ALuka 5

Iyes Bafi imɛɛs Imɛsɛng e

(AMatiyu 4:18-22; AMarkus 1:16-20)

1Atuk akak, aYeso kin se ni nyeseng, ni ice ibanang kudúng aJɛnɛsarɛt, banet teng ba kana nyɔ, ba shim ba fok ifɛ̀ Adakunom, 2A di akyɛ-ashi afaa bakat ni kuce ibanang, fɛ́ banet iyisik ízos mi te tsik ina azɔng, iba kin se ni ikusu águnung iyisik ízos bá. 3A tsɛ a nɔ ni kukyɛ ashi me kuzining, kuyɔng e kin yet kufɛ́ aSiman, aYeso fɛ̀ ni wu na bang serek iko sak ayɛt ashi gyeet.

4Ama fɛ́ a mi gang kucɛɛt wu, a fɛ̀ na aSiman, “Ti ban nɔ ni kukyɛ ashi ngɔn narɔ katsik, nɔng i da bin barak águnung ngɔn ayɛt e, i da yit ízos dot.”

5ASiman fɛ̀ ni wu, “Akɔk-ashon, iyit bang in kɔsɔ yit azeng, in bɔrɔng yit, vit ikyɛng fi in kyem in yit yit. Awɛt nek ikyɛng fi ngɔn fɛ̀, in da ti in barak águnung e.”

6Ni izen fɛ́ ba barak agunung e, ba yit ízos yɔk-yɔk fɛ́ ngmash agunung e na a tɛsɛng. 7Nek anɔng, ba yes bafidang fɛ́ ba se ni kukyɛ ashi kukak, na ba bɛ́, ba ka ba sɛ mo. Ba tsɛ ba shining ngma akyɛ-ashi afaa me ni ízos, fi kunanang de sak ba kpa tsɛt ke ba te rep na ashi.

8Ama fɛ́ aSiman Bitrus di ikyɛng fi ite, a te gururuk ashon aYeso, a fɛ̀, “Tseng di won aTisa, nek imi yet afi inɛn!” 9Nek iwu na bayɔng fɛ́ ba se gung ni wu, ayɔɔt ka ba yit nek kuri ízos fɛ́ ba yisik, 10kpaf anɔng fɛ́ ba aYakubu nɛ aYohana, nnon aZebedi bafidang itomong aBitrus fok.

AYeso ma fɛ̀ na aSiman, “Da i bi fok inyim awo; nkum atut sak ashon, i da yisik banet.” 11Nek anɔng, ba turung akyɛ-ashi bá sak amatse, ba won kaakyɛ, ba ku kuus mo.

Akparong fɛ́ aYeso ku te Kyang

(AMatiyu 8:1-4; AMarkus 1:40-45)

12Izen fɛ́ aYeso kin se ni wɔp kukak, anet akak fi ikparong mi ku ya makiyi. Ni izen fɛ́ a di aYeso, a kpa gururuk ashon wu, a kpa ra awon sak ni wu, yɛ, “ATisa, ki ngɔn fi i shim, ki i di te kyang.”

13AYeso nabak kubɔk wu, a di ra anet e, a fɛ̀ ni wu, “Ey, imi shim; ni i sot cɛ́l!” Ni izen izining, ikparong e wat i ku won.

14AYeso fɛ̀ ni wu, yɛ, “Da i bi tak akak awo, tseng tsi tonong ice ngɔn sak na àware, ni ma nabak kunang ngɔn kpaf ti ikyɛng fi ntsi aMusa fɛ̀ na ba nye nek ite cɛ́l. Nɔng banet kusum bin rēn.”

15Ngma nɛ anɔng, kucɛɛt naton aYeso, ya kashon ni ibarasa, fi i sak kudyɛng banet tsees nek ifoos wu, ni iwu ka ba tes kyang, ni nrɔk bá. 16AYeso mi di mɛɛ na kana nye kyɛw, na ras awon.

AYeso te aduru anet izining kukyang

(AMatiyu 9:1-8; AMarkus 2:1-12)

17Atuk akak, aYeso kin se ni itees banet, BaFarasi nɛ bafi itees ntsi bakak kin se ni isonong azɔng, ba nes ni nwɔp zizɛɛt nfɛ́ aGalili, ni nfɛ́ aJudiya, nɛ bayɔng fɛ́ ba nes na aRushelima, kukyem aTisa kin se naton wu, mok a di te banet kyang. 18Banet bakak tsɛ ba ne, na anet akak fɛ́ aduru azining mi ku, ba ku mees naton ameneng. Banet e teng ba tsɛt irèn fɛ́ ba di ki nɔ ni wu ni itu yɔng fɛ́ aYeso di se, nɔng ba bin ku mees ashon wu. 19Fɛ́ ba bit irèn inɔ nek kudyɛng banet, ba tsɛ ba ngarak ni iwu na gubuk, ba da nɛ ba ku tik aben ni ndun nɛ a te banet, kpaf ashon aYeso.

