1 Corintios 11
11
Ja jastal oj k'u'ltik ja b'a yoj kulto
1Nochowonik, ja'ni jastal wax nocho ja Kajwaltik Jesús ja ke'n.
2Wax toyowex yuj ja wani xa na'awonexi, yuj ja wax cho a k'u'anex ja jas wax je'a a wi'exi. 3Jaxa ya'an wax k'ana oj a na'ex ja iti: Ja winiki jach' k'ulaji jastal Kajwaltik Jesús, jaxa b'a winiki, ti tojb'esi tiw ja ixuki, jaxa b'a Dyosi, ti tojb'i ja Kajwaltik Jesusi.
4Ja winiki, ta yuj k'a oj sk'umuk ja Dyosi, ma yuj oj sta' ti' ja sb'i'ili, ta yuj k'a musan yuj ja s'olomi, yujni mi wa skisa ja Kajwaltik Jesusi. 5Cho jach'ni ja ixuki, ta yuj k'a oj sk'umuk ja Dyosi, ma yuj oj sta' ti' ja sb'i'ili, ta yuj k'a mi smusu ja s'olomi yujni mi wa skisa ja statama. Ta yuj k'a jach' jastal jawi, mas lek joxowik ja stso'otsil s'olomi. 6Kechan, ta yuj k'a mi sk'ana ja ixuk oj smus ja s'olomi, mas lek joxowik ele. Kechan ta yuj k'a wax k'ixwi ja jox oj ajyuki, mas lek a smuse.
7Ja winiki, mi sb'ejuk oj smus ja s'olom yuj ye'n wa sje'a ja stsamalil ja Dyosi. Jaxa stsamalil ja ixuki, ja wa sje'a yi jas tatami. 8Ja yajni sk'u'lan ja winik ja Dyosi, mi jas ya elyi b'a skwerpo ja ixuki, yajni sk'u'lan ja ixuki, ja' ya elyi june ja sxa'ax ja winiki. 9Ja'yuj ja Dyosi, mi sk'u'lan ja winik b'a ye'n oj skoltaj ja ixuki, sk'u'lan ja ixuki, b'a oj skolta ja winiki. 10Ja'yuj ja ixuk jumasa sb'ej oj smus ja s'olome'i, sok ja jawi, wani sje'awe yuj wa skisawe ja anjel jumasa.
11B'a'ya ja ke'ntik ja janek' wanxax k'u'antik ja Dyosi, wanix koltan b'ajtika, ja ixuki, mix b'ob' ajyuk stuch'il ta mi ti'uk ay ja statami, cho jach'ni ja winiki, mix b'ob' ajyuk stuch'il jel t'ilan ti oj ajyuk sok ja sche'umi. 12Merani ye'na, ja yajni sk'u'lan ja b'ajtan ixuk ja Dyosi, ja ya' elyi june ja sxax ja b'ajtan winiki, cho smeranilni'a, spetsanil ja winik jumasa, ti'ni wax manxi b'a jun ixuka. Jach'ni ye'na, jaxa winiki, ja ixuki, sok spetsanil ja jas wax ilxi, nakani ye'n sk'u'lunej ja Dyosi.
13Ilawik ta lek ja mi oj smus ja s'olom ja ixuk ja oj sk'umuk ja Dyosi. 14K'elawilex ja jastal je'jiki'tik ja ke'ntiki, jel k'ixwela sb'aj ja oj ya k'i'uk ja stso'otsil s'olom ja winiki, 15jaxa sb'a ixuke'i, lek ja wax ya'we k'i'uki. Ja ye'nle'i, yujni ye'n a'ji k'i' yujile ja Dyos ja stso'otsil s'olome'a, ja'ni b'a oj smus'e sok ja s'olome'i. 16Kechan ta yuj k'a ay ma' mi sk'ana ja jastal iti, sok wa sk'ana oj ya k'e' jun ab'al k'umal, oj kal a wabyex mini ja ke'ntikoni, mini ja jmoj aljeltik jumasa ma wanxax sk'u'ane ja Dyosi, mix na'atikon jastal oj je'tikon a wi'ex.
