1 VAKORINZO 12
12
1Kalunu avaamitu vange, kolondekana na mateeva ginyu ku vihaanwa via Roho; nyenya mumanye vulahi agiligali gavio. 2Mumanye vulahi ndi lwa mwaali nimukikiri kumanya Nyasaye, mwagotizwa mu zinzira zinyingi mu lisigamira vifananyi vitaveeye ni livamwoyo. 3Nyenya mumanye ndi, umundu woosi wimilirwa na Roho wa Nyasaye sianyala kovora, “Yeso alaamwe mba!” Kandi sianyala kwiyama, “Yeso aveeye Mwami”, natimiliywi na Roho Mutakatifu.
4Haveeye ho ni vihaanwa via Roho zing'ano zinyingi, navuzwa Roho uvihaanaa aveeye mulala. 5Haveeye ho ni zing'ano zinyingi ziu vutumwa, navuzwa kwosi kutumikira Mwami mulala. 6Haveeye ho ni zing'ano zinyingi zio kokora miyinzi, navuzwa Nyasaye aveeye mulala uhaanaa vunyali kuavandu vosi kokora miyinzi lugano lugano. 7Liiva ho lia Roho limanywa mu zinzira lugano mu vuli mundu kuduuka vosi vanyoore uvugasu. 8Roho ahaanaa ku mundu mulala livoora lio vogeri, na wundi ahevwa limanya kutura ku Roho mulala mwere. 9Roho mulala mwere ahaanaa ku mulala lisuuvira, kandi ahaanaa ku wundi zingulu zio kohonyia. 10Roho ahaanaa ku mundu mulala zingulu zio kokora vilolekizu viokogenyia; ku wundi kihaanwa chu vwilwazi; ku wundi ahaanaa vunyali vwu kwavukanyia hagati ha Roho ni miroho. Ku mulala kihaanwa cho komoloma mu zinimi lugano lugano; na ku wundi kihaanwa chu kugirung'anyia zinimi. 11Yiji josi jiveeye imiyinzi ja Roho mulala mwere; kandi ahaanaa ku mundu sa mulala kihaanwa kuli mwene atovoraa.
Umuviri mulala ni vivero vinyingi
12Kristo aveeye kuli muviri mulala goveeye ni vivero vinyingi. Kali niiva goveeye ni vivero vinyingi gukikiri vuzwa muviri mulala. 13Munzira ndala nzere, kunyi kwosi nikuva nikoveeye Avayuda anoho vandu vizihiiri, avatugwa anoho vavoholore, kwabatizwa na Roho mulala ma ni kuva muviri mulala kandi Nyasaye yahaana ku kunyi vosi Roho mulala mu mioyo jitu.
14Muviri gwene sigwalombwa ne kevero kilala chenyine mba, navuzwa, goveeye ni vivero vinyingi. 15Niiva ekerenge kinyala kovora, “Kigira simbeeye mukono, inzi simbeeye mulala ku muviri mba,” yaga siganyala kokora kerenge kivuli kuva kilala ku vivero viu muviri mba; 16Kandi niiva ugutu gunyala kovora, “Kigira simbeeye emoni, inzi simbeeye kilala ku vivero vu muviri mba,” yaga siganyala kokora emoni ivuli kuva ndala ku vivero viu muviri mba. 17Niiva muviri gwosi gwakaveeye vuzwa emoni, gwakahulira ndi? Niiva umuviri gwosi gwakaveeye ugutu, gwakafunyirizi ndi? 18Navuzwa kuli gaveeye, Nyasaye yalohiza vivero mu muviri sa kilala kuli mwene atovoraa. 19Niiva vivero viosi via kaveeye kevero kilala, umuviri gwaali gove hayi? 20Agiligali gaveeye ndi vivero viu muviri viveeye vinyingi, navuzwa muviri goveeye mulala.
21Kunangwa, emoni sinyala kovoolera mukono, “Sinyenyaa ivi mba!” Anoho mutwi kovolere virenge, “Si nyenya munyi mba!” 22Sigaveeye ndio mba. Ivivero viu muviri vilolekaa kuva ndi nividedekere nivio vienyekaa ligali kuvita; 23kandi vivero viu muviri viakuganaganaa viagehera luyali ligali, nivio via kodendaa ligali. Vivero viu muviri vitalolekaa kuva vilahi ligali, nivio videndwa no kohenzerizwa ligali, 24lwi vivero vindi viu muviri viveeye vilahi siviveeye ni lienya kulindwa mba navuzwa, Nyasaye mwene yalohiza vivero viu muviri kandi yahaana luyali lonene ligali ku vivero viageherwa luyali yilwo. 25Kulwayago iliavukana mu muviri litavaho mba, navuzwa ivivero viagwo viosi viduuki kohendera vivero vindi viene. 26Niiva kevero kilala chu muviri kisalira, vivero vindi viosi visaliraa harara nacho. Niiva kevero kilala kilizominywa, vivero vindi viosi vihambanaa mu lisangala harara nacho.
27Munyi mwosi muveeye muviri gwa Kristo, kandi sa mulala ku munyi aveeye kevero chu muviri yigwo. 28Nyasaye yatovola mundu sa mulala mu likanisa mu vwiyangu vwivwe. Mu vwiyangu vwukutanga, yatovola avatumwa, mu vwiyangu vwakaviri na vaporofeti vakavaga na avigizi; maku nalondiza ku vayinziri vi kihanwa chu kokora vilolekizu; kandi yalondiza ku yavo vahevwa izingulu zio kohonyia, anoho kokoonya vandi na viimiliri, kandi yavo vamoloma mu zinimi zing'eni. 29Vosi sivaveeye avatumwa, anoho avaporofeti, anoho avigizi, anoho avikihaanwa cho kokora vilolekizu mba. 30Vosi sivaveeye ni kihanwa chu kohonyia avalwaye, anoho cho komoloma mu zinimi zing'eni, kandi sivagirung'anyia zinimi vosi mba. 31Kunangwa mwenye vihaanwa vinene ligali kuvita.
Kalunu ndamumanyia inzira eveeye indahi ligali kuvita.
Uvuyanzi vwu Vukristayo
Iliyochaguliwa sasa
1 VAKORINZO 12: LOGOOLI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©Bible Society of Kenya, 2019