1 VAKORINZO 14
14
1Muve nu vuyanzi; muve kandi nu konyoora kihaanwa cho voporofeti. 2Mundu omoloma mu zinimi zing'eni siamolomaa ku vandu vandi mba, navuzwa ku Nyasaye. Sihaveeye ho nu mundu umanyirizaa cha voora mba. Amolomaa giligali gaviswa ga Nyasaye mu zinguru zia Roho. 3Navuzwa uyu oporofetaa avooreraa vandu vindu viu kuvumbaka, kuvazuva kandi kuvaleminya mioyo. 4Uyu omoloma mu lulimi logeni yiiyumbakaa mwene. Navuzwa uyu wilwazaa likuva lia Nyasaye yumbaka likanisa lia vandu vasuuvira.
5Kunangwa ndakegombi munyi mwosi mumolome mu zinimi zing'eni, navuzwa ndakayanzi muve ni kihanwa cho koporofeta amakuva ga Nyasaye kigira umundu oporofetaa amakuva ga Nyasaye aveeye nu vukala vonene ligali kuvita oyo omoloma mu zinimi; kuduuka mundu aveeho unyala kwivaalira likanisa agaavoola, kunangwa ilivugana liosi liduuki kwumbakwa. 6Kulwayago, avaamitu vange, niiva ndaaza ku munyi nimolomaa mu zinimi zing'eni, ndava na vokonyi ki niiva sindamuleetera likuva kutura ku Nyasaye lie limanya anoho ovoporofeti, anoho amigizu?
7Ivindu viu kwimbira mu nivitaveeye ni livamwoyo kuli lirere, anoho vukana, nivitahaana mioyo vulahi, umundu anyala kumanya ndi lwimbu lukubwa?
8Niiva iling'alala liu vulwani nilikubwa ma livuli kuhulirika vulahi, nivwaha unyala kwetegeka ku liihi zana? 9Gaveeye ndio kandi ni munyi, niiva lulimi lwinyu lutivula kindu kitamanyikani, umundu anyala kumanya ndi ichamuvoolaa? Amakuva ginyu galagotera vuzwa mu vukindu. 10Ziveeye ho zinimi zing'ano zinyingi mu lirova, navuzwa siloveeye ho kali lulala lutaveeye ni kivuni mba. 11Navuzwa niiva simanyi kivuni chu lulimi lomolomangwa yilwo, mbeeye mugeni ku mundu omoloma lulimi yilwo, kandi naye aveeye mugeni ku inzi. 12Gaveeye ndio kandi ku munyi, kigira muveeye nu vuha konyoora vindu vikoonyaa kwumbaka likanisa.
13Kunangwa oyo omoloma mu lulimi logeni, kuduuka asaale anyoore zingulu ziu kwivaala agaavoola. 14Niimba nisaara mu lulimi logeni umwoyo gwange nigwo ugusaalaa navuzwa zing'anagani ziange siziveeye harara ni lisaala mba. 15Kunangwa ngoleki? Ndasaara na roho gwange, kandi ndasaara ni zing'anagani ziange; ndimba na Roho gwange, kandi nimba ni zing'anagani ziange. 16Lwa uhaanaa lisandiza ku Nyasaye mu Roho yenyine vuzwa, umundu utamanyi makuva ga roho, naye aveeye mu livugana yilio, yakavoola ndi “Amini” ku lisaala liilio lie lizominya? Sianyala kumanya cha ovola mba. 17Kali niiva unyala kusandiza Nyasaye vulahi ligali, navuzwa wundi uyu siyumbakiywi kali hakuzu mba.
18Sandizaa Nyasaye kigira molomaa mu zinimi zing'eni ligali kuvita umundu wundi woosi. 19Navuzwa mu likanisa liu kusaala nyaanzilira ligali kovora makuva gatano govogeri vwange aganyala kuhulirika gukwigiza vandi, kuvita komoloma amakuva zielefu mu zinimi zing'eni.
20Avaamitu vange, mutava kuli avana mu zing'anagani zienyu mba. Muve kuli avana vadoto vatamanyi kindu ku lovega lwu vudamanu, navuzwa mu zing'anagani, gaduukanaa muve kuli vahindira. 21Gang'odwa mu Mang'oda Matakatifu,
“Kuvitira ku vandu vamoloma mu zinimi zing'eni,
ndakamolome ku vandu Umwami avoora.
