Amosu 7
7
Kollitinki arandehi ki Alla holli Amosu: baɓatti
1Nani ɗo ko Alla Joomiraawo hollimmi: O waɗii baɓatti ɗuuɗɗi tonnyi, wakkati fuɗo ko laamiiɗo wa'unoo fuɗɗi wilitingo. 2No baɓatti ɗin nyaamidi fuɗo leydi nin, bi'umi: Alla Joomiraawo, sawra! Baka mum, noy lenyol Yaakuubu panɗuŋol ŋol ɗoo wuurirta? 3Ɗon nun Joomiraawo waɗi alhaanu waɗugo ɗum, go o wi'i ɗum waɗataa kade.
Kollitinki ɗiɗaɓi ki Alla holli Amosu: yiite
4Nani ɗo ko Alla Joomiraawo hollimmi: O wi'i o hiitorto himɓe e yiite. Gulɗum yiite ŋen yoorini maayo manŋo, ŋe fuɗɗi bo jaɓingo leydi. 5Go eelumi Joomiraawo bi'umi: Sawra, haggu ɗum. Baka mum, noy lenyol Yaakuubu panɗuŋol ŋol ɗoo wuurirta? 6Ɗon nun Joomiraawo waɗi alhaanu waɗugo ɗum, go o wi'i ɗum waɗataa kade.
Kollitinki tataɓi ki Alla holli Amosu: ɓoggol poonnirgol
7Nani ɗo ko Joomiraawo hollimmi kade: Mi yi'ii Joomiraawo e darii takkol bombooru, oo jogii ɓoggol poonnirgol 8Go Joomiraawo ƴamimmi wi'i: Amosu, ume nun ji'ataa ɗon? Go toontiimi: Ɓoggol poonnirgol nun. Ɗon nun Joomiraawo wi'i: Mi fonnan himɓe am Isira'iilaaɓe hande bille fonnirtee. Mi yaafantaako ɓe kade.
9Mi pusan nokkuuje to himɓe lenyol Isiyaaku waɗata kiiseteeɗi,
mi accan nokkuuje Isira'iila ceniiɗe laatoo bille,
mi halkan saare Yerobo'am e kaafahi.
Amosu riiwaama diga Beteli
10Ɗon nun Amasiya *liimaamiijo Beteli, lildani Yerobo'am laamiiɗo Isira'iila habaru wi'i: Amosu ummanake maa, e yiɗi doƴƴugo laamaare maa caka himɓe Isira'iila. Himɓe leydi men bo waawataa munyango haalaaji makko ɗii ɗon. 11Nani ɗo ka Amosu on bati wi'i:
Yerobo'am warete nun der konu e kaafahi,
den himɓe Isira'iila happee maccuŋaaku woɗɗinee diga leydi mum.
12Ɗon nun Amasiya on wi'i Amosu, an #7:12 annabiijoji'oowo haaynaareeji, umma dillu diga ɗoo, jahaa leydi Yahuuda, gaɗaa ton annabaaku maa gam keɓaa ko nyaamataa. 13Amma taa waɗu kade annabaaku der Beteli ɗoo, gam ɗon nun laatii suudu seniiŋol to laamiiɗo juulanta Alla, ɗon nun bo woni laamorde makko. 14Ɗon nun Amosu toontii Amasiya wi'i: Min mi laataaki *annabiijo, mi laataaki bo ɓii *annabiijo. Mi laati nun duroowo e juwoowo ibbe gam ɗe ɓenna law. 15Diga e durande nun Alla suttoy am, go o wi'i: Yahu gaɗanaa himɓe am Isira'iilaaɓe annabaaku. 16Jooni, hettina nanaa haala ka Joomiraawo bati, an bi'oowo, to mi waɗan himɓe Isira'iila annabaaku, to mi batu himɓe lenyol Isiyaaku ko waroyta yeeso. 17Gam majjum, nani ɗo ka Joomiraawo bati wi'i:
Debbo maa laatoto jeenoowo der wanŋarde,
sukaaɓe maa worɓe e rewɓe warete der konu e kaafaaje,
leydi maa foonnete, seennee,
an e hoore maa a maayan der leydi ni himɓe mum annaa Alla,
himɓe Isira'iila bo happete maccuŋaaku, woɗɗinee diga leydi mum.
Iliyochaguliwa sasa
Amosu 7: BFB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Bible Fulfulde Bénin © SIM International 2015, 2024.