VAROMA 8
8
Nkalamo he Mpehongwa
1Ikira, tehena mlaho he vala veho he Kristo Yesu. 2Ambu kiziomo cha Mpeho wa nkalamo ula eho he Kristo Yesu anikombola, nikatana na kiziomo cha mabanu na kifwa. 3Ambu vila vyeherire he viziomo kila vyegerirwe vusoka ni mwiri, Mrungu, he kumtuma Mwanawe mwenye he fwanyanyi ya mwiri wa mabanu, he vuntu vwa mabanu, akavija mabanu he mwiri; 4nesa maazero a myomongwa akoloshwe he uswi twesianga kimwiri, mira he vila vya kimpeho. 5Ambu vala veratera mwiri vedunganya vya kimwiri; mira vala veratera Mpeho vedunganya vya kimpeho. 6Ambu madunganyo a mwiri ni kifwa; mira madunganyo a mpeho ni nkalamo na mporere. 7Ambu madunganyo a mwiri ni vunzo he Mrungu, ambu teesikia viziomo vya Mrungu, neri teeidima kusikia. 8Vala veratera mwiri teveidima kumwizihija Mrungu. 9Mira kakicha Mpeho wa Mrungu etue he unyiwi, temuratera mwiri; mira muratera mpeho. Mira ula esina Mpeho wakwe Kristo, uo si wakwe. 10Kakicha Kristo eikaa he unywi, mwiri wenyu wafwa he vuntu vwa mabanu; mira mpeho wenyu ekalama vuntu vwa kitea. 11Mira, kakicha Mpeho wa ula emvushije Yesu he vefwie eikaa he unywi, ula emvushije Kristo Yesu he vefwie, enekalamija hata miri yenyu yefikiwa ni kifwa, kwa Mpeho wakwe ula eikaa he unywi.
12Ikira, kakicha ni huvo, vandughu, tu varando, si va mwiri nesa tuikae he kuratera vintu vya mwiri; 13ambu kakicha muikaia kuratera vintu vya mwiri, muenda kufwa; mira kakicha mwekikoma mihiro ya mwiri kwa Mpeho, munekalama.
Vana va Mrungu
14Ambu vose vetonjwa ni Mpeho wa Mrungu, avo nivo vana va Mrungu; 15kwa kuti temughuhie mpeho wa vuzoro eete fole, mira mweguhie mpeho wa kughoshwa vana, eye he uo tuitanga: “Aba, Vava.” 16Mpeho mwenye eteta vuonwa hamwe na mpeho wetu kuti, uswi tu vana va Mrungu; 17kakicha ra tu vana, tu vapali, verapala ha Mrungu, vepala hamwe ne Kristo; twekirishwa vwasi hamwe naye, ni iti tunakazwe hamwe naye.
Ngazo ila yeneza
18Ambu mavwasi a igheri ili niatara iti si kintu sa ila ngazo twenefunukurirwa. 19Ambu virumbe vyose navyo viteisha kianda na nkwina iti vana va Mrungu vafunukurwe. 20Ambu virumbe vyose navyo vyetekundiiwa kukondika; si he mikundire yavyo, esire he vuntu vwa ula evikundiie nesa vikete kiariro; 21ambu virumbe navyo vinekombolwa vifunywe kizoro cha kukondika, viingie he vukomboli, vifikie vwedi vwa vana va Mrungu. 22Ambu twemanyije iti virumbe vyose navyo viluluma hamwe, navyo vitarajwa hamwe mhaka iki. 23Neri sivyo du; mira hata uswi venye twerongeinkwa Mpeho, na uswi turadiha he ngoro jetu twekiinda kughoshwa vana, evwo vukomboli vwa mwiri wetu. 24Ambu twekijijwe kwa ikuji; mira ikuji lekinavoneka ilo si ikuji kangi. Ambu ni ani ekivika ikuji he kila ekivwene? 25Mira twekivika ikuji he kila twesikivwene, tukiinda kwa kugumirija.
26Nirehuvo Mpeho naye etughenja he vusoka vwetu, ambu tetumanyije kuomba sa vuntu chetutara; mira Mpeho mwenye etuombia kwa kululuma kwesiveteta. 27Na ula esaka ngoro emanyije madunganyo a Mpeho vuntu eikee, kila evasembia vezerire vuntu Mrungu ekunda. 28Na uswi twemanyije iti he vintu vyose Mrungu eronga vyedi hamwe na vala yemkunda, ni vala ekundie kuvaitanga too aho. 29Ambu vala evamanyije too kivoko, evasaghure to kivoko, vafwanyanywe na Mwana wakwe, nesa ya aoke wa nteruka he vandughu vajinki. 30Na vala evasaghure too kivoko nivo evaitange; na vala evaitange nivo evataririe kitea; na vala evataririe kitea, nivo evakazie.
Lukundo lwa Mrungu
31Iki tuti ze he ivyo? Kakicha Mrungu eimuke na uswi, ni ani enetuidima? 32Ye esimshighie Mwana wakwe mwenye, mira emwinkije he vuntu vwetu vose, eneshigha ze kutuinka vintu vyose hamwe nayye? 33Ni ani enevarengeha vala Mrungu evasaghure? Mrungu niye evatarira kitea. 34Ni ani enetulaha? Kristo Yesu niye efwie; yee, na kukela ivyo akavuka he vefwie, naye eho he mkono wa kume wa Mrungu, kangi niye etuombia. 35Ni ani enetutanya na lukundo lwakwe Kristo? H’ii! ni vwasi, kana ni vusovu, kana kuririeshwa, kana nza, kana sakaja, kana mpwasi, kana mhandwi? 36Sa vuntu cheandikwe, iti:
“He vuntu vwako tushinda komwa di,
Tutarwa sa magonji a kukomwa.” 37Mira he ivi vintu vyose, tuvota, na kwetu ni vuntu vwa ula etukundie. 38Ambu nakenja kumanya cha idi iti, neri kifwa, neri nkalamo, neri vamalaika, neri venye kifumwa, neri vila vyeho, neri vila vyeneza, neri venye nzinya, 39neri vyeho uko wanga, neri vyeho uko si, neri vingi vyovyose vyerumbiwe teviidima kunitanya na lukundo lwa Mrungu lweho he Kristo Yesu Mfumwa wetu.
Iliyochaguliwa sasa
VAROMA 8: CHSUNT67
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Chasu New Testament © Bible Society of Tanzania, 1967.
