ᐃᓯᑭᐁᓬ 28
28
1ᐅᐟ ᐃᑌᐧᐃᐧᐣ ᑳ ᑎᐯᔨᐦᒋᑫᐟ ᓂ ᑭ ᐅᑎᐦᑎᑯᐣ ᒥᓇ, ᐁ ᐃᑌᐧᐟ, 2ᐃᔨᓂᐃᐧᑯᓯᓵᐣ, ᐅᒥᓯ ᑭ ᑲ ᐃᑖᐤ ᑖᔭᕒ ᑭᐦᒋ ᐅᑭᒫᐤ, ᐅᒥᓯ ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ; ᒋᑫᒫ ᑭᑌᐦ ᐁ ᑭᐢᑌᔨᒧᒪᑲᕽ, ᒥᓇ ᐁ ᑭ ᐃᑌᐧᔭᐣ, ᓂ ᒪᓂᑐᐃᐧᐣ, ᓂᐟ ᐊᐱᐋᐧᐣ ᐅᐟ ᐊᐱᐃᐧᓂᕽ ᑭᓭᒪᓂᑐ, ᒣᑳᐧᐨ ᑭᐦᒋᑲᒥᕽ; ᓵᑯᐨ ᑭᐟ ᐊᔨᓯᔨᓂᐃᐧᐣ ᓇᒪᐃᐧᔭ ᑭ ᒪᓂᑐᐃᐧᐣ, ᐋᑕ ᐁ ᐃᑕᐢᑖᔭᐣ ᑭᑌᐦ ᑖᐱᐢᑯᐨ ᐅᑌᐦ ᑭᓭᒪᓂᑐ; 3ᒫᑎᑲ, ᐊᐊᐧᓯᒣ ᑭᐟ ᐃᔨᓂᓯᐣ ᐃᔨᑯᕽ ᑖᓂᐁᓬ; ᓇᒪᐃᐧᔭ ᐃᐦᑕᑲᐧᐣ ᐁ ᐊᐧᓂᒧᑕᕽ ᑭᑕ ᑭ ᑳᑖᐢᑭᐠ; 4ᑭᐟ ᐃᔨᓂᓯᐃᐧᐣ ᒥᓇ ᑭ ᓂᓯᑐᐦᑕᒧᐃᐧᐣ ᐅᐦᒋ ᑭ ᑭ ᑲᐢᑭᑕᒫᓱᐣ ᐁᐧᔪᑎᓯᐃᐧᐣ, ᒥᓇ ᑭ ᑭ ᑲᐢᑭᑕᒫᓱᐣ ᐅᓴᐃᐧᓱᓂᔮᐤ ᒥᓇ ᐋᐧᐱᐢᑭᓱᓂᔮᐤ ᑭ ᒫᐊᐧᒋᓱᓂᔮᐁᐧᐃᐧᓂᕽ; 5ᑭ ᑭᐦᒋᐃᔨᓂᓯᐃᐧᐣ ᐅᐦᒋ ᒥᓇ ᑭᐟ ᐊᑖᑐᐃᐧᐣ ᑭ ᑭ ᔭᑭᑖᐣ ᑭ ᐁᐧᔪᑎᓯᐃᐧᓇ, ᐁᑯᓯ ᑭᐟ ᐃᐢᐯᔨᒥᓱᐣ ᑭᑌᐦᐃᕽ ᑭ ᐁᐧᔪᑎᓯᐃᐧᓇ ᐅᐦᒋ; 6ᐁᐊᐧᑯ ᐅᐦᒋ ᐅᒥᓯ ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ; ᒋᑫᒫ ᐁ ᑭ ᐃᑕᐢᑖᔭᐣ ᑭᑌᐦ ᑖᐱᐢᑯᐨ ᐅᑌᐦ ᑭᓭᒪᓂᑐ; 7ᐁᐊᐧᑯ ᐅᐦᒋ ᒫᑎᑲ, ᒫᓂᑌᐊᐧᐠ ᓂ ᑲ ᐯᓯᐋᐧᐊᐧᐠ ᑭᑕ ᒪᐃᐧᓀᐢᑳᐢᑭᐠ, ᑳ ᑯᐢᑖᑌᔨᑖᑯᓯᒋᐠ ᓇᓈᑐᑯᐢᑳᐣ ᐊᔨᓯᔨᓂᐊᐧᐠ; ᐁᑯᓯ ᑭᑕ ᔮᔨᐢᑭᐱᑕᒪᐧᐠ ᐅ ᓯᒫᑲᓂᑯᒫᓂᐋᐧᐊᐧ ᑭᑕ ᓂᓯᐊᐧᓈᒋᐦᑖᒋᐠ ᐁᓯ ᑲᑕᐊᐧᓯᓯᐠ ᑭᐟ ᐃᔨᓂᓯᐃᐧᐣ, ᒥᓇ ᑭᑕ ᐃᐧᔨᐱᑖᐊᐧᐠ ᑭ ᐋᐧᓯᓱᐃᐧᐣ. 