Ja wa'el sb'a Kajwaltiki
(Mt 26:26-29; Mr 14:22-25; Lc 22:14-20)
17Ay jas mi lek wax kila ja jas wa'nex sk'u'lajeli, ja tsomjel jumasa it waxa k'u'lanexi, sb'ajni oj a ta'a koltajelex yuj, b'a'ya kechan ita wa sch'ayawex. 18Ja yora k'e' kal a wabyexi, ay ma yalata kab'i, ja yajni waxa tsomo ab'ajex sok ja jmoj aljeltik jumasa, mi b'ixa wi'aj a b'ajex lek, k'olan k'olan b'i waxa pila a b'ajex, we'n ita b'i wax och k'e'anik tiro'anel. Ja ke'n wax k'u'an ke ay b'a smeranil ja jawi. 19Ja smeranili, spetsanil ja iti, yujni oj ek'uka, b'a ti oj ilxuk machunk'a meran ti nochan sok ja Kajwaltik Jesusi. 20-21Ja ke'n wax na'a, ja yajni waxa tsomo b'ajexi, ajnel jomol wala wajyex b'a oj waj wa'anik sok ja wa'el waxa chapawexi, mixa waxa majlayex ja tuk jumasa. Ja jastal jawi, ay ma' wa'inx yab' oj kanuk, jaxa tuki nakaxa wa'ne yakb'el. —Ja jachuki, mixa ja'uk ja wa'el sb'a Kajwaltiki—. 22Toj lek yaljel yuj ja mi wax kisxi ja yuntikil ja Dyosi, kechan wax ka'tik sta' k'ixwel ja ma'tik jel ajula sb'aje'i. Ja jas waxa k'anawexi yuj k'a kechan wa'el sok yakb'el, —mas lek ti la kan b'a wa najex— ¿Ma waxa majlayex ay ma oj stoy'ex? Me'y sb'ej ma' oj stoy'ex—
23Ja jastal sje'aki ja Kajwaltik Jesús ja ke'n, cho jach'ni je'unej a wi'ex ja we'nlexi: Ja a'kwal nak'ul satiji ja Kajwaltik Jesusi, syama ja pani, 24sk'ana yi ts'akatal ja Dyosi, sxet'a xe'ntiyaman ti yala'a: —yamawik, ab'anik, ja iti ja ni jkwerpo'a, yuja we'n oj k'epjuk a wi'ex. Ja'yuj, yajnixa lo'owex ja pan iti, ti'xa na'awonex ja ke'na. 25Yajni ch'ak wa'uke'i, ti cho syama ja b'is it ay yi'oj ya'lel ts'usub'i, ti yala'a: —Ja ya'lel ts'usub' iti, ja jchik'eli. Sok ja iti, ja jTatik Dyosi, wa sk'u'lan jun yajk'achil trato a mokex. Ja'yuj, ja yajni oj ja wu'ex ja ya'lel ts'usub' iti, ti'xa na'awonex ja ke'ni. 26Ja'yuj spetsanil ja majke oj ja lo'ex ja pan iti, cho jach'ni ja oj ja wu'ex ja ya'lel ts'usub' iti, ja wa'nex sta'jel ti' ja jastal cham ja Kajwaltik Jesusi, jach' oj ja k'u'lukex man oj kumxuk, —xchi ja Pablo.
Ja jastal oj k'u'luktik ja b'a wa'el sb'a Kajwaltiki
27Ja'yuj ta ay k'a ma wa slo'o ja pani, sok wax yu'aj ja ya'lel ts'usub' it yala ja Kajwaltik Jesusi, ta yuj k'a mi tojuk ayi, wani sta'a smul sok ja skwerpo'a cho wani sok ja jastal spek'a schik'el ja Kajwaltik Jesusi. 28Ja'yuj yajni oj a lo'ex ja pani, sok oj ja wu'ex ja ya'lel ja ts'usub'i, jel t'ilan oj ek'uk ja k'ujolex ta toj ayex ma miyuk. 29Ja Dyosi, ojni ya' stup ja smul ja ma wa slo'o ja pan sok wax yu'aj ja ya'lel ts'usub'i, ta yuj k'a mi sna'a ta ja'yuj ja yi'aj wokol ja Kajwaltik Jesusi. 30Ja'yuj ay ma yaj chamelxta ay, cho ay ma mey yip a wujilex, sok ja'yuj ay ma chamta a wujilex. Yuj ja jach' waxa k'u'lanexi.
31-32Ja Kajwaltik Jesusi, ja'ni wa sk'ela ja jastal ja jmodotika. Ja ye'n wa stojowotik b'a jach' oj b'ob' jneb'tik ja ke'ntiki, b'a jach' mi lajan oj a'ji jtuptik ja jmultik sok ja kristyano jumasa b'a lu'um it ja ma' mi sk'u'an ja Kajwaltiki. Ta yuj k'a wax na'atik sb'ej ja jas wax k'u'lantiki, mini oj a'ji jtuptik ja jmultika.
33Ja'yuj jmoj aljel jumasa, yajni waxa tsomo a b'ajex b'a oj wa'aniki, ch'akan majla ab'ajex a petsanilex. 34Ta yuj k'a ay ma wa'inxax yab' wax k'ot a wujilex mas lek a wa' b'a snaj. B'a jach' mi oj a'ji stup ja smul yuj ja Dyos ja b'a tsomjeli.
Jaxa tuk jas a job'owex ki'i, ti oj kal a wabyex jas oj ja k'u'lukex ja yajnix waj kulatayexi.
Iliyochaguliwa sasa
1 Corintios 11: YABD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Sociedad Bíblica de México 2021