Utom Mme Abọsịd 8
8
1Sọọl amaaba ke itie ado anyʌñ anyịmme ate ewot Stifịn.
Ukọbọ A-akesuanna Ufọkabasi
Ke usen ado ataa ekamba ukọbọ amaatọọñọ abaña ufọkabasi ke Yeruselem, ndin emaesuan afịd awo edọñ ke ukañ Yudia ye Sameria ibọhọke mme abọsịd. 2Mme nti awo emaekeben Stifịn ebuuk enyʌñ efʌhọ anye eti-eti. 3Ado Sọọl amaatọọñọ akọbọ ufọkabasi, asaña ke ufọk ke ufọk, amuum ibaan ye ideen adọñ ke ufọk ñkpakọb.
Filib Akaa Sameria
4Mbon e-ekefeeñeke emaekekwọrọ ikọ Abasi ke mme itie nte ammọ ekekaiya. 5Ndin Filib amaakaa abio Sameria keed akekwọrọ eti etob Krais ke udo. 6Ke ini mme atu awo emaekekop ikọ Filib enyʌñ ekịt mme utom idiọọñọ a-anye akenamma, ammọ emaenekke ekpañ utọñ ekop se anye aketañ. 7Mme ndedeghe sịbidịd emaetuaña, ewuọñọ mme awo ke idem; mbon akpaubeñ ye mbʌñọ emaenyʌñ ekop nsọñidem. 8Ndin akpọsọñ idaara amaaba ke abio ado.
Saimọn a-Adooho Abiamfa
9Ke ñkpọ nte ufañ ini ifañ, amaaba awo a-akekereke Saimọn, a-akesikamake ndedeghe sịbidịd anañña mme utịppeñkpọ nọ idem akpa afịd awo ke abio Sameria. Anye amaasiwọk inua ke imọ iminekke inie se ido, 10ndin afịd awo, ñkpoon ye ntək, emaenịm anye ke akpanikọ enyʌñ ebo ete, “Asʌk adot se ekoot awo ami Akwa Adudu Abasi.” 11Uwak mbon awo emaekeene anye sia ke anyan ini mme utịppeñkpọ amọ emaesikpa ammọ idem eti-eti. 12Ado ke ini ammọ emaekenịm eti etob abioubọọñ Abasi ye anyịñ Yisọs Krais, a-Filib akekwọrọke ke akpanikọ, ammọ emaebọ uduọkmmọọñ, ideen ye ibaan. 13Saimọn ke idem amọ amaanịm ke akpanikọ anyʌñ abọ uduọkmmọọñ. Anye amaakeene Filib akaa afịd itie, idem amaanyʌñ akpa anye ke adikịt mme ikpọ utom idiọọñọ ye utịppeñkpọ e-ekedatta itie.
14Ke ini mme abọsịd e-ekebaaha ke Yeruselem ekekoppo ke mbon Sameria emaebọ ikọ Abasi, ammọ emaenọ Pita ye Yọọn eka do. 15Ke ammọ emaekekewuọ, ammọ emaebọñ akam enọ ufa mme andinịm Abasi ke akpanikọ nọ ammọ ebọ Adisana Sịbidịd, 16sia Adisana Sịbidịd ikisọiyọke idoro awo ndomokeed do diin, ke ntak ekenịmme ammọ uduọkmmọọñ ke anyịñ Abọọñ Yisọs ikpọọñ. 17Pita ye Yọọn emaedot ammọ ubọk, ndin ammọ emaebọ Adisana Sịbidịd.
18Saimọn akekịt ke aketo ke mme abọsịd adidot mme awo ubọk ke mbon Sameria ekebọọ Adisana Sịbidịd, anye amaanọ mme abọsịd akʌk, 19anyʌñ abo ate, “Innọ miin ukem adudu ami ñko nọ mbon se ami ndot ubọk ebọ Adisana Sịbidịd.”
