Romanos 16
16
Ja spatulab'il k'ujolal sjeka ja Pablo
1Ay ki'oj jitsan kosa tsamal wax k'ana oj kal a wabyex yuj ja Febe. Yuj ja ye'n ay ya'tel sok ja jmoj aljeltik b'a sti' ja' b'a Cencreasi, 2sok yuj ja ya'oj sb'aj b'a ya'tel ja Kajwaltik Jesusi, ja'yuj i'ajik lek jastalni ja sb'ej oj i'xuk lek spetsanil ja yuntikil jumasa ja Dyosi. Koltayik sok spetsanil ja jas mey yi'oj b'a oj makunuk yuji, yuj ja ye'n jel jitsan ja ma skoltuneji, cho skoltayoni ja ke'n.
3Wax jeka spatulab'il sk'ujol ja Priscila sok ja Aquila, yuj ja a'tiji ye jmok b'a ya'teltajel ja Kajwaltik Jesusi. 4Yuj ja skoltayone'i, ja'yuj ye'n ya'a sb'aje a'nima tix miljiye'a, ja'yuj jel wax k'ana yi'e ts'akatal, cho jach'ni ja jmoj aljeltik jumasa ma mi judio'uki. 5Ti'xa walwex yab' ja spatulab'il sk'ujole' ja jmoj aljeltik jumasa ma wa stsomo sb'aje b'a snaj ja Priscila sok ja Aquila.
Alawik yab' oj koltanuk ja kamigo Epeneto sb'a chonab' Asia, yuj ja ye'n b'ajtan sk'u'an ja Kajwaltik Jesús skoltanumi.
6Alawik yab' a koltanuk ja Maria, yuj ja jelxa a'tijita amokexi. 7Alawik yab' a koltanuke ja Andronico sok ja Junia, yuj ja jmoj judio'ile'i. Lajan ti ajyitikon lutan b'a preso. Ja ye'nle'i, jekab'anume, na'ub'al lek sb'aje, b'ajtan sk'u'ane ja Kajwaltik Jesús ja ye'nle yuj ja ke'n.
8Alawik yab' a koltanuk ja Ampliato, yuj ja ts'akatal ja Kajwaltik Jesusi, jel lek xkila b'aj sok ja winik jawi.
9Alawik yab' a koltanuk ja Urbano, ja ye'n jun jmoj a'tel b'a ya'tel ja Kajwaltik Jesusi, cho jach'ni ja ma jel lek kila b'aj sok ja Estaquisi.
10Alawik yab' a koltanuk ja Apelesi, yuj ja jitsan majke wa sje'a toj ay sok ja Kajwaltik Jesusi. Cho alawik yab' a koltanuke spetsanil ja swinkil snaj ja Aristobulo. 11Cho jach'ni ja Herodion jmoj Judio'ili, sok ja swinkil snaj ja Narciso, yuj ja jel wa sk'u'ane ja Dyosi.
12Alawik yab' a koltanuk ja Trifena sok ja Trifosa, yuj ja ti wa'ne ya'teltajel ja Dyosi. Alawik yab' a koltanuk ja ma' lek wax kila b'aj sok ja Perside, cho jach'ni ja ye'n jel ya'telta ja Dyosi.
13Wax jeka spatulab'il sk'ujol ja Rufo, ja ye'n jun lekil ya'tijum ja Kajwaltik Jesusi, cho jach'ni ja snan yuj ja jach' yilawon jastal yali.
14Alawik yab' a koltanuke ja Asincrito, ja Flegonte, ja Hermesi, ja Patrobasi, ja Hermasi, sok spetsanil ja jmoj aljeltik jumasa ma' tey soke'i. 15Alawik yab' a koltanuk ja Filologo, ja Julia, ja Nereo sok ja swatsi, ja Olimpasi sok spetsanil ja jmoj aljeltik jumasa ma' tey soke'i.
16Jachuk ja we'nlexi, tsamal lek a'a b'ajik dyos. B'a spetsanil ja jmoj aljeltik jumasa, wa sjeka spatulab'il a k'ujolex.
