2 Corintios 10
10
Ja Dyosi ya' yi yip ja Pablo
1-2Wax yalawe mi b'i la k'umaniyon ja ora ti ayon a mokexi, jaxa yajni najat ayoni jel tsats wax ka'a jb'aj. Wax k'ana a wi'ex pavor sok ja syajal sk'ujol ja Kajwaltik Jesusi, ja yajnix waj kil'exi, mok a t'en'onex b'a ay jas oj kal yab' ja ma wax sle' ja mulali. Ja ye'nle'i wax yalawe wa'ntik sk'u'lajel ja a'teli, yuj ay ja swa'n ok'el jk'ujoltik, jastal wa sk'u'lan ja kristyano jumasa b'a lu'um iti. 3Ja smeranili, ti'ni aytik b'a lu'um ita, mi jach' wax k'u'lantik jastal wa sk'u'lan ja kristyano jumasa b'a lu'um iti, 4Jasyuj ja ke'ntiki, mi ja'uk wax makuni kujtik ja tujk'anub' jumasa b'a lu'um iti. Ja ke'ntiki, ja wax makuni kujtik ja yip ja Dyos b'a wax ch'akatik ja yip ja jastik jumasa b'a mi lekuki, sok ja tantik lokwanum ab'al jumasa 5sok ja ma wa stoyo sb'a ke oj stim'e ja lom wax yabye ke jpetsaniltik wax k'ana oj na'tik sb'aj ja Dyosi. Sok ja yip ja Dyosi, wanix b'ob' ya stukb'es ja jastal ja mulanum jumasa, sok oj sk'u'uke ja Kajwaltik Jesusi. 6Ja ke'ntikoni chapan aytikon b'a oj ka'tikon stup ja ma mi oj sk'u'uk ja Kajwaltik Jesusi, ti oj tultikon sok b'a we'nlex man oj k'otuk ja k'ak'u oj ch'ak a k'u'ukex a petsanilex.
7Ja we'nlexi, kechan ja waxa k'u'anex ja jas wax b'ob' a wilawexi. Jaxa ma' waxa na'awex ti'xa ayex sok ja Kajwaltik Jesusi, cho jach'ni ja ke'n wax k'ana oj kal a wabyex, cho ti'ni ayon ja ke'n. 8A'nima wala jelxiyon t'usan ja b'a ka'teli, minix ya'ki k'ixwela. Jasyuj ye'n yala kab' ja Kajwaltik Jesús jas oj kal a wabyex b'a oj koltayex jastal oj a k'u'ukex ja Ye'n, sok mi sb'a oj ch'ayjuk a na'jelex. 9Mix k'ana oj ja pensarukex, yuj wax k'ana oj xiwtayex sok ja ju'un wax ts'ijb'a a wi'exi. 10Ay chab' oxe ma wax yala ja ju'un waxa ts'ijb'a jel tsats ja jas wax yala, jaxa yajni ke'n wa'non k'umali jel b'i ko'el wax ka'a jb'aj, sok mi b'ix na'a lek k'umal cho mini ma' xkila ch'in. 11Ja jaw jumasa jel t'ilan oj yabye sb'ej ja yajnix waj kulatayexi, jach' tsats oj lo'lanukon a mokex ja jastal wala k'umaniyon ja b'a ju'un it jts'ijb'a a wi'ex ja yajni najat ayon amokexi.
12Ja ke'n mini oj laj ja ma ye'n ita wa stoyo sb'aji. Ja ma' ye'n ita wa stoyo sb'aji ja jawi, sonso'il. 13Cho mi sb'ejuk ke'n niwan oj ka' jb'aj sok ja jas me' xk'u'lani. Ta ay k'a ay ja oj ya gusto'axukon ja'yuj ja a'tel b'a yaloj kab' ja Dyos oj k'u'luki. —Sok jach'ni ja we'nlexi, sb'ej ti oj a'tijananik tiwi. 14Mi sb'ejuk oj je' jb'aj ke jel wax na'a sok ja b'a mi sb'ejuk oj k'u'luki, ke'nani b'ajtan k'otyon ja b'a Corinto b'a kala ja tsamal yab'al ja Kajwaltik Jesusi. 15Cho mini sb'ejuk ke'n niwan oj ka' jb'aj sok ja a'tel jumasa ma'tik pilan sk'uluneji. Wax majla oj b'ob' a'tijukon lek sok ja we'nlexi, ja'ni chikan jastal oj niwanb'uk ja sniwanil wa k'ujolex sok ja Dyosi. Ja jastal jawi, ja'ni k'elan jsat ja b'a ka'tela. 16Cho jach'ni jel gusto oj kal ek' ja tsamal yab'al ja Dyos b'a chonab' jumasa b'a najat ay yuj ja Corinto, ja'ni b'a chonab' jumasa b'a mito ma wax yala ja yab'al ja Dyosi, b'a jach' mi ma' ti oj yal ke pilan ma' ya'tel ja wa'non stoyjel jb'aj soki.
17Ja b'a st'ijb'anub'al ja yab'al ja Dyosi, jach' wax yala jastal iti: —Ta ay k'a ma wa sk'ana ay jas gusto oj ajyuk sok, mas lek a ajyuk gusto yuj ja wa'n sk'u'ajel ja Kajwaltiki. 18Ja ma sb'ej oj toyxuki, mi ja'uk ja ma ye'n ita wa stoyo sb'aji, ja sb'eji, ja' oj toyxuk ja ma wa stoyo ja Kajwaltiki.
Iliyochaguliwa sasa
2 Corintios 10: YABD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Sociedad Bíblica de México 2021