ALuka 4

AShetan mara aYeso

(AMatiyu 4:1-11; AMarkus 1:12,13)

1Ama anɔng, aYeso won kabak kukyɛk aJodan ayɛt ishining Kabik aJɛrɛ. Kabik e, tɛ ka ku sok sak ayit kakot, 2a nye nkɔs nsɔk nnaas azɔng, na aShetan tsin ku mara. Ama nnom e yɔng, nzong kudaam makiyi, nek vit ikyɛng fɛ́ a te na nu.

3AShetan bɛ́ a fɛ̀ ni wu, “Ki ngɔn yet Arim Adakunom, fɛrɛng na ata na, na a sot nayak.”

4AYeso fɛ̀ ni wu, “I se ni ijɛk, ‘Da ni kuyak kyɛk fɛ́ anet di ki sot awo.’ ”

5Ama anɔng, aShetan e, tɛ ku sok, a ngarak ni wu ni iriyɔng ikak, a ku tonong ígwɔm azatse nang ngma kusum, dɛbɛt. 6AShetan ma fɛ̀ ni wu, “In da ka nɔk kukyem, ni izɔk azatse nang ngma kusum, nek ba mang di nɔɔk ide, in da nɔɔk ayɔng fi imi shim in ku nɔk. 7Nek anɔng, ki ngɔn di ki ya ntong, nda sot nfɔɔn.”

8AYeso fɛ̀ ni wu, “I se ni ijɛk, ‘Ngɔn da ya aTisa Adakunom ngɔn ntong, iwu aziwu kyɛk fi i da ku ra isam.’ ”

9AShetan e, tɛ a ku sok sak na aRushelima, a ku sak na a nyeseng ni iriyɔng kutu iya Adakunom ntong. A da ma fɛ̀ ni wu, “Ki ngɔn yet Arim Adakunom, barak ice ngɔn sak aben. 10Nek i se ni ijɛk,

‘ATisa da fɛrɛng na batomaza wu,

yɛ na ba da tot gyat.

11Iba da ka bereng ni mbɔk bá,

kɔng i bi turuk kutak ngɔn ni kuta.’ ”

12AYeso fɛ̀ ni wu, “I se ni ijɛk: ‘Da i bi mara aTisa Adakunom ngɔn awo.’#4:12 Ban di yin: Iyɛrɛk Ntsi 6:16.”

13Ama fɛ́ aShetan gang imara aYeso na kaaki irèn, a ku won nfi kizen e yɔng.

Ba raba aYeso na aNazaret

(AMatiyu 4:12-17; AMarkus 1:14-15)

14AYeso tɛ bun sak na aGalili ayɛt agap Abik aJɛrɛ, kucɛɛt wu, gorok kaakɛ na naban wɔp e. 15A teng a ras itees na narɔ inyis baYahuda, kaangan ku tere.

16A tse na aNazaret, karɔ fɛ́ a di rasak. Atuk aSabat, a tsɛ a nɔ na karɔ inyis baYahuda, kyɔn tɛ a mi di mɛɛ. A dorok tsik, nɔng a da kpa faa kufumung aJɛrɛ, 17ba ku nabak kufumung atan aIshaya. A tarak iko sak narɔ fɛ́ ba di jɛk,

18“Kabik aTisa se naton in,

nek iwu mi di myak

ni in shara ifɛ̀ itek

sak na bakan.

A di tom ni in tak bayɔng fɛ́ ba se

ni irosom nek itsom,

ba da ka ba bisik,

bakpatɔn da yɛrɛ wɛshɛk,

ni in tun bayɔng fɛ́ ba ka ba firik,

19ni in shara banet e fok,

izen mi nye fɛ́,

aTisa da sheshek banet wu.”#4:19 Ban di yin: AIshaya 61:1-2.

20Ama fɛ́ a gang ifaa me, a tɛ kunung kufumung e, a nabak anet itomong e ne, a da ma sonong. Ngma banet fɛ́ ba se narɔ inyis baYahuda me, di tup ayisi ni wu, 21a kpa cɛɛt yɛ, “Atut ifɛ̀ Adakunom deng, mi shining na ato yin.”

22Ngma banet fɛ́ ba se azɔng, fok kuta wu, a ka ba te yɔɔt ni kuri kucɛɛt kutek fi ku wuru na nu wu. Ba woso irisim yɛ, “Árɔɔ! Arim aYusufu yong awɛ?”

