Matheyo 14
14
Ohitiwa wa Yohaane mpatisa
1Ehuhuweene yeele Herodi tetrarkha* a elapo ya oGalileiya aahiiwa soowuulummwa mwaha wa 2Yeesu, ni aahaaleela yaawo yaamurumeela: “Ole Yohaane mpatisa. Owo oovenyerera mookhwaani! Tivawo okhalannaawe ikuru soopaka sootikhiniha.” 3Herodi aahaarumiha atthu weera emvare ni emutthuke Yohaane ni emuwalele yoowo mukaliposo, 4niwoko Yohaane aamuleenlaawe Herodi weera khoontthuniheriwa okhala ni Herodiyas, amwaarawe munneiye Filipe. 5Herodi aatthuna omwiiva Yohaane, mene aahoova muloko wa atthu, niwoko muloko ole wannamuttittimiha ntoko mprofeeti. 6Vano, naaphiyalaaya nihuku Herodi uupuwelaawe oyariwawawe, mwaana a Herodiyas aahiina ohoolo wa atthu ootheene. Aasiveliwa vancipale Herodi, moota wooweera 7aamuroromeliha vekhaikhai omvaha yeeyo mwaana ole aatthunaawe omvekela. 8Amayawe yaamviriyela owo weera aamweerele mwene: “Mukivahe musasaanini muru wa Yohaane mpatisa.” 9Mwene aathananiheiya vancipale, mene niwoko na olipela ni na oolattuliwa aalamula omvaha yeeyo aavekenlaawe. 10Aalamula weera ahitiwe Yohaane mukaliposo. 11Muruwaawe waaheliwa musasaanini ni aavahereriwa mwaana ole, ni owo aarongha wa amayawe. 12Oohusera a Yohaane yaarowa ni yaakuxa erutthwaawe, ni yaavitha. Vano yaarowa omuleela yeeyo Yeesu.
Yootikhiniha ya ipaawu
13Yeesu aakhenlaawe masu ale, aavenya munikulani ni aarowa vanipuroni na meekhaawe. Atthu ancipale esuwelaka yeeyo, yaavenya musidadeni ni yaamutthara yeettaka. 14Yeesu avenyaka munikulani ni awoonaka atthu ancipale, aahaamorela ikharari yaawo ni aahaalamiha arettaaya. 15Wiilaka, oohuseraawe yaamwaattamela Yoowo emweerelaka: “Nna ti nipuro na munikareni, ni oneera wiilaka. Ngweerele atthu ancipale ala weera eroweke mmittettheni yathumeke yooca.” 16Yeesu aawaakhula: “Khoontthuneya orowa, mwaavahetho nyuwo etthu weera eceeke.” 17Awo yaamweerela: “Va nrino ipaawu ithanu ni ihopa piili paahi.” 18Yeesu aaheera: “Mukiwiihere va!” 19Owo aahaalamulela atthu ancipale weera ekilaathiki vathi. Akuxaka ipaawu ithanu ni ihopa piili ni awehaka osulu wiirimu, aamutthapela Muluku ni aameiyanyiha ipaawu. Vahoolowaya aahaavaha oohuseraawe, enaakawela atthu ancipale. 20Ootheene yaahooca ni yaavona. Oohusera yaattottanyiha ni yaasariha mipapara muloko ni miili sa mivithe saahanle. 21Yaaciiye yaari asilopwana ookwanaka macira miloko mithanu, ehaalikeliwaka athiyana ni anamwane.
Yeesu oneetta vasulu wa maahi
22Vahoolowaya Yeesu aahaanyesereriha oohuseraawe weera evolowe munikulani ni erowe vahoolowawe okhopela, aalaxeraka Yeesu atthu ancipale. 23Aalaxerakaru atthu ancipale, aawela meekhaawe vamwaakoni weera avekele. Wiilalaaya, Owo aari meekhaawe. 24Vano, nikula naarakamela mukerekhere wa ephareiya, nimaniwaka ni mitekuteku niwoko epheyo yaahoopa erweelaka ohoolo wa nikula. 25Oyaaka ni oxa Yeesu aarowa wa yaawo, eettaka vasulu wa ephareiya. 26Yaamoonnaaya Yeesu eettaka vasulu ephareiya, yaahoova vancipale yeeraka: “Ti namanxepaani”! Yaakhuwela ni woova. 27Yeesutho aaweerela woowaakuveya: “Mulipiheke mirimasanyu, ti Miyo! Muhoove!” 28Pedru aamweerela: “Apwiya, mwaari ti Nyeenyu, mukilamule weera kirwe kookumananeni vasulu wa maahi.” 29Yeesu aamwaakhula: “Ngweeke!” Vano Pedru aakhuma munikulani, aneetta vasulu wa maahi, anarowa wa Yeesu. 30Oonnaawe epheyo weera yaari yoolipaxa, aahoova ni apaceraka oneela, aakhuwela: “Apwiya, mukivuluxe!” 31Woowaakuveya Yeesu aahookola moonowaawe ni aamvarela, eeraka: “Mulopwana a nroromelo vakhaani! Heeni nyuwo muhovenlaanyu?” 32Evolowakaru munikulani, epheyo yaamaala. 33Awo yaari munikulani mmwe yaanimuttottopela Yoowo yeeraka: “Vekhaikhai, Nyuwo ti Mwaana a Muluku!” 34Elapuwakaru ephareiya, yaaphiya oGenesarete. 35Atthu a elapweene yeele emusuwelaka Yeesu, yaamwaramwaxa masu mmittettheni sootheene sa mukerekhere, ni yaangwiihera arettaaya. 36Yaamudyoonttelela weera aretta etave paahi ikuwosawe. Ootheene yaamutamve yaalamihiwa.
Iliyochaguliwa sasa
Matheyo 14: VMK2021
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Makhua Shirima Bible © Christelike Lektuurmaatskappy NPC, 2021.