8ᐋᐧᑎᑳᓂᕽ ᑭ ᑲ ᐃᑐᑕᐃᑲᐧᐠ ᐁᑯᓯ ᑭ ᑲ ᐃᓯ ᓂᐱᐣ ᑳ ᐃᓯ ᓂᐱᒋᐠ ᐊᓂᑭ ᑳ ᓂᐸᐃᐦᒋᐠ, ᒣᑳᐧ ᑭᐦᒋᑲᒥᕽ. 9ᑫᔮᐱᐨ ᒋ ᑭ ᑲ ᐃᑖᐧᐣ ᐅᐦᑎᐢᑲᐃᐧᑳᐸᐃᐧᐢᑕᐊᐧᒋ ᐊᓇ ᑳ ᓂᐸᐃᐢᐠ, ᓂ ᒪᓂᑐᐃᐧᐣ? ᒫᑲ ᑭᐟ ᐊᔨᓯᔨᓂᐃᐧᐣ ᓇᒪᐃᐧᔭ ᑭ ᒪᓂᑐᐃᐧᐣ ᐅᒋᐦᒋᕽ ᐊᓇ ᑳ ᒥᓵᐧᑲᓂᑳᑎᐢᐠ. 10ᑭ ᑲ ᐃᓯ ᓂᐱᐣ ᐁ ᐃᓯ ᓂᐱᒋᐠ ᐁᑳ ᑳ ᓴᕒᑲᒼᓴᐃᓯᐃᐧᒋᐠ ᒫᓂᑌᐊᐧᐠ ᐁ ᓂᐸᐃᐢᑭᐠ; ᒋᑫᒫ ᓂᔭ ᑳ ᑭ ᐃᑌᐧᔮᐣ, ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ.
11ᐁᑯᓯ ᒥᓇ ᐅᐟ ᐃᑌᐧᐃᐧᐣ ᑳ ᑎᐯᔨᐦᒋᑫᐟ ᓂ ᑭ ᐅᑎᐦᑎᑯᐣ, ᐁ ᐃᑌᐧᐟ, 12ᐃᔨᓂᐃᐧᑯᓯᓵᐣ, ᐅᑎᓇ ᒥᐦᑖᑌᐧᐃᐧᐣ ᑖᔭᕒ ᑭᐦᒋ ᐅᑭᒫᐤ ᐅᐦᒋ, ᒥᓇ ᑭ ᑲ ᐃᑖᐤ, ᐅᒥᓯ ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ; ᑭ ᑭᐢᑭᓇᐋᐧᒋᐦᑖᐣ ᐁ ᒫᒪᐊᐧᕽ, ᑭ ᓵᑲᐢᑭᓀᐢᑳᑯᐣ ᐃᔨᓂᓯᐃᐧᐣ ᒥᓇ ᑭ ᒪᒥᑐᓂᐣ ᑲᑕᐊᐧᓯᓯᐃᐧᓂᕽ. 