Wax yala jastal k'ot tik'an ja jas ts'ijb'anub'ali
17Jmoj aljel jumasa, wax k'ana a wi'ex pavor k'elawik lek ja ma wax ya k'e ab'al k'umal sok ja jmoj aljeltik jumasa. Ja ye'nle'i, mini t'un wax yi'aje lek spetsanil ja jas ch'akta je'xuk awi'ex ja we'nlexi. Pila b'ajik sok ja ye'nle ja jaw jumasa, 18Jas yuj ja ye'nle'i mi sk'ana oj ya'teltaye ja Kajwaltik Jesusi, jayuj ja kechan ja wajel sk'ujole jastal lek oj ajyuke ja ye'nle'i. Jel tsamal ja jastal wax lo'laniye sok ja kristyano jumasa, ja smeranili, mas lek wax yabye ja le'uj ab'ali, wa slo'laye ja ma mix yabye sb'eji.
19Spetsanil ja swinkil ja lu'um iti, wa sna'a ke waxa k'u'anex ja Dyos ja we'nlexi, sok ja jawi jel wax ya' gusto'axukon ja ke'n. Wax k'ana oj a je'ex ja jas lek waxa na'awexi, mi ja'uk oj a je'ex ja jas mi lek waxa k'u'lanexi. 20Jachuk ja Dyos it ye'n wax ya'wotik lamani, jelxa mojan oj sk'ul ganar ja tan pukuji, jach'ni ja we'nlexi oj ya'a k'ulukex ganar. —Jaxa Kajwaltik Jesusi mi oj ya'kan sje'jel a wi'ex ja syajal sk'ujol a mokexi—
21Wa sjeka jitsan spatulab'il a k'ujolex, ja Timoteo yuj ja ti wax a'tiji jmoki. Cho jach'ni wa sjeka jitsan spatulab'il a k'ujolex ja Lucio, ja Jason sok ja Sosipatro, ja ye'nle'i, jmoje judio'il.
22-24Wa sjeka spatulab'il a k'ujol ja Gayo ja ma' ti' yi'ojon b'a snaji, cho ti'ni wa stsomo sb'aje tiw ja jmoj aljeltik jumasa. Cho wani sjeka spatulab'il a k'ujolex ja Erasto ye'n wa snolo ja tak'in b'a wax tsomxi b'a chonab'i, cho jach'ni ja jmoj aljeltik Cuarto.
Jach'ni ja ke'n wax cho jeka spatulab'il a k'ujolex sok ja syajal sk'ujol ja Kajwaltik Jesusi. Ja jb'i'ili Tercio, ye'n yal kab' ja Pablo jastal oj ts'ijb'a ja ju'un iti.
K'umaxi ja Dyos ja yajni ch'ak sts'ijb'ajel ja ju'un iti
25Ja Dyosi, oj b'ob' ya ajyanik toj ja janek' ay a sak'anilex sok ja Kajwaltik Jesusi, —La jtoytik lek ja Dyosi— Jach'ni kala wab' ja yora jcholoawi' ja tsamal ab'ali, cho ta'ani a wi ti' ja Kajwaltik Jesusi. Ja iti, nakani lek wajum sok ja jas wa sk'ana ja Dyos it ya jna'tiki, ja yajni mitox kujlaji ja satk'inali, nak'an musani ay ajyi'a. 26Ja ya'n wanxax na'atik ja jas wa sk'ana ja Dyos yuj ja jas sts'ijb'aye kan ja aluman Dyos jumasa. Mi kechanuka, ja Dyos it spetsanil k'ak'u sak'ani, jach'ni yala'a, b'a jach' oj sk'u'uke spetsanil ja swinkil ja lu'um ja Kajwaltik Jesusi.
27Ja ya'n, yuj ja Kajwaltik Jesusi, spetsanil k'ak'u la jtoytik ja Dyos it jel sna'a. —Jach'ni'a.
Iliyochaguliwa sasa
Romanos 16: YABD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Sociedad Bíblica de México 2021
