Utom Mme Abọsịd 9
9
Sọọl Akappa Esịd
1Ado Sọọl akesʌk akaka iso ke adikọbọ ye adidịkke mme mbed Abọọñ uwem. Anye amaadakka abịne ekamba aku 2akebo inọ imọ ñwed nọ iben ika mme sinakọk ke Damaskọs nọ ato do adieke akịtte awo ndomokeed do a-asañake ke usʌñ Krais, adooho awonwaan me awodeen, anye akoono ammọ ñkpọnọ anyọñ Yeruselem. 3Ke anye amaakesaña akpere Damaskọs, unwana ikañ amaato hefịn idaha-idaha ado ayamma akanna anye akʌk. 4Anye amaaduọ ke isọñ, anyʌñ akop uyio naña abo anye ate: “Sọọl, Sọọl, nsoo ido ntak a-afo añkọbọke miin?”
5Sọọl amaabịp abo, “Afo ado anie, Abọọñ?”
Abọọñ amaabọọrọ, “Ami ndo Yisọs a-afo akọbọke. 6Dakka da, nyʌñ saña dʌk esịd abio, ndin eyautemme se ana nte anam.”
7Mbon se ikisaña ye Sọọl emaeda ikanna uyio isio; ammọ emaekop uyio, ado ikikịtte awo ndomokeed. 8Sọọl amaadakka ada ke isọñ, ado ke anye amaaketaat anyen, ikikanna ikịt ñkpọ ndomokeed aba. Ke ntoro, emaemʌm anye ubọk eben ekaa Damaskọs. 9Anye amaatie usen ita ikịtte ñkpọ, idiaha ñkpọ, inyʌññọ inwọñ ñkpọ ndomokeed.
10Ndin mbed keed amaaba ke Damaskọs a-akekereke Ananayas. Abọọñ amaatañ ikọ anọ anye ke ñkukịd ate, “Ananayas!”
Anye amaabọọrọ ate, “Ii, Abọọñ se miin mi.”
11Abọọñ amaabo anye, “Dakka da nyʌñ kaa ufọk Yudas ke efaak akereke Nnen-Nnen, nyʌñ bịp baña Sọọl a-atooho Tasọs, sia anye asʌk abọñ akam. 12Anye a-akịt ke ñkukịd nte awo a-akereke Ananayas adidot anye ubọk nọ anye atịmme amọọnọ ñkpọ.”
13Do ke Ananayas akebọọrọ abo ate, “Abọọñ, ami mmekop uwak mbʌk nto uwak awo mbaña ete ami, ye uwak ndiọiñkpọ a-anye anamma ndisana awo mfo ke Yeruselem. 14Ndin anye adi mi ke adudu mme ñkpoon aku nọ amʌm afịd mbon e-ekoodo anyịñ mfo.”
15Ado Abọọñ amaabọọrọ Ananayas ate, “Kaa! Awo ami ado ñkpọutom a-ami mmekke nnịm nnọ idem mmi, nọ anye aben anyịñ mmi akesuan anọ mme Gentile ye mme ndidem ammọ ye nditọ Isrel. 16Ami ñyaawọt anye adaña uwak ukuud a-anaaha nte anye abọ ke ntak anyịñ mmi.”
17Ndin Ananayas amaadakka akaa ufọk a-Sọọl akebaaha, akedot anye ubọk abo ate: “Sọọl, ayịneka mmi, Abọọñ Yisọs a-awuọhọ uwọt fiin idem ke usʌñ ini a-afo akediighe andọñ utom unọọ, nọ ato do afo amaana akịt usʌñ anyʌñ ayọhọ ye Adisana Sịbidịd.” 18Ke ataa idahado, mme ñkpọ e-ekebaaha nte ikpọk emaediañña Sọọl ke anyen, ndin anye amaamaana amọọnọ ñkpọ. Anye amaadakka ada, emaenyʌñ eduọk anye mmọọñ, 19ndin ke anye amaakedia ndidia, amaatịmme anie adudu.
Sọọl ke Damaskọs ye Yeruselem
Sọọl amaaba ye mme mbed ke Damaskọs ke ñkpọ nte usen ifañ. 20Inikeed-inikeed anye amaatọọñọ adikwọrọ ikọ ke mme sinakọk, abo ke Yisọs ado Ayịn Abasi. 21Ado idem amaakpa afịd mbon ekekoppo naña anye akekwọrọ ikọ, ammọ emaenyʌñ ebịp ebo, “Idooho awo a-akesitʌkkọke mbon e-ekekoodo anyịñ Yisọs ke Yeruselem, akenyʌññọ adi Damaskọs ke ukem ntak ado, nọ ato do amuum mme mbed nte mbon ñkpakọb asọk mme ñkpoon aku ado mi?” 22Ado Sọọl amaakaa iso akop adudu, anyʌñ anam idem akpa mme Yuu ekedʌññọ ke Damaskọs, ke adiwọt mbo ke Yisọs ado Krais.
