Ntomong Batom 2

Kubɛ́ Kabik aJɛrɛ

1Izen fɛ́ aTuk aPɛntɛkɔs nye, ngma banet ikuus kin se narɔ kazining. 2Ni izen izining, ba fɛ̀ ba fok iwɔng ne azanɛn, tɛ nawoot itsombos, i bi shining kasa fɛ́ ba di se me ngma kusum. 3Ba fɛ̀ ba di ikyɛng kak fi i se tɛ alem nrong in ne, ni in tisik naton ace bá. 4Ngma ba sɛ kushining na Kabik aJɛrɛ, ba kpa cɛɛt na alem akak kpaf ne agap fɛ́ Kabik e ka ba nɔɔk.

5Ni izen e yɔng, baYahuda fɛ́ ba foos nnyim Adakunom kin se ne aRushelima fɛ́ ba nes ni mben azatse ngma kusum. 6Ni izen fɛ́ banet fok awɔng e, kudyɛng banet kana tusung azɔng. Ikyɛng e ka ba te kpɛɛ, nek kaangan ayɛt ba fok bafi ikuus aYeso me ba cɛɛt ayɛt icɛ́n bá. 7A ka ba te kpɔrɔk makiyi, ba kpa nye, “In nye yit kɛ banet bang fɛ́ ba tsin cɛɛt yet banet aGalili awɛ? 8Wat ne anɛ fɛ́ kaakyɛ azining yit foos ba karang icɛn wu anɔng ɛ?

9“Azeng nate yit, banet fɛ́ ba ne na aPartya di se nɛ bafɛ́ aMidiyas di se nɛ bafɛ́ aElamitas di se nɛ bafi mben aMesopotamiya di se, ni mben aJudiya nɛ aKapadokiya, aPɔntus nɛ Asiya. 10Nɛ aFirijiya nɛ aPamfiliya, aMasat nɛ bafɛ́ asamang aSirin ni mben aLibiya, pet ne batsen fɛ́ ba ne na aRoma 11(banet bakak kin yet baYahuda nɛ bakak kin yet Ícɛn-iduk fɛ́ ba mi kpa ras nggɔn baYahuda, bakak kin yet bafɛ́ aKiritan nɛ bafɛ́ Arabiya). Wat iyit fok yit ba taas ntomong ayɔɔt Adakunom ayɛt alem yit!” 12Ikyɛng e ka ba te kpɔrɔk, a tɛ ka ba te zii, ba kpa risim ace bá, “Akyi deng i yet ideng ɛ?”

13Wat bakak ayɛt ba, kpa ra bafi ikuus e ibyɛs, ba nye, “Ba mi sɔ ashi anap fɛ́ a se jatang, ba feng.”

ABitrus cɛɛt ni kudyɛng banet e

14ABitrus dorok, a nyeseng tsik ni kusɔk abe azining e, a sok kutɔ, a kpa cɛɛt ni kudyɛng banet e, “Iyin banaan bafɛ́ aJudiya, ni nshɛrɛp batsen fɛ́ ba se kusot ni aRushelima, wes yin ato ni mi. Won in ki tonong yin ikyɛng deng fi ite. 15Vit akak fɛ́ a mi feng ayɛt banet bang, tɛ bakak yin di sok na ayɛ bá. Izen yet itsɔm mbɔk agyɛng azining ifɛ́ adiding kyɛk! 16Ikyɛng de fɛ́ atan aJowel ki mang tak ibes de ye,

17‘Adakunom kin fɛ̀,

“Ni nkɔs igang e,

Imi bi korok Kabik hom

naton ngma banet kusum.

Nnon yin namatek e,

nɛ nanamang e, bi tas ibes,

bacam yin, bi yɛrɛ nabos,

bashɔn yin, bi ras nabos.

18Ni nnom e yɔng, Imi bi korok

Kabik hom naton basam hom,

bamatek e nɛ banyining e

ngma pet ba bi tas ibes.

19Imi bi tonong ajingjing naton aza

ni ikyɛng abes azatse.

Nasok, ni kurong,

nɛ atseng makiyi.

20Ba bi tirik kunom

ni ku sot ngmalak,

kufɛn bi sot tɛ nasok

dang agbat kunom aTisa me

ni ku nye.

21I bi se fok, ngma ayɔng

fɛ́ a ra awon na aTisa

a ku sɛ mo,

a bi sɛ isheshek.” ’#2:21 Ban di yin: AJowel 2:28-32.

22“Iyin bafi aIsrela, wes yin ato ni kucɛɛt kang. AYeso anet aNazaret, kin yet atutup ayɔng fɛ́ Adakunom kin ki tonong yin wɛshɛk fok iwu wu a ku tom nate yin. A tonong anɔng e, ni kuri ntomong ayɔɔt na abes zizɛɛt-zizɛɛt fɛ́ Adakunom nye ni bɔk aYeso. Kpaf ti iyin da rēn yin. 23Adakunom rēn ikyɛng fi i bi te, ikyɛng fi iwu mang sak sɛ kushining ni izen fɛ́ ba nabak aYeso. Ni irun ama bafɛ́ anɛn, iyin ku fɛt yin naton kukum. 24Ngma na anɔng, Adakunom kudorok ni iku, a ku tun ni mgbang iku, nek iku kyem ni i ku tekap ni nyang awo. 25Agwɔm aDauda kin nye kucɛɛt ka naton wu,

‘Kaakyi izen imi yɛrɛ

aTisa hom ashon hom.

