ʻO KA ʻEPISETOLE A PAULO KA LUNAʻŌLELO I KO ROMA 3
3
MOKUNA III.
1 He ʻōlelokīkē me kā Iudaio hoʻomaloka. 9 Nā mea ʻē aʻe e hewa ai ka poʻe Iudaio. 21 Ma ka manaʻoʻiʻo wale nō e hoʻāpono ʻia ai, ʻaʻole ma ke Kānāwai.
1¶ No ia hoʻi, he aha anei ka mea e ʻoi aku ai kā Iudaio? He aha hoʻi ka pōmaikaʻi o ke ʻoki poepoe ʻana?
2He nui nō ma kēlā mea, ma kēia mea; eia hoʻi ka mua, ua hāʻawi ʻia mai iā lākou nā kānāwai o ke Akua.
3He aha hoʻi i manaʻoʻiʻo ʻole kekahi poʻe? E hiolo anei ka ʻoiaʻiʻo o ke Akua i ko lākou hoʻomaloka?
4ʻAʻole loa ia; akā, e hōʻoiaʻiʻo ʻia aku ke Akua ke hoʻopunipuni nā kānaka a pau: me ka mea i palapala ʻia,
“«I hoʻāpono ʻia ai ʻoe i kāu ʻōlelo ʻana mai,
A i lanakila hoʻi ʻoe i kou hoʻāhewa ʻana mai».”
5A inā e hoʻākāka aʻe ko kākou hewa i ka pono o ke Akua, he aha kā kākou mea e ʻōlelo ai? He pono ʻole anei ke Akua ke hoʻoili mai i ka inaina? (Ke ʻōlelo nei au ma kā ke kanaka.)
6ʻAʻole loa: inā pēlā, pehea lā e hoʻopaʻi mai ai ke Akua i ko ke ao nei?
7A inā i lilo ka ʻoiaʻiʻo o ke Akua i mea e nui ai kona nani, no koʻu hoʻopunipuni ʻana; no ke aha lā e hoʻohewa ʻia mai ai au e like me ke kanaka hewa?
8E ʻōlelo anei kākou, e like me kā mākou i ʻōlelo ʻino ʻia mai ai, a e like me kā kekahi poʻe i ʻōlelo no mākou, “E hana hewa kākou e hiki mai ai ka maikaʻi?” He pono ko lākou hoʻohewa ʻia.
9¶ He aha hoʻi? Ua ʻoi aku anei kākou? ʻAʻole loa; no ka mea, ua hoʻākāka mākou ma mua, ʻo nā Iudaio a me nā Helene, ua pau pū lākou i ka hewa;
10e like me ka mea i palapala ʻia,
“«ʻAʻole loa he mea pono, ʻaʻole hoʻokahi.
11“ʻAʻole nō he mea i ʻike,
ʻAʻole hoʻi he mea i ʻimi i ke Akua.
12“Ua pau lākou i ka hele hewa, ua lilo lākou i poʻe pono ʻole;
ʻAʻole loa he mea e hana ana i ka maikaʻi,
ʻAʻole loa hoʻokahi.”
13“ʻO ko lākou kaniʻāʻī he lua kupapaʻu hāmama;
Ua hoʻopunipuni lākou me ko lākou mau alelo;”
“Aia ma lalo o ko lākou mau lehelehe ka mea make a nā moʻo niho ʻawa.”
14“Ua piha ko lākou waha i ka hāʻiliʻili a me ka mea ʻawahia.”
15“Ua māmā ko lākou mau wāwae i ka hoʻokahe koko.
16Aia ma ko lākou mau alanui ka luku ʻana a me ka pōpilikia.
17ʻAʻole hoʻi lākou i ʻike i ke alanui e malu ai.”
18“ʻAʻole he weliweli i ke Akua i mua o ko lākou mau maka».”
19¶ Ua ʻike nō kākou, ʻo nā mea a ke Kānāwai i ʻōlelo mai ai, ua ʻōlelo nō ia i ka poʻe ma lalo o ke kānāwai; i paʻa nā waha a pau, a i lilo hoʻi ko ke ao nei a pau i hewa i mua o ke Akua.
20No laila ma ka hana ʻana ma ke Kānāwai, ʻaʻohe kanaka e hoʻāpono ʻia i mua ona; no ka mea, ma ke Kānāwai ka ʻike ʻana i ka hewa.
21¶ ʻĀnō hoʻi, ua hoʻākāka ʻia mai ko ke Akua hoʻāpono ʻana ʻaʻole ma ke Kānāwai; ua hōʻike ʻia mai ia e ke Kānāwai a me nā Kāula.
22ʻO ia hoʻi ka hoʻāpono ʻana o ke Akua, ma ka manaʻoʻiʻo aku iā Iesū Kristo, no nā mea a pau, a ma luna hoʻi o ka poʻe a pau e manaʻoʻiʻo ana; ʻaʻole mea ʻokoʻa;
23no ka mea, ua lawehala nā mea a pau, ua nele hoʻi i ka nani o ke Akua,
24ua hoʻāpono wale ʻia mai ma kona lokomaikaʻi, no ka hoʻōla ʻana ma o Kristo Iesū lā;
25ʻo ia kā ke Akua i hāʻawi mai ai i mōhai kala hewa ma ka hilinaʻi i kona koko, i mea e hoʻākāka ai i kona hoʻāpono ʻana, i ke kala ʻana i nā hewa i hana ʻē ʻia ma mua, i ke ahonui ʻana o ke Akua;
26i mea e hoʻākāka ai i kona hoʻāpono ʻana, i kēia manawa; i pono ʻo ia, a i mea hoʻāpono hoʻi i ka mea manaʻoʻiʻo iā Iesū.
27ʻAuhea lā hoʻi ke kaena ʻana? Ua pale ʻia aku ia. Ma ke kānāwai hea? ʻO nā hana anei? ʻAʻole; ma ke kānāwai nō hoʻi o ka manaʻoʻiʻo ʻana.
28No laila, ke manaʻo nei mākou, ua hoʻāpono ʻia mai ke kanaka ma ka manaʻoʻiʻo, ʻaʻole ma nā hana o ke Kānāwai.
29ʻO ke Akua nō anei ia no ka poʻe Iudaio wale nō? ʻAʻole no nā kānaka ʻē kekahi? ʻO ia, no nā kānaka ʻē kekahi.
30No ka mea, ʻo ia hoʻokahi nō ke Akua nāna e hoʻāpono i ka poʻe i ʻoki poepoe ʻia, ma ka manaʻoʻiʻo, a i ka poʻe i ʻoki poepoe ʻole ʻia hoʻi ma ka manaʻoʻiʻo.
31¶ Ke hoʻohiolo nei anei mākou i ke Kānāwai, ma ka manaʻoʻiʻo? ʻAʻole loa; ke hoʻokūpaʻa nei nō mākou i ke Kānāwai.
Iliyochaguliwa sasa
ʻO KA ʻEPISETOLE A PAULO KA LUNAʻŌLELO I KO ROMA 3: KBH
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Ka Baibala Hemolele © Partners Development Foundation, 2018.