13ᑭ ᑭ ᐊᔮᐣ ᐃᑎᓂᕽ ᐅ ᑭᐢᑎᑳᐣ ᑭᓭᒪᓂᑐ; ᑳ ᐃᐦᑕᓯᒋᐠ ᓱᓂᔮᐊᐧᓯᓂᔭᐠ ᑭ ᑭ ᐊᐧᐢᑭᑕᒧᐋᐊᐧᐠ, ᓵᕒᑎᔭᐢ, ᑖᐸᐢ, ᒥᓇ ᑖᔭᒪᐣᐟ, ᐯᕒᐃᓬ, ᐋᓂᐠᐢ, ᒥᓇ ᒑᐢᐸᕒ, ᓵᐸᔭᕒ, ᐁᒪᕒᐊᓬᐟ, ᒥᓇ ᑳᕒᐸᐣᑭᓬ, ᒥᓇ ᐅᓵᐃᐧᓱᓂᔮᐤ; ᐁ ᐃᓯᒋᑳᓱᒋᐠ ᑭ ᑭᑐᒋᑲᓇᐠ ᒥᓇ ᑭ ᐳᑖᒋᑲᓇ ᑭ ᑭ ᑭᑭᐢᑳᑯᐣ; ᐊᓂᒪ ᐁ ᑭᓯᑳᐠ ᑳ ᑭ ᐅᓯᐦᐃᑲᐃᐧᔭᐣ ᑭ ᑲᐧᔮᒋᐦᑖᓂᐊᐧᓇᐧ. 14ᑭᔭ ᑐᒥᓈᑲᐣ ᒉᕒᐊᑊ ᑳ ᐊᑲᐧᓂᐢᑳᑫᐟ ᑭ ᑭ ᐃᓯ ᐊᔮᐣ; ᐁᑯᓯ ᑭ ᑭ ᐃᑕᔨᑎᐣ ᑭᑕ ᐊᔮᔭᐣ ᑕᐦᑯᑖᒪᑎᐣ ᐅ ᐊᐧᒋᒥᕽ ᑭᓭᒪᓂᑐ; ᑳᑫᐧᑯᐢᐠ ᑭ ᑭ ᐱᒧᐦᑖᐣ ᐃᐢᑯᑌᐊᐧᓯᓂᕽ. 15ᑭ ᑭ ᒪᒥᑐᓂᐣ ᑭᐟ ᐃᓯᐦᒋᑫᐃᐧᓂᕽ ᐊᓂᒪ ᐁ ᑭᓯᑳᐠ ᑳ ᑭ ᐅᓯᐦᐃᑲᐃᐧᔭᐣ ᐅᐦᒋ, ᐱᔨᐢ ᐃᑕ ᒪᒋᑐᑕᒧᐃᐧᐣ ᑳ ᒥᐢᑭᑳᑌᐠ ᐁ ᑭᑭᐢᑳᑯᔭᐣ. 16ᐁ ᐃᓯ ᐅᓵᒣᔭᑎᑭ ᑭᐟ ᐊᑖᑐᐃᐧᓇ ᑭ ᑭ ᐅᐦᒋ ᓵᑲᐢᑭᓇᑕᒫᑲᐧᐠ ᐋᐦᑫᐧᔨᒧᐃᐧᐣ, ᐁᑯᓯ ᑭ ᑭ ᒪᒋᑐᑌᐣ; ᐁᐊᐧᑯ ᐅᐦᒋ ᑳ ᐊᐧᔭᐃᐧᐁᐧᐱᓂᑖᐣ ᐁ ᐃᐧᓀᔨᑖᑯᓯᔭᐣ ᐅ ᐊᐧᒋᒥᕽ ᐅᐦᒋ ᑭᓭᒪᓂᑐ; ᐁᑯᓯ ᑭ ᑭ ᓂᓯᐊᐧᓈᒋᐃᑎᐣ ᑭᔭ ᑳ ᐊᑲᐧᓂᐢᑳᑫᔭᐣ ᒉᕒᐊᑊ, ᒣᑳᐧᐨ ᐃᐢᑯᑌᐊᐧᓯᓂᔭᐠ ᐅᐦᒋ. 17ᑭᑌᐦ ᑭ ᑭᐢᑌᔨᒧᒪᑲᐣ ᑭ ᑲᑕᐊᐧᓯᓯᐃᐧᐣ ᐅᐦᒋ, ᑭ ᑭ ᐊᐧᓈᑖᐣ ᑭᐟ ᐃᔨᓂᓯᐃᐧᐣ ᑭ ᐋᐧᓯᓱᐃ ᐅᐦᒋ; ᒧᒋᕽ ᑭ ᑭ ᐃᓯᐁᐧᐱᓂᑎᐣ, ᐅᐦᑎᐢᑲᐤ ᑭᐦᒋ ᐅᑭᒫᐊᐧᐠ ᑭ ᑭ ᐱᒥᓯᒥᑎᐣ, ᑭᑕ ᐋᐧᐸᒥᐢᑭᐠ. 