NDIMA JA NTUME 26
26
Paulo ekukania he Agripa
(Ntum. 9:1-19; 22:6-16)
1Agripa akamti Paulo, “Wakundijwa kuteta mburi jako. Niho Paulo akaronga mkono wakwe, akakukania: 2“We Mfumwa Agripa, nisikia chuu he ngoro yangu kila nakundijwa kukukania yoo mozya hewe, he jila mburi jose Vayuda venisitike. 3Kila we wemanyije nezo misimo na nkani jose ja Vayuda; heicho nikusemba unisikije kwa kunigumirijija.
4“Ambu Vayuda vose vemanyije miikarire yangu too vudori vwangu, sa vuntu yeokie too kuvoka he mbari yangu uko Yerusalemu, 5ambu venimanyije nezo too kivoko, kakicha vekunda kuteta vuonwa, iti neki Mfarisayo, kwa kuraterija itagwa lekonesha nezo mitasire yetu. 6Na iki neimuke aha kulahwa vuntu vwa ikuji la kiravo vavava vetu veinkiwe ni Mrungu, 7echo mbari jetu ikumi na mbiri jeindie kukifikia, vekikudoka kumtasa Mrungu na nzinya msi na kio. Mfumwa, vuntu vwa ilo ikuji nicho cheshigha nesitakwa ni Vayuda. 8Hanini iyo mburi iti Mrungu evusha vefwie he unywi yekisaitikijwa? 9Kididi mi mwenye nekikuvonie iti kinitara kuhira vintu vijinki vyekindija izina lakwe Yesu Mnazareti; 10nami nikaketa huvo uko Yerusalemu; vezerire vajinki nikavagera he kichungo, hala nekinainkwe nzinya ni vatasi vabaha; na aho vekikomwa nikakizumira. 11Uko he sinagogi jose nikavabigha kantu kajinki, nikavatitikija vafalaje; nikavasikiwa oro sa nena luhungu, na kuvarieriesha mhaka he mizi ya kigheni.
12“Huvo, he iyo ndima, aho nekizoka uko Damasko neinkiwe nzinya na maazero a vabaha va vatasi, 13Oe Mfumwa, igheri la he msi kilungulungu neho nzieni, nikavona kianga chefuma uko wanga chekelile kianga cha izuva, kikaniangaja myondo yose hamwe na vala vekina nami. 14Tukagwa hala si vose, nikasikia izii leteta nami he kitetire cha Kiebrania, ‘Sauli! Sauli! hanini wenirieriesha? Ni kizinya hewe kumpasa lusiki.’ 15Nami nikati, ‘Niwe ani Mfumwa?’ Mfumwa akaniti, ‘Nimi Yesu, eye we wenirieriesha. 16Mira vuka, imuka na maghu ako, ambu nicho cheshigha nekikufumia iti nikughoshe mndima na muonwa wa vila wenivoniie hevyo, na wa vila wenerefunukurirwa, 17nekikukania we he vantu vako, na he Vakiisanga evo nenekutuma hevo. 18Uvatambaruje meso avo, na kuvagharusha vatane na kija vapitukie kianga, vavuke he nzinya jakwe Shetani na kumzia Mrungu; nesa vainkwe kushighiwa mabanu avo, na vupali vweho he vala vezerijwe kwa mwitikijo weho hemi.’
19“Oe Mfumwa Agripa, nicho cheshigha nesiberire vila vya uko wanga nevonyeshwe kimpeho; 20mira nikavoka kubirikira vala va Damasko na Yerusalemu, na he isanga lose la Yudea, na he Vakiisanga, iti vachwe mti na kumgharukia Mrungu, vekironga vyeteghane na kuchwa mti kwavo. 21He vuntu vwa ivyo Vayuda vakanigura neho he nyumba ya mtaso, vakaghesha kunikoma. 22Kila nevonie lughenjo kufuma ha Mrungu, neimuke aha yoo ili nekiteta vuonwa he vadori na he vabaha, neri siteta kintu esire vila varoti ne Mose vekivitetie, iti vineoka; 23iti Kristo kimtara kurishwa vwasi, na iti ye kwa kurongavushwa he vefwie enebirikira mburi ya kianga he vantu vakwe na he Vakiisanga.”
24Erecheri ekukania huvo, Festo akateta izii ibaha, “Paulo, una luhungu, kusoma kwako kungi kwakukonda mtwi.” 25Mira Paulo akati, “Oe Mrashimiwa Festo, sina luhungu, mira niteta viteto vya idi kangi vya icha lekoloke. 26Ambu mfumwa emanyije iji mburi, nami niidima kuteta naye kwa ndekero; ambu mburi ijo tejiketike mondo. 27Mfumwa Agripa, h’ii! wevaitikije varoti? Nemanyije iti wevaitikije.” 28Agripa akamti Paulo, “He kakenda kafuhi uenda kunighosha Mkristo.” 29Paulo akamgharusha, “Nimwomba Mrungu iti, na ere he vighere kana vijinki, sirewe du mira hata vala vose venisikija yoo vaoke sami, esire ii minyororo.” 30Mfumwa na ula mlao ne Bernike na vala veikae si navo, vakaimuka; 31vekikenja kuvuka, vakatiana, vekiti, “Uu mntu tena kivivi eketa chetara kukomwa kana kuchungwa.” 32Agripa akamti Festo, “Nanga uu mntu tekilangie kuvecha hakwe Kaisari, ekichunguwa.”
Iliyochaguliwa sasa
NDIMA JA NTUME 26: CHSUNT67
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Chasu New Testament © Bible Society of Tanzania, 1967.
