Romanos 7
7
Ja ya'n teytik sok ja Jesusi
1Jmoj aljel jumasa, ja we'nlexi waxa na'awex lek ja jas wax yala ja smandar ja Moisesi, sok waxa na' awex kechan ja oj k'u'uktik ya yajni sak'anotikto. 2K'elawilex jun ixuk nupaneli, ye'nani che'umal yuj ja statama ja yajni sak'anto. Ta wan k'ax cham ja statam ja ixuk jawi, ja ye'n wanix kan libre'a. 3Ta wan k'ax waj sok pilan winik ja yajni sak'anto ja statami, wani sch'ika sb'aj mulal ja ixuk jawa, ta wan k'ax cham ja statami, ja ye'n wanix el ja b'a mandar jawa, oj b'ob' nupanuk pilan majke, mini oj sta smula.
4Jach' mismo ja we'nlex jmoj aljel jumasa. Yuj ja cham ja Jesusi, ja'yuj ja we'nlexi mixa ti ayukex b'a yib' sk'ab' ja mandar it a'ji yi ja Moisesi. Ja ya'n sb'ajexani ye'n ja Jesús ja it ma aji sak'wuk yuj ja Dyosi. B'a oj b'ob' ka'teltatik ja Dyosi, lek oj k'u'luktik b'a spetsanil k'ak'u. 5Ja yajni mila k'okxitik ajyi sok ja b'a mi lekuk wax k'u'lantiki, lajan sok yuj wax yala ja mandar it a'ji yi ja Moises la jk'u'luktik ja jas mi lekuki. Ja'yuj spetsanil ja jas wax k'u'lantik ajyi, wax ya jpil jb'ajtik sok ja Dyosi. 6Ja ya'n ja mandar jawi, mixax b'ob' sk'u'ltik. Lajan sok chamelotikxa. Eltikta libre, b'a oj b'ob' jtoytik ja sb'i'il ja Dyos jastal wax k'anatiki, mixa jachukuk oj k'u'ltik jastal wax k'u'lantik ajyi sok ja poko mandari, ja ya'n ja'xa oj k'u'uktik ja jas wax yala ja Espiritu Santo.
Jel ajulaj jb'ajtik yuj ja mulali
7¿Ja iti, yuj a ma wa sk'ana yal yuj mi lekuk ja mandar it a'ji yi ja Moises b'a? —Miyuk— Lek mokxta ja'uk yuj ja mandar jawi, ja ke'n mi oj jak jk'ujol jasunk'a jun mulala. Merani'a, ja lek mokxta jach' wax yala jastal it ja smandari: —Mok a ok' a k'ujolex ja jastik ay yi'oj ja wa mojexi, ja ke'n mi oj na' ta mi lekuk ja jawi. 8Lek mokxta ja'uk yuj ja mandari, ja mulali mini jun yip aya. Ja'yuj ja mulali, ja makuni yuj ja mandar jawi, b'a ya ok' jk'ujol oj jle spetsanil tik'e mulali.
9Ja yora mitox na'a ja smandar ja Dyosi, jel gusto ayon; Jaxa yajni jna'a ja mandar iti, ti jna'a ke jun niwan mulanumona 10Cho jach'ni, najat ayon sok ja Dyosi. Jach' waj jastal jaw ja mandari, sb'aj nike oj ya'ki jun jsak'anil b'a mini nunka oj ch'akuk, b'a'ya, kechan yi'ajon och b'a chamel ch'akel. 11Ja mulali, ja makuni yuj ja mandar b'a oj slo'layoni, sok ja mismo mandar jaw ja ya wajkon mas najat ja b'a sti sat ja Dyosi.
12Ta yuj k'a jachuk oj kaltik ja smandari ye'n sjeka ja Dyosi, sok spetsanil ja jas wax yala jelni ni leka, sok tojni'a. 13Sok ja iti, mi wanukon yaljel ke mandari b'a leki, ye'n yi'ajon b'a jch'ayelal. —Miyuk, ja ma sk'u'lan ki jachuki, ja' mulali, yuj ja makuni yuj ja mandar b'a leki. Jachuk yuj ja mandar b'a leki, jpetsaniltik oj b'ob' jna'tik jasunk'a smeranil b'a mi lekuki sok ja niwak mulal jumasa. 14Ja ke'ntiki, wanix na'atik ja mandar sb'ajni Dyosi; Jaxa ke'n yuj ja jun winikoni, ja'yuj mix b'ob' kuj b'a oj kal mi oj k'u'luk ja jas mi lekuki wax jak k'ujol oj k'u'luki. Yuj ja moso ayon yuj ja mulali. 15Ja smeranili, yuj mix na'a ja jastal sb'ej ja jas wax k'u'lani, ja yajni wax k'ana oj k'u'luk ja b'a leki, ja wax k'u'lan ja b'a mi lekuki, b'a mix k'ana oj k'u'luki. 16A'nima wax k'u'lan ja jas mix k'ana oj k'uluki, sok wanix na'a lek ja smandara. 17Ja'yuj mi ke'nukon ja ma wax k'u'lan b'a mi lekuki. Ja'ni ja mulal it tey jmoki. 18Wax na'a ja jas wa sk'ana ja jkwerpo, ye'ni mi sk'ana oj k'u'luk ja b'a leka. A'nima wax k'ana oj k'uluk, mini xb'ob' jk'uluka. 19Ja yajni wax k'ana oj k'uluk ja b'a leki, ja wax k'u'lan ja b'a mi lekuk mix k'ana oj k'uluki. 20Ta yuj k'a ja' wax k'u'lan ja jas mix k'ana oj k'uluki, ja smeranili mi ke'nuk wax k'u'lan, ja wa sk'u'lan ja mulal it tey jmoki.
21Jna'ata, a'nima wax k'ana oj k'u'luk ja b'a leki, kechan ja wax b'ob' jk'uluk ja b'a mi lekuki. 22Ja b'a kaltsili, wax yajta ja smandar ja Dyosi. 23-25Ay jun kosa wax kab'i: ay ma wa'n tiro'anel sok ja kaltsili, ja jas wax na'a leki. Wax k'ana oj k'u'uk ja smandar ja Dyosi, wax kab'i lajan sok lutanon, kechan mi wokoluk xkab' sle'jel ja mulala. Ja smeranili, wanikex k'ana oj k'u'uk ja smandar ja Dyosi, mix b'ob' kuj, b'a mi oj le' ja jmuli, yuj ja mey yip ja jkwerpo b'a oj sk'u'uki. —Ajula jb'aj ja ke'n. ¿Ma oj ya elkon ja b'a sk'ab ja jkwerpo it wax ya jle' ja jmuli, sok wax ya jpil b'aj sok ja Dyosi? —Wax ka'yi ts'akatal ja Dyos, yuj ja wax na'a ke ye'n ja Kajwaltik Jesús ya elkon ja b'a sk'ab'i.
Iliyochaguliwa sasa
Romanos 7: YABD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Sociedad Bíblica de México 2021
