1 Corintios 10
10
Laj k'u'uktik sok kechan Ye'n oj jtoytik ja Dyosi
1Jmoj aljel jumasa, na'awik lek ja jastal ek' sk'uts e' ja niwan paman ja' it jel yakil, ja ma' ek' paxta kujtiki, ja Dyosi, spetsanile musjiye sok jun nole ason. 2Jach' a'ji yile ja' jastal jawi, b'a yib' ason sok b'a yoj niwan paman ja'i, jachuk ti'xa sta'a sb'aje sok ja Moisesi, yujni ye'n nochane soka. 3Spetsanil yabye ja wa'elal it a'jiyi'e yuj ja Dyosi. 4Mojtajiye yuj ja Jesusi, yuj ja ye'nani ja patak' jaw b'a b'ojti ja ja' it ch'ak yu'e' spetsanile b'a a'ji ek' ja stakin ti'e'i. 5B'aya, jitsan ja ye'nle mi lek yilawe ja jas sk'u'lan ja Dyosi; ja'yuj ch'ak chamuk jaxa skwerpo'i, ti ch'ak kan sak tantan b'a yoj wits.
6Yuj ja jas ek' yujile ja jmojtik jumasa, ja'yuj ja ke'ntiki, ay jas oj jneb'tik. Mi sb'ejuk oj ok' jk'ujoltik oj k'u'luktik ja jas mi lekuk jastal sk'u'lan ja ye'nle'i. 7Cho mini sb'ejuk oj toytik ja k'u'lub'al dyos jumasa, jastal sk'u'lane chab' oxe ja ye'nle'i. Jach' wax yala jastal it ja b'a ts'ijb'anub'al ja yab'al ja Dyosi: —Ja kristyano jumasa, ochye kulan wa'el sok yu'jel ja', tsa'an ti och cha'nuke b'a sti' sat jas dyose k'u'lub'ali 8Cho mini sb'ejuk oj kij b'ajtik tuktukil ixuk, ja jastal sk'u'lane chab' oxe ja ye'nle'i. —Yuj ja jach' sk'u'lane ja ye'nle'i, —Ja'yuj b'a jun ita k'ak'u chamye jun tajb'e oxe mil (23,000). 9Mok pensaruktik oj le' jitsan multik b'a oj kiltik ta oj ya jtuptik ja Kajwaltik Jesusi. Yuj ja jach' sk'u'lan chab' oxe ja ye'nle'i, ja'yuj ja Dyosi, sjeka och mal chan b'a ti ch'ak k'uxjuke tiw ti ch'ak chamuke'a. 10Cho mi jas b'ob' kaltik, ja jastal sk'u'lane chab' oxe ja ye'nle'i, ja'yuj ja anjel sb'a chamel ch'akeli ch'ak miljuke yuj.
11Spetsanil jach' ek yujile jastal it ja jmojtik jumasa, yuxta ayni jas ya'we jneb'tika. Sok ch'akni kan ts'ijb'anub'al b'a yab'al ja Dyosi, b'a jach' oj makunuk kujtik b'a oj sje'ki'tik ja ke'ntik ja janek' sak'anotikto ja k'ak'u jawi. 12Ja'yuj mok ma yal ke mini oj b'ob' sle' smula, ja ma jach' wax yala, moje ye'nto b'ajtan oj ko' k'ab'al. 13Ja we'nlexi, mini jun wokol b'a waxa wa'wex ek'uk b'a mi oj kuchuk a wujilex. Ja'yuj, sb'ej k'u'anik ja Dyosi, ja ye'n mini jun wokol oj ya' wi'ex b'a mi oj kuch a wujilexa, sok mi kechanuk ja jawi, yajnix jak ja wokol jumasa, ye'nani ja Dyos oj sje'a wi'ex ja jastal oj a wa'wex ek'uk ja wokol jumasa b'a oj kuch a wujilexa.
14Ja'yuj, jmoj aljeltik jumasa, mok a k'u'ukex ja k'u'lub'al dyos jumasa. 15Ja we'nlexi, wanixa wabyex sb'eja, ja'yuj wax k'u'an ojni a wabyex sb'ej ja jas oj kal a wabyexi. 16Yajni wax ku'ajtik ja ya'lel ts'usub' ja b'a wa'el jastal sk'u'lan ja Kajwaltik Jesusi, wax jk'anatik yi ja Dyosi, tsa'ub'al wax kilatik ja ya'lel ts'usub' jawi, jpetsaniltik wax ku'ajtik sok lajan sok jani ja schik'el ja Kajwaltik Jesusi. Jaxa yajni wax lo'otik ja pani, lajan sok ja'ni wa'ntik yab'jel ja sb'ak'tel ja Kajwaltik Jesusi. 17A'nima jel a'ayukotik jaxa yajni wax lo'otik ja pan jawi, lajan sok jun kwerpo ita wala kantik.
