ỤBANỤ 39
39
I'wɛŋnɛ nɛ Onongbo Zhɛ no Urugono
(Ụban 28:1-14)
1Nazhɛ ee tegeni i'wɛŋnɛ tuhwuŋtono iwɛ ugondu wo ohwolu ata tijilo ni ihwehwe uduhwa wa ababa, nu uduhwa ushenje, ni inɛ ushenje howuu. Ee tegeni du i'wɛŋnɛ tijilo iwɛ Aron, te teni cɛŋ nu gana na ta AGWANGWAMA peni Moses unu.
2Nazhɛ aa njɛ efod na azhɛnarɛya keeni ihwehwe uduhwa wa ababa, ni inɛ uduhwa ushenje, ni inɛ ushenje howuu, keeni inɛ ilinɛn nɛ aa hiɛŋshɛ tanɛ tanɛ. 3Ee jibi azhɛnarɛya lepe lepe ee begeji aŋ dere dere maa e zweni irikwi i tugwoni ni ihwehwe uduhwa wa ababa, nu uduhwa ushenje, ni inɛ ushenje howuu keeni inɛ ilinɛn nɛ aa hiɛŋshɛ tanɛ tanɛ. 4Aa njɛ akalagba otutu iwɛ efod a na oo to na akwunanga aba eyebi. 5Aa njɛ akalagba u tu'umpo ne embi na azhɛnarɛya, keeni ihwehwe uduhwa wa ababa, ni inɛ uduhwa ushenje, ni inɛ ushenje howuu, keeni ihwehwe ilinɛn nɛ aa hiɛŋshɛ tanɛ tanɛ; maa a shɛ bizhɛ bu ko ni ibɛ, te teni cɛŋ nu gana na ta AGWANGWAMA sekekeni Moses.
6Nazhɛ aa imanjɛ atayɛ onikis ee zweni aŋ na akalagba ata azhɛnarɛya, oo to aŋ i'nyɛtɛ gana na ta a ta ulamba useyida wa shɛgwuma, ee 'nyeci du nzeci mu miaụŋ-me-eyi mi Jekob umpwa na-muba-mi-yebi na aba. 7Nazhɛ boo to aŋ na akalagba otutu efod ata, iwɛ maa a shɛ titeyinje tu miaụŋ-me-eyi mi Jekob, te teni cɛŋ nu gana na ta AGWANGWAMA peni Moses unu.
Tɛnda ti iyi Tu'ubono na Agba
(Ụban 28:15-30)
8Nazhɛ aa njɛ iyi tu'ubono na agba, ugondu ibɛ ụ shɛ ugondu tugwoni gana na tu ugondu efod ụ shɛ. A njɛ iŋ na azhɛnarɛya, ti ihwehwe uduhwa wa ababa, ti inɛ uduhwa ushenje ti inɛ ushenje howuu, keeni inɛ ilinɛn nɛ aa hiɛŋshɛ tanɛ tanɛ. 9A njɛ ijɛ ɛtɛ tu'ubono na agba tụpa ti yebi; ogongo ibɛ eneshi a nangwụ, ụnjɛswa ibɛ shɛ ụbabasụ u'ala uko, uholo ibɛ ụ shɛ ụbabasụ u'ala uko, i momo potongonu ni inyɛ tụpa ti yebi. 10Ee seci atayɛ ata tusata ti neshi: Tusata ti hiiŋ tɛ shɛ sadius, nu Topaz, nu kabunkɛl; 11tusata ta aba ti yebi tɛ shɛ ɛmɛraled, nu safia, keeni diamond; 12tusata ta aba tụ tatụ tɛ shɛ jesint, na agati, keeni amɛtist; 13tusata ta aba ti neshi tɛ shɛ bɛrɛl, nu onɛkis, keeni jasipɛ. Azhɛnarɛya ee sweni no ofwo tutwatwagwụ ta atayɛ ata. 14Atayɛ ata namɛ umpwa-na-ba-eyebi, a 'yajɛ nzeci mu miaụŋ-me-eyi mi Jekob. E 'nyeci aŋ gana ulamba wa shɛgwuma, una una ni izeci ibwɛ, iwɛ alamụ miaụŋ mi Isrɛl umpwa-na-ba-eyebi. 