18ᐁ ᐅᓵᒣᔭᑎᑭ ᑭ ᒪᒋᐃᑎᐃᐧᓇ, ᐁ ᐃᓯ ᒪᒑᔨᐊᐧᕽ ᑭᐟ ᐊᑖᑐᐃᐧᐣ, ᑭ ᑭ ᐃᐧᓀᔨᑖᑯᑖᐣ ᑭ ᑲᓈᒋᑲᒥᑲᐧ; ᐁᐊᐧᑯ ᐅᐦᒋ ᒣᑳᐧᐨ ᑭᔭ ᓂ ᑭ ᐅᐦᒋᐸᔨᑖᐣ ᐃᐢᑯᑌᐤ, ᑭ ᑭ ᒣᐢᑎᑲᓱᑯᐣ, ᐁᑯᓯ ᐱᐦᑯᑌᐤ ᑭᐟ ᐃᓯ ᐊᔮᐣ ᐊᐢᑭᕽ ᐁ ᐃᓯ ᐋᐧᐸᐦᑕᐦᑭᐠ ᑲᐦᑭᔭᐤ ᐊᓂᑭ ᑳ ᑲᓇᐋᐧᐸᒥᐢᑭᐠ. 19ᑲᐦᑭᔭᐤ ᐊᓂᑭ ᑳ ᑭᐢᑫᔨᒥᐢᑭᐠ ᐊᔨᓯᔨᓂᓈᕽ ᑭ ᑲ ᒫᒪᐢᑳᑎᑲᐧᐠ; ᑭ ᓭᑳᐱᓯᒫᐊᐧᐠ, ᐁᑯᓯ ᓇᒪᐃᐧᑳᐨ ᒥᓇ ᑭ ᑲ ᐃᐦᑖᐣ.
20 #
ᒍᐃᓬ 3:4-8; ᓭᑲᕒᐋᔭ 9:1,2; ᒫᐟᔪ 11:21,22; ᓬᐅᐠ 10:13,14 ᐅᐟ ᐃᑌᐧᐃᐧᐣ ᒫᑲ ᑳ ᑎᐯᔨᐦᒋᑫᐟ ᓂ ᑭ ᐅᑎᐦᑎᑯᐣ, ᐁ ᐃᑌᐧᐟ, 21ᐃᔨᓂᐃᐧᑯᓯᓵᐣ, ᐃᑎᐢᑫᐧᔨᐢᑕ ᓵᐃᑕᐣ, ᒥᓇ ᑭᐢᑭᐁᐧᐦᐃᑫᐢᑕ, 22ᐃᑌᐧ ᒫᑲ, ᐅᒥᓯ ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ; ᒫᑎᑲ, ᑭ ᓇᔦᑕᐁᐧᔨᒥᑎᐣ ᑭᔭ ᓵᐃᑕᐣ; ᒥᓇ ᓂ ᑲ ᑭᐢᑌᔨᑖᑯᐃᑲᐃᐧᐣ ᒣᑳᐧᐨ ᐃᑕ ᑳ ᐊᔮᔭᐣ; ᑭᑕ ᑭᐢᑫᔨᑕᒪᐧᐠ ᒫᑲ ᓂᔭ ᐁᐊᐧᑯ ᑳ ᑎᐯᔨᐦᒋᑫᐟ, ᐃᐢᐱ ᑭ ᑭᓯᑕᒪᐊᐧᑭ ᐅᔭᓱᐋᐧᓯᐁᐧᐃᐧᓇ, ᒥᓇ ᐃᐢᐱ ᑲᓈᑌᔨᒥᑲᐃᐧᔮᓂ ᐃᑕ ᐁ ᐊᔮᐟ. 23ᒋᑫᒫ ᓂ ᑲ ᐃᓯᑎᓴᐦᐊᒪᐋᐧᐤ ᐋᔨᒫᐢᐱᓀᐃᐧᐣ ᒥᓇ ᒥᐦᑯ ᐅ ᐱᒧᐦᑌᐢᑲᓈᕽ; ᒥᓇ ᑳ ᒥᓵᐧᑲᓂᑳᑎᐦᒋᐠ ᑭᑕ ᐸᐦᑭᓯᓇᐧᐠ ᒣᑳᐧᐨ ᐁᑯᑕ, ᐋᔨᑕᐤ ᒥᓯᐁᐧ ᐃᓴᐁᐧᐢᐠ ᐁ ᐊᔮᐠ; ᑭᑕ ᑭᐢᑫᔨᑕᒪᐧᐠ ᒫᑲ ᓂᔭ ᐁᐊᐧᑯ ᑳ ᑎᐯᔨᐦᒋᑫᐟ. 