Nek a se ni bɔk iyak hom,

vit ikyɛng fi i di ki zuut.

26Nek anɔng, iyɛ hom se ni itɛrɛk,

ilem hom se na abom kafa kakan;

kurɔm hom da nye kusot ni ite iyɛ,

27nek ngɔn Adakunom,

da won kutset hom ni irɛk awo,

kɛ ni won aJɛrɛ ngɔn na bush awo.

28Ngɔn mi di tees irèn isɛ kutset;

ngɔn di ki shining ni itɛrɛk iyɛ,

nek ngɔn se gung ni imi.’#2:28 Ban di yin: Abom 16:8-11.

29“Ábaruneng, in da ki tak yin ni iyɛ ting fok adakop yit aDauda kin ku, ba ku nɛt, kurɛk wu kang nate yit sak atut. 30Iwu kin yet atan, a bɛ̀ kurēn fok Adakunom mang ku tak ayɛt kushi, fok a bi di sak nggon wu kakak ni kuta isonong wu. 31Ni iyɛrɛ kashon, aDauda nye kucɛɛt naton idoro ifaben Anet-Isheshek, ye ba bi won kukom wu ni irɛk awo, kurɔm wu bi bush awo. 32Adakunom mi donong aYeso me ni isɔs ita, naton anɔng, ngma yit ba in yet yit bafi anu icɛɛt. 33Ba mi ku nɔk iratek ni bɔk iyak Adakunom, a mi shan Kabik aJɛrɛ na Ada, kpaf ni kushi fɛ́ a kin ki nye yit e, a mi ki korok yit Kabik aJɛrɛ me kang fi i tsin yɛrɛ yin ni foos yin. 34Nek agwɔm aDauda kin ngarak azanɛn awo, ngma na anɔng, a fɛ̀,

‘ATisa fɛ̀ na aTisa hom:

“Sonong ni bɔk iyak hom

35ma in te bafi ifa ni ngɔn

na atas atak ngɔn ninyɛn.” ’#2:35 Ban di yin: Abom 110:1.

36“Nek anɔng, won banet aIsrela ngma kusum na ba rēn tsɛngtsɛng ane: Adakunom mi sak aYeso yong, ayɔng fi iyin tekak yin, aTisa nɛ Anet-Isheshek.”

37Nkum fɛ́ banet e fok anɔng, ifɛ̀ me ka ba tubuk ayɛ, wat ba fɛ̀ ne aBitrus ni nshɛrɛp batom e, “Ábaruneng, akyɛ fi in da nye yit ɛ?”

38ABitrus fɛ̀ ni ba, “Tirik yin, wosong yin anɛn yin, na ba ki ra yin abatisma, ngma yin, ayɛt iyerek aYeso Kristi, nɔng ba da bin ki fuut yin anɛn yin, ama anɔng, i da sɛ yin kunang Kabik aJɛrɛ. 39Nek Adakunom kushi me yet kufiin ni nnon yin, ngma na bayɔng fɛ́ ba se yik-yik, nkum bayɔng fɛ́ aTisa Adakunom bi yes.”

40ABitrus ban ka ba tabak ni ncɛɛt dot; a fɛ̀ ni iba, “Sheshek yin ace yin ni izoot fi i bi bɛ́ na banet iras anyas azatse kang!” 41Kudot banet fɛ́ ba di nɔɔk atsak ni ifɛ̀ wu, fɛ́ ba ka ba ra abatisma atuk e yɔng, banet kin se agup ataat fɛ́ ba di barang kudot bafi ikuus.

Inyis bafi ikuus

42Ba nɔɔk nhwyɛ ba kusum sak ni ishashang itees ni mbɔk batom aYeso, ni kuyak angma, ni inyis, ni iras awon. 43Nnyim yit akaangan, nek ntomong abes, ni nfɛ́ ajingjing fɛ́ Adakunom ras ni bɔk batom aYeso me. 44Ngma bafi ikuus e, ya kashon ni kusonong myak, ikyɛng fɛ́ ba bɛ̀ yet ifuu bá ngma. 45Ba rɛs nkyɔrɔk mbɔk bá, ba kabasa itsɔm e, kpaf ni kunanang fɛ́ kaangan bɛ̀. 46Ba ya kashon ni inyis atasa karɔ iya Adakunom ntong kaakyi izen. Ba kabasa nayak na nasa bá, na ba yas gung ni iyɛ izining ni itɛrɛk iyɛ, 47na ba tere Adakunom, banet ngma kusum ka ba tere. Adakunom di barasa kudot bá, ifɛ̀ banet fɛ́ ba sɛs isheshek kaakyi kunom.

Iliyochaguliwa sasa

Ntomong Batom 2: IbaasNT

Kuonyesha

Shirikisha

Nakili