NDIMA JA NTUME 28
28
Paulo uko Malta
1Twekinafike niho twemanya iti kila kirua kiitangwa Malta. 2Vala vakaa vakatuketia chedi kuvecha kiringanyo, ambu vefutie moto, vakatughuhia vose, vuntu vwa mvua yegwie na vuntu vwa mpeho. 3Paulo aho ekivunganyaa ifumba la nkwi, na kugera nzikweni, hakafuma nyoka vuntu vwa ndughuri ikamlusalusa he mkono. 4Vakaa vekivona ila nyoka yerengete he mkono, vakatiana, “Uu mntu hangi ni mkomi; nziaho ekiie he bahari, mpakanya teimshighia iti akie.” 5Mira ye akaikukunta he moto, neri tehgendie ze. 6Vo vakadunganya iti enevimba kana kugwa hala si na kufwa hala indi; vekinamrerehishe na kuvona iti teghendie ze neri, vakadunganya wa kivungi, vakati, “Uu ni mrungu.”
7Hafuhi na hala hantu hekina mighunda ya m’baha wa kila kirua, eitangwa Publio; uo mntu akatughuhia kwa ngoro ya vumbwie, akatughosha vagheni vakwe hantu ha misi mitatu. 8Vavee Publio neki muwaji wa isha na mtoroko wa sakame. Paulo akaingia hakwe, akatasa, akamvikia mikono yakwe, akam’banja. 9Icho chekinaoke huvo, vangi va kila kirua vekiwajwa, vakaza vakabajwa; 10navo vakatuvikia shima mbaha; kangi aho twekivuka vakatupakijija vila twekivienda.
Ntambo ya bahari icheritonga mhaka Roma
11Mieji mitatu yekivecha tukavuka na merikebu ya Aleksandria yekiho he kila kirua igheri la kiho; na luvengo lwayo ni Vandughu va Maza. 12Tukifika Sirakusa, tukaikaa misi mitatu. 13Twekivuka aho tukajunguluka tukafika Regio; msi mmwe wekivecha nkungu yefuma mondo wa ishi ikaakunta, na msi wa keri tukafika Puteoli. 14Tukakicha vandughu uko, vakatusemba tuikae havo misi mfungate; huvo tukafika Roma.
15Kufuma uko vandughu vekisikia mburi jetu, vakaza kutuzana, mhaka Apiiforo na Trestaberne. Paulo ekinavavone akashangalala, akamtogola Mrungu.
Paulo egaya na Vayuda uko Roma
16Twekifika uko Roma, akida akavainkija vose vechungiwe he mikono ya m’baha wa varinji va kichungo. Mira Paulo akakundijwa kuikaa hakwe mwenye, hamwe na msikari emrinda. 17Niho misi mitatu yekivecha, akatumija vabaha va Vayuda vazomane; vekinazomane akavati, “Vandughu vangu, nziaho siketie kintu chetekane na cha vantu vetu neri mburi yelwana na viziomo vya vavava vetu, nechungiwe uko Yerusalemu, na kuinkijwa he mikono ya varoma. 18Navo vekinanivwijevwije vakaenda kunichungua ambu tehena cho neketie chetara kukomwa. 19Mira Vayuda vekinakete nkani vuntu vwa iyo mburi, nikagungumija kuvecha na hakwe Kaisari. Si iti nekina mburi ya kuvasitaka vantu va mbari yangu. 20He vuntu vwa ivyo nemuitange iti muze kunirereha na kugaya nami; ambu nechungiwe na uu mnyororo vuntu vwa ikuji la Israeli.” 21Vala vakamti, “Uswi tetuvonie barua jefuma Yudea jeteta mburi jako, neri tehena mndughu ezie aha kutuukulila iyo mburi, kana kuteta kintu kivivi hewe. 22Mira tuenda kusikia hewe sa vuntu we wevona; ambu he mburi ya ilo itagwa, chemanyike hetu iti litetwa uvivi kila hantu.”
23Vekinachwiane kiaze, vantu vajinki vakamzia he nyumba yakwe. Akavahererejija kwa kuvatiana, ekitetia vufumwa vwa Mrungu vuonwa, na kuvamanyisha mburi jakwe Yesu, he viteto vyo myomo yakwe Mose na vya varoti, kuvokia chaheyavo mhaka chahemagheri. 24Va kumwe vakaitikija vila viteto, vangi teveitikije. 25Vekinaremane vo venye na venye, vakatonga, Paulo ekikenja kuteta kiteto iki kimwe, kuti, “Mpeho Wedi etetie nezo na vavava vetu, he momo wa mroti Yesaya, 26ekiti,
‘Tongani he vantu ava, uvati:
Kisikia munesikia, mira temukatwarije;
Kurereha munerereha, mira temukavone.
27Ambu ngoro ja ava vantu jagirisima,
Na masikio avo teesikia nezo,
Na meso avo veshinjije;
Nesa vasirevona kwa meso avo,
Vakasikia na masikio avo,
Vakatwarija na ngoro javo,
Vakagharuka, nikavakija.’”
28Huvo nakimanyike he unywi iti ulu lukio lwa Mrungu lwatonjwa he Vakiisanga, navo venesikia! [ 29Ekikenja kuteta huvo, Vayuda vakatonga, vekivwijana vijinki vo venye na venye.]
Msirikijo
30Akaikaa miaka miri mionzi he ila nyumba yakwe epangie, akavaghuhia vose vekimswia, 31ekibirikira mburi ya vufumwa vwa Mrungu, na kucheja mburi ja Mfumwa Yesu Karisto, kwa ndekero nyingi, hesina mntu emsuja.
Iliyochaguliwa sasa
NDIMA JA NTUME 28: CHSUNT67
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Chasu New Testament © Bible Society of Tanzania, 1967.
