ʻO KA ʻEPISETOLE A PAULO KA LUNAʻŌLELO I KO ROMA 2
2
MOKUNA II.
1 Ua hewa like nā Iudaio a me nā Helene i ke Akua.
1¶ No laila hoʻi, e ke kanaka, ka mea nāna e hoʻohewa aku, ʻaʻole ou mea e hoʻāpono ʻia ai; no ka mea, i kou hoʻāhewa ʻana i kekahi, ua hoʻāhewa ʻoe iā ʻoe iho, no kāu hana ʻana i nā mea āu i hoʻāhewa aku ai.
2Ua ʻike nō kākou, ma ka pono kā ke Akua hoʻāhewa ʻana mai i ka poʻe e hana ana ia mau mea.
3E ke kanaka, ka mea nāna e hoʻāhewa i ka poʻe e hana pēlā, a ke hoʻohālike nei ʻoe me lākou, ke manaʻo nei anei ʻoe e pakele i kā ke Akua hoʻāhewa ʻana mai?
4A ke hoʻowahāwahā nei anei ʻoe i ka nui loa o kona lokomaikaʻi, a me kona ahonui, a me kona hoʻomanawanui ʻana, ʻaʻole hoʻi ʻoe i hoʻomaopopo, ʻo ko ke Akua maikaʻi, ʻo ka mea ia e alakaʻi iā ʻoe i ka mihi?
5Akā, ma muli o kou paʻakikī a me ka naʻau mihi ʻole e hoʻāhu ana ʻoe nou iho i ka inaina no ka lā e inaina ʻia mai ai, a e hōʻike ʻia mai ai hoʻi ka hoʻāhewa pono ʻana mai a ke Akua;
6nāna nō «e uku mai i kēlā kanaka i kēia kanaka e like me kāna hana ʻana»:
7i ka poʻe e ʻimi ana i ka nani, a me ka mahalo, a me ka make ʻole, ma ka hoʻoikaika mau ʻana i ka hana maikaʻi, i ke ola loa;
8akā, i ka poʻe i hoʻopaʻapaʻa, me ka mālama ʻole i ka ʻōlelo ʻoiaʻiʻo, a mālama hoʻi ma ka hewa, iā lākou ka huhū a me ka inaina ʻia.
9ʻO ka pōʻino, a me ka ʻehaʻeha ma luna o ka ʻuhane o kēlā kanaka o kēia kanaka e hana ana i ka hewa; ʻo kā Iudaio mua, a ʻo kā Helene hoʻi;
10akā, ʻo ka nani, a me ka mahalo, a me ka pōmaikaʻi, no nā mea a pau e hana ana i ka pono; no kā Iudaio mua a no kā Helene hoʻi.
11No ka mea, ʻaʻole ke Akua i manaʻo mai ma ko ka helehelena.
12No ka mea, ʻo nā mea Kānāwai ʻole a pau i hana hewa, e make Kānāwai ʻole lākou; a ʻo nā mea a pau i hana hewa ma lalo o ke Kānāwai, e hoʻāhewa ʻia lākou ma ke Kānāwai;
13(no ka mea, ʻaʻole ka poʻe lohe wale nō i ke Kānāwai ka pono i mua o ke Akua; akā, ʻo ka poʻe e mālama i ke Kānāwai e hoʻāpono ʻia ana.
14No ia hoʻi, ʻo ka poʻe kānaka ʻē, ka poʻe Kānāwai ʻole, inā ma ko lākou manaʻo maoli i hana ai lākou i nā mea ma loko o ke Kānāwai, ʻo kēia poʻe Kānāwai ʻole, he kānāwai lākou no lākou iho nō;
15a e hōʻike nei hoʻi lākou, ua kākau ʻia ka pono a ke Kānāwai ma ko lākou mau naʻau, a ua hōʻoiaʻiʻo ko lākou lunamanaʻo, e hoʻāhewa ana, a e hoʻāpono ana ko lākou mau naʻau iā lākou iho);
16i ka lā a ke Akua e hoʻopaʻi ai i nā mea huna a nā kānaka, ma o Iesū Kristo lā, e like me kaʻu ʻeuanelio.
17¶ Inā ua kapa ʻia aku ʻoe “he Iudaio,” a ua hilinaʻi iho ʻoe ma ke Kānāwai, ua hāʻano i ke Akua,
18a ua ʻike ʻoe i kona makemake, ua hoʻāʻo hoʻi i nā mea ʻano ʻē, ua aʻo ʻia ʻoe ma ke Kānāwai;
19ua manaʻo iho hoʻi ʻoe, he alakaʻi ʻoe no nā makapō, he mālamalama hoʻi no ka poʻe i loko o ka pouli;
20he mea nāna e aʻo i ka poʻe naʻaupō, he kumu hoʻi na nā kamaliʻi, ua loaʻa hoʻi iā ʻoe ke ʻano o ka ʻike, a me ka ʻoiaʻiʻo i loko o ke Kānāwai;
21ʻo ʻoe ke aʻo aku iā haʻi, ʻaʻole anei ʻoe e aʻo iā ʻoe iho? ʻO ʻoe ke pāpā aku, mai ʻaihue, e ʻaihue nō anei ʻoe?”
22ʻO ʻoe ke ʻōlelo aku, mai moekolohe, e moekolohe nō anei ʻoe? ʻO ʻoe ke hoʻopailua i nā kiʻi, e ʻaihue nō anei ʻoe i nā mea laʻa?
23ʻO ʻoe ke hāʻano aku i ke Kānāwai, e hōʻino nō anei ʻoe i ke Akua ma ka haʻihaʻi ʻana i ke Kānāwai?
24No ka mea, “«Ua ʻōlelo ʻino ʻia aʻe ka inoa o ke Akua i waena o nā kānaka ʻē, ma o ʻoukou lā»,” e like me ka mea i palapala ʻia.
25ʻO ke ʻoki poepoe ʻana, he mea ia e pono ai, ke mālama ʻoe i ke Kānāwai; akā, inā haʻihaʻi ʻoe i ke Kānāwai, ua lilo kou ʻoki poepoe ʻana i ʻoki poepoe ʻole ʻana.
26A inā ʻo ka mea i ʻoki poepoe ʻole ʻia e mālama i nā kauoha o ke Kānāwai, ʻaʻole anei e manaʻo ʻia kona ʻoki poepoe ʻole ʻana, me he ʻoki poepoe ʻana lā?
27A ʻo ka mea i mālama i ke Kānāwai ma muli o kona hānau ʻana a me ke ʻoki poepoe ʻole, e hoʻāhewa ʻo ia iā ʻoe i ka mea i loaʻa ka palapala a me ke ʻoki poepoe ʻia, a i lilo hoʻi i mea haʻihaʻi i ke Kānāwai.
28No ka mea, ʻo ka mea e Iudaio ana ma waho, ʻaʻole ia he Iudaio; ʻaʻole hoʻi ka mea ma waho ma ke kino, ke ʻoki poepoe ʻana.
29Akā, ʻo ka mea e Iudaio ana ma loko, ʻo ia kā Iudaio; a ʻo ke ʻoki poepoe ʻana, no ka naʻau ia, ma ka ʻUhane, ʻaʻole ma ka hua palapala; ʻaʻole no nā kānaka kona hoʻomaikaʻi ʻia, no ke Akua mai nō.
Iliyochaguliwa sasa
ʻO KA ʻEPISETOLE A PAULO KA LUNAʻŌLELO I KO ROMA 2: KBH
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Ka Baibala Hemolele © Partners Development Foundation, 2018.
