KA ʻEUANELIO I KĀKAU ʻIA AI E MATAIO 16
16
MOKUNA XVI.
1 ʻImi mai nā Parisaio i hōʻailona. 6 Ka mea hū a ka poʻe Parisaio. 13 Ko kānaka manaʻo no ka Mesia, 16 Hōʻoia mai ʻo Petero iā ia. 21 Hōʻike mua mai ʻo Iesū i kona make, 23 a ua aʻo aku iā Petero. 24 ʻO ka poʻe hahai iā ia, e halihali lākou i kona keʻa.
1¶ Hele maila nā Parisaio a me nā Sadukaio; hoʻāʻo maila lākou iā ia, nonoi maila, e hōʻike aku iā lākou i hōʻailona mai ka lani mai.
2ʻŌlelo akula ʻo ia iā lākou, ʻī akula, “I ke ahiahi, ʻōlelo nō ʻoukou, ‘E mālie auaneʻi; no ka mea, ke ʻulaʻula maila ke ao.’
3“I ke kakahiaka hoʻi, ‘He lā ʻino kēia; no ka mea, ua ʻulaʻula mai ke ao, ua hākumakuma.’ E ka poʻe hoʻokamani, ke ʻike nei ʻoukou i ke kilo i nā ʻōuli o ke ao; ʻaʻole anei ʻoukou i ʻike i nā hōʻailona o nēia manawa?
4“Ke makemake nei kekahi hanauna ʻino moekolohe i hōʻailona; ʻaʻole hoʻi e hāʻawi ʻia ka hōʻailona iā lākou, ʻo ka hōʻailona a Iona a ke kāula wale nō.” A haʻalele akula ʻo ia iā lākou a hele akula.
5¶ I ka holo ʻana o kāna poʻe haumāna ma kēlā ʻaoʻao, poina ihola iā lākou ke lawe pū mai i ka berena.
6ʻĪ maila ʻo Iesū iā lākou, “E ao iā ʻoukou iho e makaʻala i ka mea hū a ka poʻe Parisaio a me ka poʻe Sadukaio.”
7Wā ihola lākou iā lākou iho, ʻī aʻela, “No ko kākou lawe ʻole mai i ka berena kēia mea.”
8ʻIke mai ʻo Iesū, ʻī maila iā lākou, “He aha kā ʻoukou e wā iho nei iā ʻoukou iho, e ka poʻe paulele kāpekepeke, no ko ʻoukou lawe ʻole mai i ka berena?
9“ʻAʻole anei ʻoukou i ʻike, ʻaʻole hoʻi ʻoukou hoʻomanaʻo i nā pōpō berena ʻelima, na ka poʻe ʻelima tausani, ʻehia nā hīnaʻi piha a ʻoukou i hōʻiliʻili ai?
10“ʻAʻole hoʻi i nā pōpō berena ʻehiku na ka poʻe ʻahā tausani, ʻehia nā hīnaʻi piha a ʻoukou i hōʻiliʻili ai?
11“He aha hoʻi kā ʻoukou i hoʻomaopopo ʻole ai, ʻaʻole no ka berena kaʻu i ʻōlelo aku ai iā ʻoukou, e makaʻala iā ʻoukou iho i ka mea hū a ka poʻe Parisaio a me ka poʻe Sadukaio?”
12A laila, ʻike maopopo ihola lākou, ʻaʻole ia i ʻōlelo mai e makaʻala i ka mea hū berena; akā, i ke aʻo ʻana a ka poʻe Parisaio a me ka poʻe Sadukaio.
13¶ I ka hele ʻana aku o Iesū i ka ʻāina o Kaisareia Pilipi, nīnau maila ia i kāna poʻe haumāna, ʻī maila, “ʻO wai lā wau, ke Keiki a ke Kanaka, i kā nā kānaka ʻōlelo?”
14ʻĪ akula lākou, “ʻO Ioane Bapetite i kā kekahi, ʻo ʻElia i kā kekahi, ʻo Ieremia i kā kekahi, a i ʻole ia, ʻo kekahi nō o ka poʻe kāula.”
