2 Corintios 11
11
Ja Pablo sok ja ma wa stoyo sb'aji
1Ts'akatalukexa, k'ulanik awantar ja jmodo, a'nima waxa wilawex lajan sok loko ayon. 2Ja Dyosi, wax yala oj cham jk'ujol yuj ja we'nlexi. Ja wax k'ana ja ke'n toj ajyanik spetsanil k'ak'u sok Kajwaltik Jesusi, jastal wax kala jach' oj ajyanik jastal jun ak'ix b'a yalata ojxa nupanuk, cho tojni ay sok ja smakb'en winika, sok jach'ni oj stalna lek sb'aja. 3Pero wani la xiwyona lek jach' xwaj ek'anik jastal lo'laji ja Eva yuj ja tan chani. Jachuk ja we'nlexi, oj b'ob' lo'lajananik ay modo oj a wa'wex kan jun lado spensarajel ja jas toj sok ja jas tsamal sb'a Kajwaltik Jesusi. 4Ja we'nlexi, waxa wi'ajex lek spetsanil ja ma wax jak yal a wabyex otro Jesús yuj ja it ke'n kalatikon a wabyexi. Wax cho a wi'ajex lek ja ma wax jak yala a wabyex pilan espiritu yuj ja Espiritu Santo it a wi'ojexi, sok waxa wi'ajex lek ja tuk jastal wax alji a wabyex ja yab'al ja Dyos yuj ja jastal ak'u'anexta. 5Ja ke'n mi yuj mas ko'elukon yuj ja ma'tik tsa'an jaki, jaxa ye'nle'i, wa sje'a sb'aje jun niwak sjekab'anume ja Kajwaltik Jesusi. 6Ja ke'n a'nima mi jel lek la k'umaniyon jastal ja ye'nle'i, mas wax na'a ja ke'n yuj ja ye'nle'a, ja iti, mi kechanuk jun majke je'unej a wi'ex.
7¿Jasunk'a jmul jta'a b'a? Ja jk'u'lan ja ke'n kechan waj kala a wabyex ja tsamal yab'al ja Dyosi sok mex k'ana oj ja tupunex; Ja jawi, mi t'ilanuk kila kechan kala wabyex ja yab'al ja Dyosi, 8b'a jach' b'ob' ka'teltayex sok b'ob'ni cho jkoltayexa, a'jiki t'usan tak'in sok tuk jmoj aljeltik jumasa. 9Ja yora ti ajyiyon a mokex ja we'nlexi, ayni ja sk'u'lan kuj palta'a, pero mini b'a jas jk'ana a wi'ex b'a oj a koltayonexa. Ja jmoj aljeltik jumasa b'a chonab' jumasa b'a Masedonia ye'n k'otye b'a ya'weki ja jas wax makuni kuji. Ja ke'n jle'a jastal mi oj ka chamuk a k'ujolex, sok jach'ni oj k'u'luk a mokexa. 10Jastal wax na'a lek ja smeranil sok ja Kajwaltik Jesusi, cho jach'ni lek ayon sok ja chonab' jumasa b'a Acaya, mi jun ma oj b'ob' ya elki ja jastal jel lek ayoni. 11Mi wanukon yaljel yuj mix k'anawex. —Ja Dyosi, wani sna'a ke jel wax k'anawexa.
12-13Jastalni wa'non a'tel a mokexi, jach'ni oj k'uluka, mi jas tak'in oj jk'an a wi'ex. B'a jach' mi oj b'ob' ya' sb'aje niwan ja ma'tik wa stoyo sb'aje ke aluman Dyose wa'ne slo'lajel ek' ja kristyano jumasa wax yalawe sjekab'anum aye yuj ja Kajwaltik Jesusi, jach' wax ya'teltaye ja Dyos jastal wax ka'teltatikon ja ke'ntikoni. 14Mini tukuke'a. —Jachuk ja tan pukuji wa sje'a sb'aj jastal jun anjel wa'n lijpel, 15Cho jach'ni ja ya'tijum jumasa, wa sje'a sb'aje jastal kristyano jel lek ja jas wa sk'u'lan'e'i— Jaxa yajnix waj k'ot tik'an ja k'ak'u, ojni a'ji stup ja smule ja jastalni ja sb'eji oj stup'e yuj ja jas sk'u'lane'i.