Inzi ndakamolome kuvitira ku minwa ja vageni,
kali ndio vandu vange sivalakambuliri mba.”
22Kunangwa kihaanwa cho komoloma mu zinimi zing'eni keveeye chukumanyira ku vandu avatasuuvira sikeveeye ku vandu vasuuvira mba. Ikihaanwa chokoporofeta ikuva lia Nyasaye keveeye kimanyiru ku vandu vasuuviraa, na sikeveeye ku vandu vatasuuvira mba.
23Niiva likanisa liosi lilavugana harara, maku vandu vosi vatange komoloma mu zinimi zing'eni; kandi niiva vandu vageni valaza kutura ichova, anoho vandu vatasuuvira, valavoora ndi munyi vosi muveeye avalalu. 24Navuzwa niiva vosi valaporofeta likuva lia Nyasaye kandi umundu mugeni anoho mundu utasuviraa alingira mu livugana, goosi gahulira galamumanyia vwoni vwivwe mwene; goosi agahulira galamukalagira mwene. 25Agaviswa gu mu mwoyo mwimwe galaloleka havulavu, naye alasigama nu kusaala Nyasaye nokovoora, “Agiligali Nyasaye aveeye hagati hinyu!”
Ovolohizi vulahi mu likanisa
26Kunangwa avaamitu vange, yaga nigo gamboolaa. Lwa muvugana harara kusaala, mulala yimbi ulwimbu, wundi ave ni kindu cha yigiza, wundi ave ni likuva kutura ku Nyasaye, wundi atumikiri kihaanwa cho komoloma mu zinimi zing'eni, na wundi agirung'anyie gavoolwa mu zinimi. Ivindu yivi viosi kuduuka vikoonye mu liumbaka likanisa. 27Niiva vaveeye ho vandu vi vihaanwa vio komoloma mu zinimi zing'eni, gaduukanaa vamolome vaviri anoho vavaga vuzwa. Vatavita yaho mba; kandi valondekane mulala inyima wu wundi vulahi. Gadukanaa kandi umundu wundi yivaale agavolangwa. 28Navuzwa ni hataveeye nu mundu wivaalaa gavoolwa, ni vulahi oyo ovola mu zinimi akiring'ane mu likanisa. Umwene yemolomere mu mwoyo gwigwe kandi ku Nyasaye. 29Yavo avaveeye ni kihanwa cho voporofeti, muleke vamolome vaviri anoho vavaga. Vamolome na vandi vahulirizi makuva gavavoola. 30Navuzwa mulala mu livugana naava nanyoora ilikuva kutura ku Nyasaye, uyu omoloma kuduuka akiring'ane ma yihulirizi. 31Mwosi munyala koporofeta likuva lia Nyasaye mulala samulala kunangwa vuli mundu aduuki kwiga kandi kudinyirizwa. 32Kihanwa cho koporofeta kidukanaa chamiifi nu muporofeti mwene omoloma, 33kigira Nyasaye siyenya kove no vogoyaanu mba, navuzwa kove mu lihulirizana kandi mu mirembe.
Kuli goveeye umwima mulahi mu makanisa goosi ga vatakatifu, 34avakali vaduukana vakiring'ane mu makanisa. Sivaduukani komoloma; kuli gang'odwa mu Lilaga lia Musa, gaduukanaa vegeehizi. 35Niiva vaveeye na mateeva gokoteeva, vateevere vasaza vaavo yengo wavo. Keveeye ikindu chi zisoni ku vakali komoloma mu makanisa ga vasangi.
36Gamanyia ndi likuva lia Nyasaye si lianyoreka kutura ku munyi mba, kandi simuveeye ni munyi mwenyine avaliaza ku mba. 37Niiva umundu woosi aliganagana kuva muporofeti anoho ave ni kihanwa cha Roho, gaduukanaa amanye ndi ga mung'oderaa gaveeye amalago gu Mwami. 38Niiva umundu woosi siavugiliraa kumanyiriza vindu yivi, mutamuhulirizi mba.
39Kunangwa, avaamitu vange, mwenye ligali konyoora ikihaanwa cho koporofeta ilikuva lia Nyasaye, navuzwa mutigalira limoloma mu zinimi zing'eni mba. 40Ivindu viosi gaduukanaa vikoleke mu liiva lilahi kandi mu lilohiza lilahi.
Lisimuguka lia Kristo
Iliyochaguliwa sasa
1 VAKORINZO 14: LOGOOLI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©Bible Society of Kenya, 2019