Rom 10
10
1Wek mïthëkɔckuɔ, kë kaar ë yapiɔ̈u kï, yɛn guöp, ku läŋ ɛn Nhialic në biäk de Yithriɛl kï, ee kuny bï ke kony wëi. 2Ku yɛn ee cäätɔden ë dït dïït kek piɔ̈ɔ̈th ë këde Nhialic, ku acïkï käŋ ŋic apiɛth. 3Ku keek, në kuny kuc kek piathëpiɔ̈u bɔ̈ tëde Nhialic, ku ŋäth ŋɛ̈ɛ̈th kek piathdɛn ë piɔ̈u etök, aake ye piathëpiɔ̈u bɔ̈ tëde Nhialic rɛɛc gam. 4Ku Kërtho yen aye thök de löŋ në këde piathëpiɔ̈u tëde raan ëbɛ̈n raan gäm.
Kunydewëi ee këde raan ëbɛ̈n
5 #
Leb 18:5. Ku Mothe ë käŋ gɔ̈ɔ̈r alë, në këde piathëpiɔ̈u wën bɔ̈ në löŋ an, “Raan ee kakë looi abï pïïr ë keek.” 6#Nyöŋ 30:12-14. Ku piathëpiɔ̈u wën bɔ̈ në gäm aye lueel alë an, “Du luel ë yïpiɔ̈u an, eeŋa bï lɔ paannhial?” (Luɛɛlde kï, ee bïï le en Kërtho bɛ̈ɛ̈i piny). 7Ku du luel aya an, “Eeŋa bï lɔ piny tëthuth?” (Luɛɛlde kï, ee bïï le yen Kërtho bɛ̈ɛ̈i nhial ë kɔc cïï thou yiic). 8Ku ye ŋö lueel? An, “Jam athiääk ke yïn, anu ë yïthok, ku nu ë yïpiɔ̈u aya.” Yen aye jam de gäm, jam guiirku. 9Të gɛm yïn Bɛ̈nydït Yecu ë yïthok, ku gam ë yïpiɔ̈u, nɔn cï Nhialic e jɔt ë kɔc cï thou yiic, ke yïn bï kony wëi. 10Gäm ee raan gam ë yepiɔ̈u yen aye yen piathëpiɔ̈u yök, ku luɛɛl ee raan gämde lueel ë yethok yen aye yen kunydewëi yök. 11#Yith 28:16 (LXX). Ku këcïgɔ̈ɔ̈r aye lueel an, “Raan ëbɛ̈n raan gam en acïï bï yäär.” 12Acïn të cï kɔc keyiic tek, Judai ayï Girikii, ee Bɛ̈nydïït töŋë Bɛ̈ny nu ë kɔc nïïm kedhie, yen ee piɔ̈u adhuɛ̈ŋ ke kɔc cɔl en kedhie. 13#Jol 2:32. Cït man cï ë këcïgɔ̈ɔ̈r ye lueel an, “Raan ëbɛ̈n raan ë Bɛ̈nydït cɔɔl rin ka bï kony wëi.”
14Ku ënɔɔnë, bïk raan aa cɔɔl rin adiaa raan kënkï gam? Ku bïk raan gam adï, raan kën kek këde piŋ? Ku bïk piŋ adï, të liiuwë raan ë keek guiir? 15#Yith 52:7. Ku bïk aa guiir adï, të kënë ke tooc? Acït man cï e gɔ̈ɔ̈r an, “Eeŋö cï kɔc cök dikëdik alë, kɔc ee wëlpiɛth guiir, wël ke mät, kɔc ë wëlpiɛth guiir, wël ke këpiɛth!” 16#Yith 53:1 (LXX). Ku akënkï wëlpiɛth gam kedhie, cït man cï Yithaya ye lueel an, “Bɛ̈nydït, eeŋa cï guiëërda gam?” 17Yen ka, Gäm abɔ̈ në pïŋ de wël, ku bɔ̈ pïŋ de wël në Kërtho.
18 #
Diɛt 19:4 (LXX). Ku wek thiëëc an, Kɛ̈nkï piŋ? Go an, Ɣɛɛ, ee yic,
“Rölden acï thiëi ë piny nɔm ëbɛ̈n,
2 Ku lɔ wëlken guut ë piny thar.”
19 #
Nyöŋ 32:21. Aguɔ bɛ thiëëc an: Kën ŋic en Yithriɛl? Go an, Acï Mothe kɔn lueel an:
“We bä tɔ dɔm tiɛɛl
në jur cie tɔ ye jur,
Ku ta week göth aläl
në jur kuc wël.”
20 #
Yith 65:1 (LXX). Ku Yithaya ë ŋeeny arëët lueel an:
“Yɛn cïï kɔc yök, kɔc ë kën a kɔɔr,
Yɛn cï rɔ nyuöth kɔc, kɔc ë kën a luɔp.”
21 #
Yith 65:2 (LXX). Ku yöök Yithriɛl an, “Yɛn ee cool ë riɛny ɛn a cin ë caŋawën ë kɔc reec gäm, kɔc nhiaar jäny.”
Iliyochaguliwa sasa
Rom 10: dip-JPB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The Bible in Jieeng de Padang © The Bible Society in South Sudan, 2011.