Ja Pablo jel yi'aj wokol yuj ja lom jekab'anum ayi
16Oj cho kal a wabyex otro bwelta: Mix k'ana oj a wa'wex ochkon loko'il. Lek yuj jachukukoni jastal jawi i'ajonik lek, b'a jach' oj b'ob' gusto'axukon t'usana. 17Ay jas wax k'ana oj kal a wabyex, mi ja'uk b'a sb'aj ja Dyosi, wax na'a lek ta yuj k'a ke'n oj jtoy b'aji, ja jawi, loko'il ni'a, 18Yuj ja jelxani ja ma'tik wa'n stoyjel sb'aji, ¿Jasyuj ja mi oj cho jk'u'luk ja ke'ni? 19—Jaxa we'nlexi, jelxa na'awex, jel gusto waxa wi'ajex ja jastal ja ma'tik loko aye'i— 20—Wax kuch a wujilex ja ma' wax yilawex jastal ya'tijumexi, sok wax yi'aje lom wa wa'telex ja ma'tik wa slo'layexi, ja ma'tik wax yutajexi, sok ja ma'tik wa smak'a ja wa chojexi—
21Wala k'ixwiyon ja oj kal a wabyexi, ja ke'ntikoni mix k'ana jach' oj kil'extikon jastal jawi. Pilan ja ma'tik jel wa stoyo sb'aje'i, ja'yuj ja ke'n ojni cho jk'u'luka, a'nima loko'iluk ja jastal jawi. 22Yuj k'a hebreo ja ye'nle'i, jach'ni ja ke'n hebreo'on. ¿Ma yuj israelenio'e? Jach'ni ja ke'n israelenio'on. ¿Ma yuj ja yintile ja Abrahami? Cho jach'ni ja ke'n yi'ntilon ja Abrahami. 23¿Yuj a ma ya'tijume Kajwaltik Jesusi? yuj k'a jach' jastal jawi, mas wa'non ya'teltajel ja ke'n yuj ja ye'nle'a, jel jitsan k'ak'u lutjiyon ja ke'n yuj ja ye'nle'i, mas jel jitsan bwelta mak'ji yon ja ke'n yuj ja ye'nle'i, jitsan bwelta t'usan mi miljiyon ja ke'n yuj ja ye'nle'i. 24Jo'e bwelta, smak'awone ja ma'tik ay ya'tel yuj ja judio jumasa, junxta ko'ele ja mi ya'weki ja b'a chab' tajb'e ko'ele ts'u'umi. 25Jaxa ma'tik ay ya'tel b'a Roma ox majke sb'its'awone vara. Jun majke sch'ojowone ton. Ox majke mukxiko yoj ja' ja barco b'a wajumon soki. Ja k'ak'u jawi, jun a'kwal sok jun k'ak'u ti ajyiyon b'a yoj scha'anil ja', man skoltayone ti'to elyona. 26Jelxa b'ejyiyonta ek'e. Ay b'a jk'utsu niwak ja' b'a t'usan mi ti chamyon kana, ay b'a t'usan mi ch'ak elk'ajuki ja jas jb'aji, jel xiwela sb'aj ja swinkil ja chonab' jumasa cho jach'ni sok ja ma' jakel tuk chonab'i, b'a wits jumasa, b'a niwan paman ja'i, sok ja jmoj aljeltik jumasa ma lom ita wax yala wa sk'u'ane ja Dyosi. 27Jelxa a'tijiyonta sok jelxa ki'ajta ja wokol jumasa. Jitsan a'kwal mila wayon. Jitsan bwelta jtek'a wa'in sok takin ti', jitsan bwelta jtek'a che'e.
28A'nima jach' ch'ak ek' kuj spetsanil ja wokol jumasa iti, ti'ni cho wa'non cham jk'ujol yuj spetsanil ja jmoj aljeltik jumasa'a. 29Wala malo axiyon ja ke'n ja yajni wax kila ay ma' malo ayi, wala k'ixwiyon, sok wala tajkiyon ja yajni wax kila ay ma wax ya' sle' smul ja tuk jumasa.
30Ta ay k'a b'a wax toyo jb'aja ja'yuj ja jel ko'eloni. 31Ja Dyos ja sTat ja Kajwaltik Jesusi, sb'ejni lek oj toyxuka, wa sna'a lek mi wa'nukon le'uj ab'al. 32Ja yajni ti ajyiyon b'a Damasco, ja mandaranum it ye'n a'ji och ya'tel yuj ja mandaranum Aretasi, ya och talnuman b'a chonab' b'a oj syam'one'i. 33Pero b'ob'ni elkona, ay ma skoltayon ya ochkon b'a jun mo'och, ti ya'we elkon b'a jun sbentana'il ja cha'nil sts'akab'il smakb'al ja chonab'i, jach' elyon b'a sk'ab' ja ye'nle'i.
Iliyochaguliwa sasa
2 Corintios 11: YABD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Sociedad Bíblica de México 2021