ARomo 7
7
Pa diade du ni kpia pai
1Awirinami oni aina nga te? ya rugute nifu ri boro wa ni nidu ni ungani, bambiko mi nagumba pai fu agu yo ini rugute. 2Bambiko gu de di kumba ni nidu ni vovo ni be rugute fu kumbani wa ni niau ni ungani; ono ka kumbani kpi ni ki kuru be rugute kumbani. 3Si du ka ni kpamia tini na kura kumba ti ni wa kumbani nidu ni ungani, i ki ya aya ti ni irabari; ono ka kumbani kpi, ni kuru akura be rugute si du ka ni adu nga ti ni ni irabari ya, ka ni vura kpamia tini na kura kumba vurũ.
4Were awirinami, oni akpi ti rugute rogo boro Kristo yo; oni du ni kpamiakpamia roni na kura boro, na kina gu ko i azingisi ko dagba akangba, ani zu fu Mbori. 5Bambiko ho ani adu ni ni borose, gu gbegberẽ nyemuhe du mbiko rugute, si amangi apai rogo aparani yo ka zu sa kpio. 6Ono awere ani kuru be rugute, ani nakpiki ti gu pai nazadi rani; si du ani amanga pai ti ni ni gu vovo pai nga ga toro, ni gu kuru pai nga ga rugute du ni keke he te.
Pa ingapai rogo aidipase yo
7Ani aya wãi tie? Rugute nga ingapai? Wo te. Ono mi aina nga ingapai mbata te kina mbiko rugute: bambiko mi aina nga kpi he te, kina rugute naya, “Ka mo kpi nga he ya.” 8Ono ingapai, gbata pai rogo rugute yo, si mangi rika kpi he kpotore yo. Bambiko ka i kpara rugute ti ingapai, ingapai kpi akpi. 9Mi adu ni ungare wa mi akpara akpara ti rugute mbata, ono ho rugute aye ni, ingapai ki zingi, mi ki kpi; 10gu rugute nadu sa unga si bi mi sa kpio. 11Bambiko ingapai gbata pai rogo rugute yo ki nangi re, ki imi re mbiko ho. 12Si du du rugute ti ni ni ziazia ha, ndika ni ziazia ha a, ni ruru he, ni wene he.
13Atika gu he nidu ni wene he aye ka du ni kpio fere tie? Wo te. Ono ingapai nisa kpio ti re rogo gu pai yo ngba angba, i ini ya ingapai nga ha: ― ingapai gberẽ agberã gbe mbiko rugute. 14Bambiko ani ini aina ya rugute du mbiko toro, ono mi tigimi du ni borose, ki du ni zizi boro fu ingapai. 15Bambiko gu pai mi amanga mi aina nga ha te; gu pai mi akpi nyemu he, si mi amanga te; ono gu pai mi asoga, si mi amanga. 16Ono gu pai mi akpi nga nyemu he ya, ka mi amanga ha mi idi aida fu rugute ya si ngba. 17Were a nga mi tie namanga ha awere te, ono kina ingapai nye kpotore yo. 18Bambiko mi ini ya rogo re yo nga borose ka wene he nye nga yo te, bambiko kpi nyemu he du na mi sa, ono manga gu pai ngba angba adu nga ya. 19Bambiko gu wene he mi akpi nyemu he mi amanga nga ha te ono gu gbegberẽpai mi akpi nga nyemu he ya si mi amanga. 20Ono gu pai mi akpi nga nyemu he ya, ka mi amanga ha, a nga mi ka amanga ha berewe te, kina ingapai nye kpotore yo.
21Mi bi rugute tie ya wa mi nikpi nyemu manga wenepai, gbegberẽpai nimbedi na mi. 22Bambiko rago nangba ti re na ga Mbori rugute ku kpotore yo. 23Ono mi bi kura rugute rogo apare yo, si niso vura na gu rugute du berãre yo, ki ye na mi ni zizi boro ku tii gu rugute nga ga ingapai du rogo apare yo. 24Ako rungorungo boro nga mi! Da ka batasi re ti gi boro kpio re? 25Mi natambua Mbori mbiko Yesu Kristo gaani Gbia. Si du mi amanga ga Mbori rugute ti ni tigimi ni berã, ono mi nimangi ga ingapai rugute ni borose.
Iliyochaguliwa sasa
ARomo 7: ZB1978
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
La Sainte Bible en Zande © Alliance Biblique Universelle, 1978.