15Aa njɛ du shɛgba shɛ na shɛ nɛ na azhɛnarɛya tụrụmbɛɛ gana ihwehwe nɛ aa hiɛŋshɛ, iwɛ maa o to iyi tu'ubono na agba. 16Aa njɛ du iyi tu'untangana ti ibɛ ti yebi na azhɛnarɛya, keeni tɛkanɛ ta azhɛnarɛya ti yebi, oo to tɛkanɛ ta ata ti yebi ni izhɛmi ya akalagba ata iyi tu'ubono na agba. 17Ee suji shɛgba she ebe sha azhɛnarɛya aa ga hiɛŋshɛ tanɛ tanɛ ee hwuŋtengeni shu na tɛkanɛ te ebe ti yebi oo go to ni izhɛmi ya akalagba iyi tu'ubono na agba. 18Nazhɛ ee suji ukwunanga shɛgba she ebe aa ga hiɛŋshɛ tanɛ tanɛ shi yebi, oo to shu ni ijɛ ɛtɛ tu'untangana iyebi. Gabata ee tegeni iŋ na akalagba otutu efod, na namɛ geri bu umbe ubwa. 19Nazhɛ aa njɛ tɛkanɛ ta azhɛnarɛya ti yebi, oo to tu nu ukwunanga izhɛmi iyi tu'ubono na agba zalụ hweehwe, to gwumwonu geri ba amɛ efod. 20Ee keeni tɛkanɛ ta ata ta azhɛnarɛya ti yebi tɛnda, oo to nụ ụzalụ tuta ta akalagba otutu efod geri ba amɛ ibɛ, to gwumwonu no ofwo tusotulonu ti ibɛ tuzuba ta akalagba efod. 21Ee shepi ezeje uduhwa wa ababa oo to na tɛkanɛ ta akalagba ata iyi tu'ubono na agba, ta tɛkanɛ te efod tu na ee umpi ni inyɛ, iwɛ maa i patana na azuba akalagba efod, iwɛ maa kede iyi tu'ubono na agba tufwurungwo ni efod o, te teni cɛŋ gana na AGWANGWAMA peni Moses unu.
Tɛnda tu N-nduka mi Nya iwɛ Onongbo
(Ụban 29:31-43)
22Aa njɛ idikɛ i'wɛtwɛ ni ihwehwe uduhwa wa ababa hwɛɛ iwɛ maa i patana na azuba efod. 23I'ilu idikɛ ɛtɛ namɛ na ashashɛ ibɛ, e zweni iŋ irikwi uuwa rungwutwonu gana i'ilu utogwo iwɛ maa kede i dwa o. 24Oo to apomɛgranati uduhwa wa ababa, nu uduhwa ushenje, nu una ushenje howuu, keeni inɛ ilinɛn nɛ aa hiɛŋshɛ tanɛ tanɛ nɛ tukwushɛ ti idikɛ ɛtɛ uuwa rungwutwonu. 25Nazhɛ aa njɛ ogogolo ɛruwɛjɛ na azhɛnarɛya tụrụmbɛɛ, ee shiyegeni ogogolo ata ɛruwɛjɛ no tuhwolu ta apomɛgranati nɛ tukwushɛ ti idikɛ ɛtɛ tutu rungwutwonu. 26Ee shiyeni ugogolo uko, o shiyono upomɛgranati uko tutu rungwutwonu tukwushɛ ti idikɛ ɛtɛ, maa o no hwuŋtono nu ugondu wa aba. Gana na ta AGWANGWAMA peni Moses unu.
27Nazhɛ ee tegeneni Aron keeni miaụŋ mu bwa me eyi n-nduka mu gwụmwatangwụ no tugwuno ti ihwehwe ilinɛn nɛ i nɛ, 28keeni ureweni ihwehwe ilinɛn nɛ i nɛ, keeni ufworo ihwehwe ilinɛn nɛ i nɛ, keeni uwereci ihwehwe ilinɛn nɛ aa hiɛŋshɛ tanɛ tanɛ. 29Umazhɛya ubwa ụ shɛ ihwehwe ilinɛn nɛ aa hiɛŋshɛ tanɛ tanɛ, keeni inɛ uduhwa wa ababa, nu uduhwa ushenje nu una ushenje howuu, ee zweni iŋ irikwi gana na ta AGWANGWAMA peni Moses unu.
