Okhuma 2
2
Oyariwa ni enamwane ya Moisesi
1Vano mulopwana mmoha a epuumba ya Leevi aathelana ni muthiyana muLeevitho. 2Owo aarupala, anamuyara mwaana mulopwana. Oonaka weera aari ooreera, aamwiipithiha nyeeri miraru. 3Wahaawereyaaya omwiipithiha, aakuxa mpapara wootthaviwa ni etiili, anattikitthela ni nnyoma ni nkhora. Vano aamuhelamo mwaana ole ahiyaka mpapara eriyari ya ettheere mukerekhere wa Nilu. 4Amurokoriye mwaana ole yaaheemela okhwipi weera yoone yeera emukhumelele. 5Vano mwaana muthiyana a Farawu* aarowa omoolokoni Nilu weera arape ni arumeiyaawe yaavira mukerekhere mooloko. Mwa yeeyo aahoona mpapara muttheereni, anamuruma murumeiyaawe okuxa. 6Akhunulaka, aamoona mwaana iinlaka. Owo aammorela ikharari aneera: “Ola muHeberi.” 7Amurokoriye mwaana yaamwaattamela mwaana a Farawu*, enamukoha: “Muhano munootthuna weera kamwiitthane muthiyana muHeberi weera amwaamwihe ni amuhuwe mwaana ola?” 8Owo aamwaakhula: “Aani.” Vano mwaamwali aarowa anawiitthana amayawe mwaana. 9Vahoolowaya mwaana a Farawu* aamweerela muthiyana ole: “Omukuxe mwaana ola ni okaamwihere, ni miyo kinimooliva. Vano muthiyana aamukuxa, anamwaamwiha. 10Unnuwakaru mwaana, amayawe yaamurongha wa mwaana muthiyana a Farawu* ni aamwaakhela ntoko mwaniye. Aamutteha Moisesi eeraka: “Niwoko miyo kimuruuhale mmaahini.”
Moisesi ommwiiva ngwExipitu, anatthawa
11Nihuku nimoha, Moisesi unnuwaleene, aarowa nipuro yaaraaya atthwaawe ni aahoonelela moota waaviraaya muteko yaavaraaya. Weiwo aamoona ngwExipitu mmoha angwaxulaka muHeberi, mmoha a atthwaawe. 12Aatthiimaka awehaka mipatta sootheene ni ahimoonaka mutthu, aamwiiva ngwExipitu, anamvitha veehaavani. 13Waaxawaya, aarowa, anawoona aHeberi eeli ewanaka. Aamukoha namatannya:“Oningwaxulela heeni mukhwaawo?” 14Vano mulopwana aamwaakhula: “Taani oovanghe otokweene ni mphukaahu? Ontthuna okiivatho ntoko omwiivalaawo ngwExipitu?” Moisesi aahoova uupuwelaka: ‘vekhaikhai, sootheene sohooneleliwa!’ 15Farawu* asuwelakaru yeeyo, aahaasaasa omwiiva Moisesi, mene owo aamutthawa Farawu*, anarowa omaka elapo ya oMidiyani. Iwe aakilaathi mukerekhere ehime. 16Vano musaserdoti* mukina a oMidiyani aakhalano anamwane asithiyana athanneeli ni awosa yaarowa orika maahi weera esarihe maahi moowurelamo ni ewurihe muhuwo wa atithaya. 17Akukhulitho akina yaaphiyawo, enapacera owoomolasawo. Wa soothesene, Moisesi aahoowa owaakiha, anawuriha muhuwaaya. 18Ephiyakaru asimwali wa atithaya, Rewuyeli, owo aahaakohasa: “Mwaakuvenlenisa ohokolowa olelo?” 19Awosa yaamwaakhula: “ngwExipitu mmoha oonaakiha wa akukhuli nitho oonirikela maahi veehimeni, anawuriha muhuwo.” 20Vano aahaakoha: “Ori woowi mulopwana owo? Heeni munghiyenreniwo? Mwamwiitthane weera ace ni hiyo.” 21Moisesi aarowa oca ni aahaakhulela okhala vaate wa Rewuyeli ni owo aamvaha Moisesi mwanawe Zipora weera ethelane. 22Zipora aamuyara mwaana mulopwana mwa yoowo Moisesi aamuttenghaawe Gerxomo, eeraka: “Kiri namarwa mulaponimu.” 23Vahoolo wa ehuhu yincipale, aahookhwa mwene a wExipitu. aYixrayeli yanniixiinlela ekhuwelaka niwoko na opottha. Ni Muluku aahiiwa okhuwelawaya. 24Vano Muluku aahiiwa wiikhupanyerawaya, anuupuwelela wiiraana aapankaawe ni Abrahamu, Isaki ni Yakobe. 25Muluku aahaaweha aYixrayeli, anaatthukuruwela.
Iliyochaguliwa sasa
Okhuma 2: VMK2021
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Makhua Shirima Bible © Christelike Lektuurmaatskappy NPC, 2021.
