ỤBANỤ 40
40
Tishikicingo tu Udulo Ata
1Nazhɛ AGWANGWAMA hiɛŋ Moses, 2Shikicingo udulo ata ụ tu'ulwatagwụ nụ ụjita uhiiŋ nu upiana uhiiŋ. 3Shiyono Ikpɛtɛ ɛtɛ Unu-tutwa na amɛ ubwa, maa kaa jɛlanɛ ikpɛtɛ ɛtɛ no tugwuno to odubo. 4Bɛ shɛ bo tocingo uteburu na amɛ ubwa, maa shemeni i'wɛŋni'wɛŋni ibwɛ nu umama 'wanụ ni ihiŋhiŋ ubwa. Tocingo du uteburu ụsụtụla na amɛ ubwa, maa petengeni asụtụla ni ihiŋhiŋ ubwa. 5Shikicingo utukwu ata wa azhɛnarɛya iturɛre tuhwoŋzhingo nu umbe Ikpɛtɛ ɛtɛ Unu-tutwa, maa sweci tugwuno tu tukapa no odubo ohwolu ata tijilo. 6Shikicingo utukwu-ụrụpɛ tuhwoŋzhingo nu umbe odubo udulo ata ụ tu'ulwatagwụ. 7Sho ugbamgbam ata tumama nyashɛnga na ashashɛ udulo ata ụ tu'ulwatagwụ nu utukwu-ụrụpɛ, ma zweni meni na amɛ ubwa. 8Ndana uŋ ukpogwu tutu rungwutwonu maa sweci ibɛgɛlɛ tugwuno no odubo ukpogwu ata.
9Shapa manɛbɛ mu tududugono maa dudugeni udulo ata, medenji iyi elele nɛ zweni na amɛ ubwa, maa njɛ uŋ tijilo, ti i'wɛŋni'wɛŋni ibwɛ kpaaŋ iwɛ maa ụ shɛ tijilo. 10Dudugono du utukwu ata ụrụpɛ u tuhwoŋzhingo manɛbɛ, ti i'wɛŋni'wɛŋni ibwɛ kpaaŋ, maa njɛ utukwu ata ụrụpɛ tijilo, nazhɛ utukwu ata ụrụpɛ zhɛ wa sha tijilo me tijilo. 11Dudugono ugbamgbam ata tumama nyashɛnga manɛbɛ, tu ụkwụka ubwa, ma njɛ uŋ tijilo. 12Nazhɛ shapa Aron keeni miaụŋ mu bwa me eyi no odubo udulo ata ụ tu'ulwatagwụ, maa dụrɛ aŋ meni, 13Hwuŋtono Aron n-nduka ma ata mi tijilo mu tuwururu, maa dudugeni bu manɛbɛ, maa shiri bu swooŋ, iwɛ maa ma n ndana ugondu u tunongbo. 14Suje miaụŋ mu bwa me eyi maa hwuŋtengeni aŋ n-nduka ma ata mu gwụmwatangwụ, 15maa dudugeni aŋ manɛbɛ, gana na ebu dudugeni bishi ba aba, iwɛ maa a n ndanɛ tunongbo. Manɛbɛ ma ata ee dudugeni aŋ mɛ shɛ iwɛ maa a shɛ onongbo na alamụ aba tutu.
Unu Moses Tuhwuga
16Go Moses njɛ iyi elele te teni cɛŋ gana na AGWANGWAMA peni bu unu. 17E shikicinji udulo ata nụ ụjita uhiiŋ nu upiana uhiiŋ nu uywa uyebi [ta a banɛ ni Ijipti].
18Go Moses shikicinji udulo ata, baa shɛrɛ akatakpa ubwa, bee shikecenji shɛkpada shɛ bwa, bee shikecenji atukpa ubwa, bee hwuŋtengeni imbele ibwɛ. 19Nazhɛ bee berishiji tugwuno bee urigeni ohwolu ata tijilo keeni tu'urugono tu udulo ata na azuba, te teni cɛŋ gana na ta AGWANGWAMA peni bu unu. 20Bee zweni atayɛ ata tiseyida na amɛ Ikpɛtɛ ɛtɛ, bee hwuŋtengeni imbele na tɛkanɛ ti ikpɛtɛ ɛtɛ. Bee peteni ajɛjɛ ata inyɛmɛnyɛmɛ na azuba ibɛ. 21Bee tecinji ikpɛtɛ ɛtɛ nu udulo ata, bee berishiji tugwuno, baa jɛlanɛ Ikpɛtɛ ɛtɛ Unu-tutwa gana na ta AGWANGWAMA peni bu unu.