20Pita amaabọọrọ anye ate, “Yak akʌk mfo atak ye afo, sia afo akere abo ke imikeme idep enọ Abasi ke akʌk! 21Afo unieghe itie me udeeme ke iso utom ami, sia esịd mfo inenne ke iso Abasi. 22Kappa esịd kpọñ ibak uwem nyʌñ bọñ akam nọ Abọọñ. Akeme ido anye ayaafeen unọ fiin ke afo adinie utọ idiọọk akikere ado ke esịd mfo. 23Sia ami mmekịt ke afo asịne ke ukad idiọọkesịd ye idiọọkñkpọ.”
24Ndin Saimọn amaabọọrọ ate, “Bọñ akam nọ Abọọñ nnọ miin mbaak ñkpọ ndomokeed ke atu se afo atañ ami aditịppe innọọ miin.”
25Ke ini ammọ emaekemaana enọ ikọ ntiense ebaña Yisọs enyʌñ ekwọrọ ikọ Abọọñ ema, Pita ye Yọọn emaetịmme ekaa Yeruselem, ekekwọrọ eti etob ke uwak esịd idʌñ Sameria.
Filib ye Awo Etiopia
26Ndin enyere Abọọñ amaabo Filib, “Kaa ke usuuk usʌñ akpautatan a-atooho Yeruselem akewuọ Kasa.” 27Filib amaadakka isañ, ndin ke usʌñ anye amaakịt itọ a-aketooho Etiopia. Anye akedo ekamba akamautom a-akeseeghe ñkpọ abaña afịd akʌk anọ Kandake, abọọñanwaan Etiopia. Itọ ami akeka adikpono Abasi ke Yeruselem, 28ndin ke unyọñọ ufọk anye amaatie ke sariọd amọ asʌk akoot ñwed prọfed Aisaiya. 29Ndin Sịbidịd Abasi amaabo Filib, “Saña kpere sariọd ako nyʌñ ke da diana anye.”
30Naña Filib akefegheke abịne sariọd, anye amaakop naña awo Etiopia asʌk akoot ñwed prọfed Aisaiya. Filib amaabịp anye abo, “Se afo akoot unwaña?”
31Anye amaabọọrọ, “Akeme die adiñnwaña miin ibọhọke awo anam nọ añnwaña?” Do ndin ke anye akebo Filib adọọk aditie ye imọ.
32Itie ñwed Abasi i-itọ ado akekoodo ado ami:
“Ekedʌt anye nte edọñ ekaa itie esiwotto unam,
nte ñyịn edọñ imiisioho uyio ke iso mbon se ikwaat anye ided,
kpa ntoro ñko anye ikikʌppọke inua amọ.
33Emaebọ anye unen enyʌñ esuenne anye.
Anie awo ikan itañ ibaña nditọ-nditọ amọ?
Sia emaekpịkke uwem amọ esio ke ederimbod.”
34Itọ Etiopia ami amaabịp Filib abo, “Mbọk tañ nnọ ise, anie awo ke prọfed ami atañ abaña, idem amọ me awo mfen?” 35Ndin Filib amaatọọñọ ke itie ñwed Abasi ado anyʌñ akwọrọ eti etob Yisọs anọ anye.
36Naña ammọ ekesʌkkọ eka ke usʌñ, ammọ emaediwuọ itie a-mmọọñ akebaaha, ndin itọ ado amaabo, “Se mmọọñ mi. Nsoo ikpido ubiọọñọ ami adibọ uduọkmmọọñ?”
37Filib amaabo anye, “Adieke afo anịmme ke afịd esịd mfo, amekeme.”
Itọ ado amaabọọrọ ate, “Ami mmenịm ke akpanikọ nte ke Yisọs ado Ayịn Abasi.” 38Ndin anye amaanọ uyio ate awad a-sariọd atuak ada. Do ndin Filib ye itọ emaesọiyọ edọñọ mmọọñ, ndin Filib amaanịm anye uduọkmmọọñ. 39Ammọ ekewuọñọ ke mmọọñ edi, Sịbidịd Abọọñ amaaben Filib adakka, itọ ado ikinyʌññọ ikịt Filib aba, ado amaanyọñ ke idaara. 40Ndin Filib amaakewuọ Asotus, anyʌñ akaa iso ke isañ amọ, akwọrọ eti etob ke afịd idʌñ tutu akesịm Siseria.
Iliyochaguliwa sasa
Utom Mme Abọsịd 8: ICB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.