15Nīnau maila ʻo ia iā lākou, “ʻO wai hoʻi wau i kā ʻoukou nei ʻōlelo?”
16ʻŌlelo akula ʻo Simona Petero, ʻī akula, “ʻO ʻoe nō ka Mesia, ke Keiki a ke Akua ola.”
17ʻŌlelo maila ʻo Iesū, ʻī maila iā ia, “Pōmaikaʻi ʻoe, e Simona ke keiki a Iona; no ka mea, ʻaʻole na ke kanaka ia i hōʻike mai iā ʻoe; akā na koʻu Makua nō i loko o ka lani.
18“Ke ʻōlelo aku nei hoʻi au iā ʻoe, ʻo ʻoe nō ʻo Petero, a ma luna o kēia pōhaku e kūkulu ana au i koʻu ʻekalesia, ʻaʻole hoʻi e lanakila mai nā ʻīpuka o ka pō ma luna ona.
19“E hāʻawi aku hoʻi au iā ʻoe i nā kī o ke aupuni o ka lani; a ʻo ka mea e hoʻopaʻa ʻia e ʻoe ma ka honua nei, e hoʻopaʻa ʻia hoʻi ʻo ia ma ka lani; a ʻo ka mea e kuʻu ʻia e ʻoe ma ka honua nei, e kuʻu ʻia hoʻi ʻo ia ma ka lani.”
20A laila, pāpā maila ia i kāna poʻe haumāna, ʻaʻole lākou e haʻi aku i kekahi, ʻo ia ka Mesia.
21¶ Mai ia wā mai i hoʻomaka ai ʻo Iesū e hōʻike mai i kāna poʻe haumāna, he pono nona ke hele aku i Ierusalema, a e hoʻomāinoino nui ʻia e ka poʻe lunakahiko, a me ka poʻe kāhuna nui, a me ka poʻe kākau ʻōlelo, e pepehi ʻia hoʻi ia a make, a pō ʻakolu aʻe e ala hou mai ai.
22Lālau akula ʻo Petero iā ia, hoʻomaka e aʻo akula iā ia, ʻī akula, “E aloha ʻia mai ʻoe, e ka Haku; ʻaʻole loa ʻoe e hana ʻia pēlā.”
23Hāliu aʻela kēlā, ʻī maila iā Petero, “E hele ʻoe pēlā ma hope oʻu, e Sātana. He mea hihia ʻoe noʻu; no ka mea, ʻaʻole ʻoe e manaʻo nei e like me kā ke Akua, ʻo kā ke kanaka kāu e manaʻo nei.”
24A laila, ʻī maila ʻo Iesū i kāna poʻe haumāna, “ʻO ka mea makemake e hele ma muli oʻu, e hōʻole kēlā iā ia iho, e hāpai hoʻi ia i kona keʻa, a e hahai mai iaʻu.
25“No ka mea, ʻo ka mea e manaʻo ana e mālama i kona ola, e lilo ana ia mea; akā, ʻo ka mea e haʻalele i kona ola noʻu, e loaʻa iā ia ke ola.
26“He aha ka pōmaikaʻi no ke kanaka ke loaʻa iā ia kēia ao a pau, a lilo aku kona ʻuhane? He aha hoʻi kā ke kanaka e hāʻawi aku ai i uku no kona ʻuhane?
27“E hele mai nō ke Keiki a ke Kanaka i loko o ka nani o kona Makua me kona poʻe ʻānela; a laila ‹e uku aku ia i kēlā kanaka i kēia kanaka e like me kāna hana ʻana›.
28“He ʻoiaʻiʻo kaʻu e ʻōlelo aku nei iā ʻoukou, ʻo kekahi poʻe e kū mai nei, ʻaʻole lākou e hoʻāʻo ʻē i ka make, a ʻike lākou i ke Keiki a ke Kanaka e hele mai ana i kona aupuni.”
Iliyochaguliwa sasa
KA ʻEUANELIO I KĀKAU ʻIA AI E MATAIO 16: KBH
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Ka Baibala Hemolele © Partners Development Foundation, 2018.