18K'elawilex ja israelenio jumasa, ma'tik wa sk'uxu ja sb'ak'tel ja chante it wax a'xiyi b'a smajtan ja Dyos b'a sat altar b'a snajtsil tsomjeli, wanix ch'ak stsom sb'aje sok ja Dyosi, cho jach'ni ja ma' wax yab' ja wa'el jawi. 19Miyuj wax kala yuj sak'anuk ja k'u'lub'al dyos jumasa, b'a oj toyxuk, ma yuj ja jas wax k'apxi yi'i mas lek yuj ja tuk jumasa'i. 20Jaxa ma mi sk'u'an ja Kajwaltik Jesusi, yajni wax ya'we yi ja smajtan jas dyose k'u'lub'ali, ja'ni wax ya'we yi ja tantik pukuj jumasa, mi ja'uk ja Dyosi. —Ja'yuj ja ke'n mix k'ana oj a ch'ik a b'ajex sok ja tan pukuji. 21Ja we'nlexi, mi oj b'ob' a wu'ex ja ya'jel ts'usub' b'a sb'is wax makuni yuj ja Kajwaltik ja k'ak'u oj cho a wu'ex ya'lel ja sb'is it wax makuni yuj ja ya'tijum ja tantik pukuj jumasa, sok mi oj b'ob' a lo'ex ja pan it wax lo'xi ja b'a wa'el jastal sk'u'lan ja Kajwaltik Jesusi, ta yuj k'a wax cho a wabyex ja it wax makuni yujile b'a sk'inil dyose k'u'lub'al ja ya'tijum ja tantik pukuj jumasa. 22¿Ma yuj waxa k'ana oj ja wawex k'e' skoraja ja Dyosi? —Mi yuj masuk ay kiptik ja ke'ntik ke yuj ja Dyosi—.
La jle'tik ja slekilal ja tuk jumasa
23Ay ma wax yala a wujilex: —Ja ke'n elyon libre b'a oj k'u'luk jastik wax k'ana—. —Merani ye'na—. Jasa mi spetsaniluk ja jas swa sk'ana naka lekuk; mi spetsaniluk wax ya'a kiptik ja b'a jsak'aniltik b'a sk'u'ajel ja Dyosi. 24Ja'yuj jel t'ilan oj chaptik lek b'a slekilal ja tuk jumasa, mi sb'ejuk ja kechan ke'ntik.
25-26Ja Dyosi, spetsanil sb'aj ye'n ja lu'umi, sok spetsanil ja jas ayi. Ja'yuj ja we'nlexi, oj b'ob' a k'ux'ex spetsanil tik'e b'ak'et ja b'a wax chonji, mi oj b'ob' a k'ulukex pensar b'a jak ja b'ak'et jawi.
27Ta ay k'a ma wa slokowex wa'el, mi sk'u'an ja Kajwaltik Jesusi, ta wan k'axa k'ana oj wajanik, ka'axik. Ab'anik spetsanil ja jas wax a'ji a wi'exi, mok ek'uk a k'ujolex ta lek ma mi lek yab'jel. 28-29Ta ay k'a ma wax yala wabyex: —Ja b'ak'et iti, a'xita yi b'ajtan ja dyos k'u'lub'ali, mas lek mok a wabyex, b'a mi oj a wa'wex k'e jun ab'al k'umal. Ja we'n ta waxa wab'i mini jas oj yut' a'a jaxa tuk jumasa mil lek oj yabye.
Ja ke'n ja smeranili, mix lek wax kila ja ma wax yala mi jas oj k'uluki, kechanta ayk'a ay ma wax ek' sk'ujol mi lekuki, 30Ta wan k'ax ka'yi ts'akatal ja Dyos yuj ja jwa'eli, ¿Jasyuj ja ti sta'one ti' yuj ja wax k'ab'i?
31Ja'yuj ja we'nlex sok ja jas waxa wabyex sok ja jas waxa wu'ajexi, ta ay k'a jas waxa k'u'lanex, k'u'lanik sok ja sb'i'il ja Jtatik Dyosi. 32Mok a wa'wex k'e jun ab'al k'umal sok ja judio jumasa, sok mini ja ma mi judio'uki, cho jach'ni sok ja jmoj aljeltik jumasa. 33B'a spetsanil ja jas waxa k'u'lani, wax le'a jastal b'a lek oj yil'e' ja kristyano jumasa. Mi kechanuk wax le'a ja jlekilal ja ke'n, cho jach'ni ja sb'a tuk jumasa, b'a oj sta ja skoltajele'i.
Iliyochaguliwa sasa
1 Corintios 10: YABD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Sociedad Bíblica de México 2021