20Ni izen fɛ́ aYeso di inɔɔk atsak bá, a fɛ̀, yɛ, “Àrɔɔ, ba mi da fuut anɛn ngɔn.”

21Bafi itees ntsi aMusa me, nɛ BaFarasi me, kpa cɛɛt wɔɔn bá ye, “Angan yong, a yet a yong fɛ́ a beseng iyerek Adakunom anɔng ɛ? Angan kyem fɛ́ a da fuut anɛn akak ke da Adakunom aziwu awɛ.”

22AYeso rēn kuyiring fɛ́ ba se ne, a ka ba nye irip, “Akyɛ sak fi i nye yin kuyiring anɔng na ayɛ yin ɛ? 23Ingan de fi idung se byɛrɛ yɛ, na ba fɛ̀ ‘Ba mi da fuut anɛn ngɔn a,’ ke na ba fɛ̀, ‘Dorok da tseng ɛ’? 24Imi shim fok ni i rēn yin yɛ, Arim Anet bi ice azeng azatse, fɛ́ a da fuut anɛn.” A fɛ̀ na anet fɛ́ a bɔrɔng na aduru irɔm e, “Dorok tsik, sok kameneng ngɔn, tseng sak ari.” 25Ni izen izining, anet e dorok azɔng na ayisi bá, a sok kameneng wu, a tseng sak ari, na woso tere Adakunom. 26Ikyɛng e te kaangan yɔɔt, inyim ka ba yit, ba kpa tere Adakunom, na ba nye, “In mi di yit ikyɛng ayɔɔt atut.”

Iyes aLawi

(AMatiyu 9:9-13; AMarkus 2:13-17)

27Ama anɔng, aYeso wuruk amatse, a tsɛ a sɛ anet ishashang itsɔm mben akak, fɛ́ ba ku yes aLawi, ni sonong ayɛt kubut ishashang itsɔm mben. AYeso fɛ̀ ni wu, “Di kuus mo,” 28aLawi dorok a won kaakyɛ azɔng, a kpa ku kuus mo.

29ALawi tsɛ sak ba nye kuyak bazɔk ari wu nek aYeso, kudyɛng bafi ishashang itsɔm mben, ni ishɛrɛp banet ba kin se ni iyas gung ni iba. 30Awɛt BaFarasi nɛ bafi itees ntsi aMusa, tsɛ ba tonong bafi imɛɛs wu, kafa kawe bá, yɛ, “Akyɛ sak fi iyin yas yin, ni sɔ yin nɛ bafi ishashang itsɔm mben, nɛ ‘bafi inɛn’ ɛ?”

31AYeso fɛ̀ ni ba, “Da bayɔng fɛ́ ba se cere ba fɛ̀ ba tsɛt abok awo, tit bafi irɔk. 32Da imi bɛ́, nek iyes banet batek awo, tit bafi inɛn sak ishan atsak.”

Ba nye aYeso irip naton Itemak anu

(AMatiyu 9:14-17; AMarkus 2:18-22)

33Ba fɛ̀ ni wu, “Bafi imɛɛs aYohana mi di mɛɛ na ba nye mak nanu, na ba ras awon, bafi imɛɛs BaFarasi yɔng ba nye kpaf anɔng bà, awɛt ba fɔɔn nkum kuyak, ni isɔs kyɛk.”

34AYeso fɛ̀ ni ba, “Iyin da kyem iroyin na bafidang amatek agwel kuyak, ni iwu rēn resek mo gung ni iba ɛ? 35Izen bi nye fɛ́ ba bi sok amatek agwel e ni ba; ni izen e yɔng wu, fɛ́ ba bi nɛ ba kpa nye mak nanu.”

36A ka ba nye igorok ifɛ̀ yɛ: “Vit anet fɛ́ a sarak icɛk ikpin ifas, na tsɛ na di basak kukpin kuzen. Kɛ akak nye anɔng, i sot a mi beseng kukpin kufas wu, icɛk ikpin ifas e da bang sarak kuzen e, icɛk ikpin ifas e da kyem i nyim ni izen e awo. 37Vit anet fɛ́ a korok ashi anap afas ayɛt itsung-kuruu kuzen. Kɛ akak nye anɔng, ashi anap afas e, da tasak itsung-kuruu me, na ashi anap e, nosong, ni itsung-akpa me beseng. 38Ba nye anɔng awo, ane wu fɛ́ ba nye, ashi anap afas, ba korok ina ayɛt átsung-kuruu afas. 39Vit anet fɛ́ a da shim ama fɛ́ a mi sɔ ashi anap azen, na nɛ na te na shim afas, nek a da fɛ̀, ‘Azen e ta awaat.’ ”

Iliyochaguliwa sasa

ALuka 5: IbaasNT

Kuonyesha

Shirikisha

Nakili