24ᓇᒪ ᐃᐧᑳᐨ ᒥᓇ ᑭᑕ ᐃᐦᑕᑲᐧᐣ ᑳᐃᐧᒥᓇᑲᓯ ᑭᑕ ᑭᔭᒫᐃᑯᐟ ᐅ ᐋᐧᐢᑳᐦᐃᑲᐣ ᐃᐢᕒᐁᐃᓬ, ᐊᐦᐳ ᐁ ᐋᑲᐧᕽ ᒥᓯᑳᐃᐧᒥᓇᑲᓯ ᓈᐣᑕᐤ ᐁᑯᑕ ᑳ ᐋᐧᐢᑳᐢᑳᑯᐟ, ᑳ ᑭ ᒥᑯᐢᑳᒋᐦᐃᑯᒋᐠ; ᑭᑕ ᑭᐢᑫᔨᑕᒪᐧᐠ ᒫᑲ ᓂᔭ ᐁᐊᐧᑯ ᑳ ᑎᐯᔨᐦᒋᑫᐟ ᑭᓭᒪᓂᑐ.
25ᐅᒥᓯ ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ; ᐃᐢᐱ ᑭ ᒫᐊᐧᒋᐦᐊᑳᐧᐃᐧ ᐅ ᐋᐧᐢᑳᐦᐃᑲᐣ ᐃᐢᕒᐁᐃᓬ ᐊᔨᓯᔨᓂᓈᕽ ᐅᐦᒋ ᐃᑌ ᑳ ᓯᓭᐧᐢᑳᒋᐠ, ᒥᓇ ᐁᐊᐧᑯᓂᐠ ᐅᐦᒋ ᑲᓈᑌᔨᒥᑲᐃᐧᔮᓂ ᐁ ᐃᓯ ᐋᐧᐸᐦᑕᐦᑭᐠ ᓇᓈᑐᑯᐢᑳᐣ ᐊᔨᓯᔨᓂᐊᐧᐠ, ᐁᑲᐧ ᑭᑕ ᐊᔮᐊᐧᐠ ᐃᐧᔭᐋᐧᐤ ᐅᐟ ᐊᐢᑭᐋᐧᕽ ᑳ ᑭ ᒥᔭᐠ ᓂᐟ ᐊᑐᐢᑫᔮᑲᐣ ᒉᑲᑊ. 26ᐁᑯᑕ ᒫᑲ ᑭᑕ ᐊᔮᐊᐧᐠ ᐁᑳ ᑫᑲᐧᐩ ᐁ ᐊᐢᑖᐃᑯᒋᐠ, ᐁᐦᐁ, ᑭᑕ ᐋᐧᐢᑳᐦᐃᑲᓂᑳᓱᐊᐧᐠ, ᒥᓇ ᑭᑕ ᑭᐢᑎᑫᐊᐧᐠ ᓱᒥᓂᑭᐢᑎᑳᓇ, ᒥᓇ ᑭᑕ ᐊᔮᐊᐧᐠ ᐁᑳ ᐁ ᐊᐢᑖᓯᒋᐠ; ᐃᐢᐱ ᑭ ᑭᓯ ᐅᔭᓱᐋᐧᑎᒪᑭ ᐊᓂᐦᐃ ᑳ ᒫᔨᑐᑖᑯᒋᐠ ᒥᓯᐁᐧ ᐋᐧᐢᑳ; ᑭᑕ ᑭᐢᑫᔨᑕᒪᐧᐠ ᒫᑲ ᓂᔭ ᐁᐊᐧᑯ ᑳ ᑎᐯᔨᐦᒋᑫᐟ ᐅ ᑭᓭᒪᓂᑐᒥᐋᐧᐊᐧ.
Iliyochaguliwa sasa
ᐃᓯᑭᐁᓬ 28: KKMs
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
This Bible text is a corrected edition of the 1908 Western Cree Bible; it is in the public domain.