23AYeso fɛ̀ ni ba, “Imi rēn fok, iyin di ki nye yin igorok icɛɛt yeng: ‘Abok, te ice ngɔn kyang.’ I da ti i fɛ̀ yin ni imi, ‘Nye ikyɛng dɔng, fi iyit mi fok yit, fok ngɔn nye na aKafarnahum, nye azeng ni wɔp ngɔn bà.’ ” 24A tɛ fɛ̀ ni ba yɛ, “Won in ki tak yin atsak, vit atan fɛ́ ba kushim ni wɔp wu. 25Won in ki tak yin kucɛɛt atsak, bakumung kin se hwyɛt ni aIsrela ni izen atan aIliya. Ni izen e me yɔng, fɛ́ ba kin te kpaf kazanɛn ayɛ ataat ni ibit e vit iza, fi nzong kin se makiyi ni mben e ngma kusum. 26Ngma nɛ anɔng, ba kin tom atan aIliya sak na azining ba awo, tit sak na akumung e yɔng fɛ́ a kin se na aZarefat ni mben aSidon, fɛ́ ba kin ku tom mo. 27Bakpatɔn kin se hwyɛt ni aIsrela ni izen atan aIlisha, ngma nɛ anɔng, vit azining ayɛt bá fɛ́ ba kin ku te kyang, tit aNaaman anet aSiriya kyɛk, fɛ́ ba kin ku te kyang.”

28Ama fɛ́ bayɔng fɛ́ ba se narɔ inyis baYahuda me, fok ikyɛng fɛ́ a fɛ̀, ngma bá, ba beseng iyɛ. 29Ba doro tsik, ba kpa ku sam sak ama iwɔp, ba tse ni wu sak ni iriyɔng igung ikak fi kuwɔp e di se, nɔng ba bin ku yirik cirirang sak aben. 30Wat aYeso bɛ́ a got nate banet e, a tseng akɔn wu.

AYeso turung aduk abik

(AMarkus 1:21-28)

31Ama anɔng, aYeso tisik sak na aKafarnahum ni ntong aGalili, azɔng fɛ́ a tsɛ a nɔ ni itu iya Adakunom mben atuk aSabat, a kpa ka ba tees. 32A woso i ka ba nye yɔɔt ni kuri itees wu, nek kucɛɛt wu me, bi ice me.

33Wat anet akak kin se azɔng narɔ inyis baYahuda me, fɛ́ a kin bɛ́ kurɔk itséng, anet e, ta kukun na agap fok, 34“Ye kuku! Akyɛ ngɔn di se ni yit, ngɔn aYeso anet aNazaret ɛ? Ngɔn bi i ki ngasang yit ɛ? Imi rēn anet fi ngɔn yet, ngɔn wu i yet aJɛrɛ me yɔng fɛ́ a ne narɔ Adakunom.”

35AYeso kɔn itséng e, a fɛ̀ ni ide, “Te yin yuu! Wuruk yin ayɛt irɔm wu!” Wat itséng e, sok anet e, i ku barak aben azɔng ashon bá, i da ni i wuruk, i ku won kyang.

36Ikyɛng e te banet kpɔrɔk, ba kpa nye na bafidang, “Akyɛ kuri ikyɛng deng bà yɛ? Anet yong fɛrɛng ni ice ízɔk wu, ni itséng wuru!” 37Kucɛɛt naton ikyɛng fɛ́ aYeso nye, teng ku kat kaakɛ ni mben e.

AYeso tes banet dot kyang

(AMatiyu 8:14-17; AMarkus 1:29-34)

38AYeso wuruk narɔ inyis baYahuda me, a tseng sak ari aSiman. A tsɛ sɛ anekop aSiman, tsin bɔrɔng ni ifes irɔm makiyi. Banet e tak aYeso ifi irɔk e. 39Nek anɔng, aYeso tsɛ a te nyɔk ni fam wu, a gyɔng ifes e, ifes e wat i ku won. Abining e wat a dorok ni izen izining, a tsɛ a ka ba nɔɔk ikyɛng iya.

40Ni izen fɛ́ kahwyɛ nye, ngma banet fɛ́ ba bɛ̀ bafi nrɔk zizɛɛt-zizɛɛt, kpa bɛ́s ni iba narɔ aYeso. A di saas mbɔk naton ba, ngma bá ba sɛs kukyang. 41Itsɛng wuru ni irɔm banet dot, i tang nkun ni inye, “Ngɔn yet Arim Adakunom!”

Ngma nɛ anɔng, aYeso kɔn ide, a rawu dang a ki di nɔɔk irèn icɛɛt, nek itséng e ice de irēn fok iwu wu, a yet Anet-Isheshek me.

AYeso se ni itees narɔ inyis baYahuda

(AMarkus 1:35-39)

42Na bop adiding, aYeso won kuwɔp sak narɔ fɛ́ vit banet. Banet woso ba ku tsɛt, ama fɛ́ ba ku sɛ, ba tsɛt ba di te nyɛng ni wu fok ye na a sot gung ni ba. 43Awɛt iwu fɛ̀ ni ba, “I se gbing-gbing ni in shara ifɛ̀ itek ifi igwɔm Adakunom deng sak na narɔ nakak bà, nek ikyɛng deng fi i bɛ́ ni imi.” 44A ya kashon ni itees na narɔ inyis baYahuda na aJudiya.

Iliyochaguliwa sasa

ALuka 4: IbaasNT

Kuonyesha

Shirikisha

Nakili