23Ke uwak usen emaekeboiyo, mme Yuu emaedʌk edioomo ammọ-ammọ adiwot Sọọl, 24ado Sọọl amaakop abaña edioomo ammọ. Ammọ emaekpeme mme inuaatob abio akonayio ye uweemeayio nọ ato do enie ufañ ewot anye. 25Ado ke akonayio mme nsaña amọ emaeben anye esịn ke akpasa esuuk ke isọñ ke adudu ke ndibene.
26Ke Sọọl amaakedi Yeruselem, anye amaadomo ukeme adidʌk atu mme andinịm ke akpanikọ, ado afịd ammọ ekebaabaak anye, inịmme ke akpanikọ ke anye akedo emọ-emọ mbed. 27Ado Banabas amaaben anye abịne mme abọsịd. Anye amaatañ anọ ammọ naña Sọọl akekịt Abọọñ ke usʌñ, ye naña Abọọñ aketañ ikọ ye anye, naña anye akekwọrọ ikọ uko-uko ke Damaskọs ke anyịñ Yisọs. 28Ndin Sọọl amaasuuk aba ye ammọ, anyʌñ asikeene ammọ awuọ esiin naña amama ke Yeruselem, akwọrọ ikọ uko-uko ke anyịñ Abọọñ. 29Anye amaasifaaña ye mme Yuu#9:29 Mme Yuu ake ekesemme usem Greek enyʌñ edu eduuwem mbon Greek. e-ekesemme Greek, ado mbon ami emaeyem usʌñ naña ekpewot anye. 30Ado ke mme andinịm ke akpanikọ emaekediọọñọ ebaña uduak ami, ammọ emaeben anye esọiyọ ekaa Siseria enyʌñ ekenọ anye aka Tasọs.
31Ndin ufọkabasi ke afịd Yudia, ye ke Kalili, ye ke Sameria emaebọ emem ye nsọọñọnda. Ke idak mbaak Abasi ye nsọọñidem Adisana Sịbidịd, ufọkabasi amaatọt ke ibad awo.
Enias ye Dọkas
32Naña Pita akekaaha mme itie, anye amaasaña akese ikọd Abọọñ e-ekedʌññọ ke Lida. 33Anye amaakịt awodeen keed do a-akekereke Enias, a-akedọñọke akpaubeñ anyʌñ anaa ke ikʌk isua itiaita. 34Ndin Pita amaabo anye ate, “Enias, Yisọs Krais a-anam udọñọ mfo akweeñe, dakka da, nyʌñ ben mbịd mfo.” Enias amaadakka ada ini keed. 35Afịd mme andikidʌñ ke Lida ye Sarọn emaekịt anye, enyʌñ ekappa esịd ekeene Abọọñ Abasi.
36Ado mbed keed amaaba ke Yopa a-akekereke Tabita, (a-awuọñọke Dọkas ke usem Krik). Mma ami akeyọhọ ye nti utom ye unyaaña mbon uweene. 37Akem anye amaadọñọ anyʌñ akpa. Ndin emaeyet akpo amọ eben ekenịm ke ubeed keed ke ufọk anyọñ. 38Lida akekpere Yopa, ndin ke mme mbed emaekekop ke Pita mmọdo akeba ke Lida, ammọ emaesio awo iba edọñ ekekoot anye, enyʌñ ekpeiye anye ete, “Mbọk di, usọp-usọp!”
39Pita amaadakka ada akeene ammọ, ndin ke anye amaakesịm do, emaeben anye edọọk ubeed ufọk anyọñ. Afịd mme ebekpa emaeda ekanna Pita ekʌk, etua enyʌñ ewọt anye mme afọñidem ye mme afọñ mfen a-Dọkas akenamma ke ini anye akebaaha ke uwem ye ammọ.
40Ado Pita amaasịññe afịd ammọ ke ubeed, anyʌñ atọọñọ edọñ abọñ akam. Ndin anye amaakanna iso ase akpo mma ado, anyʌñ abo ate, “Tabita, dakka da.” Do ke anye aketaat anyen, ndin ke anye amaakekịt Pita, anye amaadakka atietie. 41Pita amaamʌm anye ke ubọk, anyʌñ anwam anye ada ke ukod amọ. Ndin anye amaakoot mme andinịm Abasi ke akpanikọ, akpan-akpan mme ebekpa, anyʌñ ayaak Dọkas ye uwem anọ ammọ. 42Etob ñkpọ ami amaasuana akara ke afịd Yopa, ñko uwak awo emaenịm Abọọñ Abasi ke akpanikọ. 43Pita amaaba ke Yopa uwak usen ye anamutom ikpa keed a-akekereke Saimọn.
Iliyochaguliwa sasa
Utom Mme Abọsịd 9: ICB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
