Amosu 5
5
Jimol bojji ŋol himɓe Isira'iila yimanaa
1Onon himɓe Isira'iila, kettinee nanon jimol bojji ŋol jimanmi gam mon.
2Onon himɓe Isira'iila, onon laatiiɓe hande gati maayuɗi, on janii on ummataako kade,
oon pukkii der leydi mon,
goɗɗo walaa umminoowo on.
3Gam nani ɗo ka Alla Joomiraawo bati wi'i:
Onon himɓe Isira'iila, to himɓe mon ujuneere (1 000) wurtake diga wanŋarde gom gam haɓoygo konu,
hewre (100) tan nun wartata.
To himɓe hewre (100) wurtake diga wanŋarde mon gom gam haɓoygo konu, sappo tan nun wartata.
Dartee Joomiraawo gam buuron
4Nani ɗo ka Joomiraawo bati himɓe Isira'iila o wi'i:
Dartee am, gam buuron.
5Amma to on dartee am faa Beteli,
to on jahee faa Giligali,
to on jahee faa Beriseba.
Gam wayɓe egginan himɓe Giligali, yaara ɓe maccuŋaaku,
ɓe kalkan bo Beteli.
6Dartee am, min Joomiraawo gam buuron!
Gam to mi suppita der lenyol Yusufu hande yiite,
den ɓe jaɓa yiite,
ɓe dulla nyifoowo ŋe der Beteli fu.
7Onon waylitooɓe gooŋa ka laatoo kaaɗuka hande kahi,
on kiitortaako hande no haaniri!
8Min Alla Joomiraawo mi tagii koode mawɗe feere feereeje,
mii waylita niwre, ne laatoo jayŋol,
mii niɓɓina jayŋol bo, ŋol laatoo niwre.
Mii hawrita diyam maayo, mi waanja ɗam dow leydi.
Inne am woni Joomiraawo.
9Min nun accata halkere tawa semmiɗinɓe,
mii pusa biriniiji wanŋarɗe mawɗe.
10Onon himɓe Isira'iila,
oon banyi pelanɗo on der faadaare,
on jiɗaa batoowo gooŋa.
11Oon nyaama talkaaɓe semme,
oon teeta alkamaari maɓɓe.
Gam mum, on pukkataako der cuuɗi ɗi mahirɗon e kaaƴe booɗɗe,
on jarataa innabojam innabooje ɗe tigguɗon.
12Mii anni no boofi mon e ɗuuɗi,
hakkeeji mon e ɗuuɗi.
Oon nyaama gooŋaajo semme,
oon jaɓa ceede gam ɗawon gooŋaajo gooŋa mum,
oon diiwa talkaaɓe diga faadaare.
13Kan acci e wakkatiire iri nee ɗo, gooduɗo hakkillo e jeeɗoo,
gam ne laati nun wakkatiire hallune.
14Dartee waɗugo ko wooɗi,
accee waɗugo ko halli, gam keɓon buuron.
Den mum, min Alla Joomiraawo Joom huune fu mi wondan e mon,
hande no boowuɗon batugo.
15Banyee ko halli,
den jiɗon ko wooɗi.
Kokkee gooŋaajo gooŋa mum der faadaare,
den mum, waɗoto Alla Joomiraawo, Joom huune fu,
waɗana himɓe lenyol Yusufu horiiɓe moƴƴere.
16Gam majjum, nani ɗo ka Alla Joomiraawo Joom huune fu bati, wi'i:
Himɓe simoto der nokkuuje to himɓe hawritinta fu,
der laabi fu himɓe wi'an: Kayto! Kayto!
Remooɓe noddete jooɗoo maaydere,
waawuɓe bojji maaydere noddete simoo.
17Joomiraawo wi'i:
Baa der caka gese innabooje fu himɓe wullan,
to mii yawta caka mon.
Nyalaane Joomiraawo
18Bone tawan yiɗuɓe yi'ugo nyalaane kiita Joomiraawo!
Ume miiluɗon yi'ugo der nyalaane Joomiraawo nen?
Annee no ne laatataako nyalaane ne jayŋol, sey niwre.
19Ne laatoto hande neɗɗo doggoowo jaggere,
go fotti e tew ladde kalluŋu gom,
no o doggi o yottii wuro makko,
o happi bombooru, o naata suudu go boddi ŋati mo.
20Nyalaane Joomiraawo nen laataaki jayŋol,
ne laati nun niwre.
Ne laati nun niwre ɓaleere kurum, jayŋol walaa baa seɗɗa.
Juulde ne Alla yiɗaa
21Alla wi'i: Mii wanyi juulɗeeji mon, mi salake ɗi.
Mi yiɗaa du nanugo luunŋol hawriineeji mon.
22Baa to on gaɗanii am buuɗeteeɗi e dokke,
mi jaɓataa,
mi yiɗaa kiiseteeɗi gam potal himɓe ɗi gaɗiranton am e mareefuuji payuɗi.
23Boɗɗinee hannaare jimi mon diga to am.
Mi hettintaako rimmo moolooji mon.
24Amma accee foonnitaare ila hande diyam,
gooŋaaku bo laatoo hande gooruwol ŋol ɓettataa.
25Onon himɓe Isira'iila, der duuɓi lasoy ɗiɗi (40) ɗi gaɗuɗon der ladde yorne ɗin, oon meeɗi waɗango am kiiseteeɗi, naa bo waddango am dokke naa? 26Amma hanne, oon doonii nandi tooruuje ɗe gaɗanɗon ko'e mon. Kanje woni, Sikkutu, tooruure mon ne daaruɗon laamiiɗo mon, e hoodere ne caafoton, noddeteene Kiyuni.
27Gam majjum, mi accan wayɓe eggina on,
yaara on faa yeeso Damasi.
Min bi'eteeɗo Alla Joomiraawo, Joom huune fu nun bati ka.
Iliyochaguliwa sasa
Amosu 5: BFB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Bible Fulfulde Bénin © SIM International 2015, 2024.