30Nazhɛ ee jibi azhɛnarɛya lepe lepe iwɛ udara tijilo, ee 'nyeci nu bwa gana na ta a 'nyata ulamba wa shɛgwuma, ɛɛ hiɛŋ, Tijilo ta AGWANGWAMA. 31Ee umpi ezeje uduhwa wa ababa nu bwa, iwɛ ma o no umpo ureweni na azuba ubwa. Gana na ta AGWANGWAMA peni Moses unu.
E Hwuwi Ugondu ata, Nazhɛ go Moses Peni Aŋ Uwebiye
(Ụban 35:10-19)
32Gana aa kwunanjɛ ugondu udulo ata tu'ulwatagwụ kpaaŋ ta. E'isrɛl njɛ iyi elele te teni cɛŋ gana na ta AGWANGWAMA peni Moses unu. 33Nazhɛ aa shapɛ ohwolu ata tijilo, ti i'wɛŋni'wɛŋni ibwɛ hwɛɛ no ofwo Moses: ibɛ shɛ udulo ata, ta shɛkama shɛ bwa, ta shɛkpada shɛ bwa, ta abatana ubwa na azuba, ti imbele ibwɛ keeni akwụka ubwa. 34Ti i'wɛbɛ ya adagba igɛtɛ aa kwụnɛ iyi ishenje, ee urigeni uŋ na azuba, ti i'wɛbɛ iyweywe ɛtɛ ee peteni na azuba inɛ ɛtɛ, ti ibɛgɛlɛ tugwuno ɛtɛ ee kepi odubo; 35ti Ikpɛtɛ Unu-tutwa, ti imbele ibɛ keeni bɛjɛjɛ bi inyɛmɛnyɛmɛ bi ibɛ, 36tu uteburu, ti i'wɛŋni'wɛŋni ubwa kpaaŋ, ti ibrɛd ɛtɛ tijilo, #Ụban 25:30; 40:23; Liv 24:5-9 37tu uteburu ụsụtụla ata aa njɛ na azhɛnarɛya tụrụmbɛɛ, ta asụtụla ata ubwa ee shemeni ni ihiŋhiŋ ubwa, ti i'wɛŋni'wɛŋni ubwa kpaaŋ, ta manɛbɛ ma asụtụla ata iwɛ uhioko-uhwaŋna, 38tu utukwu-ụrụpɛ ata wa azhɛnarɛya, ta manɛbɛ mu tududugono, ti iturɛre ɛtɛ 'yajɛ ụhiụŋ ụlatụ, ti ibɛgɛlɛ ɛtɛ tugwuno aa swata no odubo udulo ata, 39tu utukwu utumburɛ ta agbahwụ ubwa ɛtumburɛ, ti imbele ibwɛ, ti i'wɛŋni'wɛŋni ibwɛ kpaaŋ, tu ugbamgbam ata u tumama nyashɛnga, keeni ụkwụka ubwa; 40to tugwuno ta ata ee kepi atukpa keeni akatakpa ukpogwu ata, ti ibɛgɛlɛ ɛtɛ tugwuno aa kapa odubo ukpogwu ata, ti ihwehwe ibwɛ, tu n-ngbalụ mu bwa, ti i'wɛŋni'wɛŋni ibwɛ kpaaŋ, inɛɛ nɛ aa njɛ ugondu nu udulo ata tu'ulwatagwụ; 41ti i'wɛŋnɛ tu'urugono ya anjɛ-ugondu no ohwolu ata tijilo, ti idikɛ ɛtɛ tijilo iwɛ Aron na shɛ bunongbo, tu n-nduka iwɛ miaụŋ mu bwa me eyi mu na mi zhɛ na nda ugondu tunongbo. 42Miaụŋ mi Isrɛl mɛ njɛ ugondu ata kpaaŋ te teni cɛŋ gana na ta AGWANGWAMA peni Moses unu.
43Nazhɛ go Moses heleji ugondu ata kpaaŋ, baa kwụbɛ maa a njɛ uŋ ga gana na ta AGWANGWAMA peni bu unu, ibɛ po bee peni aŋ uwebiye.
Iliyochaguliwa sasa
ỤBANỤ 39: RBT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Rubassa Bible © Bible Society of Nigeria, 2008