguliwa sasa
Amosu 9: BFB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Bible Fulfulde Bénin © SIM International 2015, 2024.