22Nazhɛ bee tecinji uteburu nu udulo ata ụ tu'ulwatagwụ; tuzuba tu udulo ata no tupohondo to tugwuno ta ata ti kepi odubo amɛ. 23Bee shemeni ibrɛd ɛtɛ ee peni AGWANGWAMA nu umama 'wanụ ni ihiŋhiŋ ubwa nu umbe AGWANGWAMA, te teni cɛŋ gana na ta AGWANGWAMA peni bu unu. 24Bee tecinji du uteburu ụsụtụla nu udulo ata ụ tu'ulwatagwụ tuta tu udulo ata, waa mama ngbarakanụ nu uteburu ata. 25Bee zweni asụtụla ata ulwa nu umbe AGWANGWAMA, gana na ta AGWANGWAMA peni bu unu. 26Bee tecinji utukwu-ụrụpɛ ata wa azhɛnarɛya nu udulo ata ụ tu'ulwatagwụ nu umbe tugwuno ta ata tɛ jɛlanɛ uŋ. 27Bee hwoŋzhinji iturɛre ụhiụŋ ụlatụ ni ihiŋhiŋ ubwa; gana na ta AGWANGWAMA peni bu unu. 28Bee sweci tugwuno to odubo udulo ata ụ tu'ulwatagwụ no ogwungwu tuba. 29Nazhɛ bee shikicinji utukwu-ụrụpɛ tuhwoŋzhingo no odubo udulo ata tu'ulwatagwụ, bee peni ụrụpɛ tuhwoŋzhingo, nu una tuswa ni ihiŋhiŋ ubwa; gana na ta AGWANGWAMA peni bu unu. 30Bee shi ugbamgbam ata ụ'wụtụ idurɛ na ashashɛ udulo ata ụ tu'ulwatagwụ nu utukwu-ụrụpɛ, bee zweni meni nu bwa. 31Na muba go Moses na Aron keeni miaụŋ ma Aron me eyi a nyashɛnga shivwɛvwɛjɛ sha aba; 32ta aka elele na ee teni nu udulo ata ụ tu'ulwatagwụ keeni aka na to o gwumwonu nu utukwu ata ụrụpɛ a mama nyashanga gana na ta AGWANGWAMA peni bu unu. 33Baa njɛ ukpogwu boo rungwutwonu udulo ata ụ tu'ulwatagwụ, bee sweci tugwuno to odubo ukpogwu ata. Gana go Moses njɛ baa kwunanjɛ ugondu ata kpaaŋ ta.
34Nazhɛ udomu ubeni udulo ata ụ tu'ulwatagwụ, nazhɛ ụjɛrụma wa AGWANGWAMA shini amɛ ohwolu ata tijilo.#1 Shɛgwu 8:10,11; Ayiz 6:4; Izik 43:4,5; N-ndu 15:8 35Go Moses eri shi bo tono ya na amɛ udulo ata ụ tu'ulwatagwụ o, iwɛnɛ tu udomu patanɛ nu bwa, ụjɛrụma wa AGWANGWAMA kaa shini amɛ ohwolu ata tijilo. 36Aka elele na tu udomu ata pashɛngwa nu udulo ata, nazhɛ E'isrɛl a shɛdɛnga tahaŋnụ ta aba. 37Ama yaa shɛ udomu ta pashɛngwa sụ nu udulo ata, asha a ta zha shɛ a shɛdɛnga tahaŋnụ ta aba o, semi nụ ụjita na udomu ata pashɛngwa nu bwa, gana yaa shɛ na tahaŋnụ ta aba tutu ta. 38Udomu wa AGWANGWAMA wo ubono nu udulo ata na aka bu uwaŋna, ulwa wa nama na amɛ udomu ata na aka bụ ụjita. Gabata eshe miaụŋ mi ihwɛ Isrɛl kpaaŋ a kwụba iŋ tutu ukwunanga tahaŋnụ ta aba.
Iliyochaguliwa sasa
ỤBANỤ 40: RBT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Rubassa Bible © Bible Society of Nigeria, 2008