LEVIYEN 26
26
Ajühkeya Ghena Kesawegüthu
(Aye 7.12-24; 28.1-14)
1 #
Lev 19.4; Bvü 20.4; Aye 5.8; 16.21,22; 27.1. Apvüwa na khi, “Nthu atsikezhü nyelela atsiketon, alon kesheng nyelela alon miwi palazhü nu nkinyila. Hi Apvüwa nthu Nyiza. 2Keccüna kho kesathu tsü nie nu hi kinyi keten pen tsü nyuwakü yalo. Hi Apvüwa.
3 #
Aye 11.13-15; 28.1-14. “Nthu na ijühya nu iyenkhukechithu tsü nie nu hang lethu, 4hi matsü wina atsankegho kesun pi nthu wi chicü nu ayyi wi yangdsa ketenthu nu achanthu ya ma bi bünya thsüden. 5Nthu kedsakejjü na meshumena sa nu alli wwitu keben wi kemeshentsse bi tsü la qo wa, nu kemeshentsse bi latu keben wi alli kechi tsü cu wa isaben. Nthu na kedsa mvu tsüdi benya, nu nthu na nthu yyi wi yazishu hangyaben.
6“Hi kecca sengho nthu yyi wi chicü, nu nthu na kemessi nmila cca jen yaben. Hi nthu yyi wi aghangsa nkemehaithu jügüshi, nu ciwi aghi nmila shaben. 7Nthu na nthu ghinyithu miwi khangyaben; 8nthu meshu manga na meza chaya, nu meza na hazar tagha chaya mehai. 9Hi kesawegü pi nthu cü nu atsanga kejon pi nthu cüben; hi nthu ssinu cenkethenjüh tsü nieben. 10Nthu na apvüya ntsa sa nu tsüna amapi chuli kedsa saya, nu asu ketheü kechipen sayale kesalina kaghawenwa lela pi khala shaben. 11Hi nthu jawi kemetha Nithsüjjen wi hang nu hi khie wila nthu teshi nben. 12#2 Kor 6.16. Hi nthu ssibenden; nthu na inyithu sa nu hi nthu Nyiza saden. 13Hi Apvüwa nthu Nyiza, nthu na nyu nssümagha sa nben thsü le kesalina hi Ejipt wina nthu ssi shhugho. Hi nthu ghanten keben kekhangwa tsü pakhhi nu nthu ya meshonmeyaqhe alentsen bvü thsüa.”
Ajüh-nkeya Ghena Kemetenthu
(Aye 28.15-68)
14Apvüwa na khi, “Nthu na ijüh khukechithu tsü nkina lethu, nthu na ketizen saben. 15Nthu na ijüh khukechithu nu iyenthu nkina mvu nu hi nthu ssinu cenkethenjüh tsü pakhhi lethu, 16hi kemeten pi nthu cüben. Hi ketizenkesa sen nu nthu miwi ghoden — khumakhujü ma nkeya nu kinaa na nthu nyon sapi nmuthsüla nu nthu kahang ma men nkemi saben. Nthu na amacü pi alli wi chi lela tsüna mehai nben, nthu ghinyithu na nthu miwi khangya nu nthu keben tsü dsaaben. 17Hi nthu shun lethu nthu na nyu nchala nu nthu ghinyithu na nthu miwi kekhang senben; nthu na qhethiketen nu thola nthu njügü lela nthu na nyu tu bvüben.
18“Keujüla hati kesa seng wi lela nthu na ijüh nkina mvu lethu, hi nthu kemetenwa tsü sapi tagü tughu jikayi thsüaben. 19Hi nthu lebenkedhu kekapvüwa tsü yasa cüben; ciwi atsan na nghola nu nthu yyi na keqha pi amighe kekhang ti saaben. 20Nthu piketsü tsüna nthu ghena kemehai nmila shaben, kepaghenanye nthu yyiwa wi yangdsa keten nu achanton na ma bi nbün laben.
21“Keujüla nthu na tsü miwi la hi kaghanineng nu ijüh nkina mvu lethu, hi kheneng nthu kemetenwa tsü sapi tagü tughu jikayi 22Hi aghangsa nkemehaithu kesun pi nthu jawi chi nu tsüthu na nthu tsangathu ghan, nthu sahangthu yasa, nu nthu keu ketan sa kesalina nthu alenthu teshishan shaben.
23“Kemeten hathu tsüdi miwi la nthu na ijüh nkina mvula hi shun lethu, 24tsaseng wi hi nthu miwi gho kheni miwi kemeten kedhuki tagü tughu sa cüben. 25Nthu na ithu cenkethenjüh tsü pakhhi kesalina hi aghi sengho nthu metenmesha, nu nthu na wa yazishu kesa nyunutithu wi saghu wa lethu, hi khumakhujü ma nkeya kesun pi nthu jawi chi nu nthu meten pi nthu ghinyithu kwen wi du thsüaben. 26Hi kedsakejjü pi nthu ncüla, isa nu nza meshu tagha na annibhon kesütan wi mathu keben tsüdi pi amesa gü waaben. Mathu na tsü whu pi nthu cüben, nthu na tsüthu tsüdi dsaya lela ghama benden.
27“Keujüla nthu na tsü miwi la hi shun nu ijüh nkina mvu lethu, 28tsaseng wi hi ileben minu nu nthu wi gho kheni miwi kemeten kedhuki tagü tughu sa cüben. 29Nthu na khwenthi keten sa nu nthu ketanla nthu tsangathu ghan dsaaben. 30Hi ayikha wi nthu na kinyi keten penthu tsü yasa, hankedemvu pi kekinyipenthu tsü pakhhi, nu nthu kamang pi nthu tsikezhüthu na khuli keben kete wi khalachiaben. Hi inonkehi wina 31nthu nyunutithu yasa, nthu kinyi keten pen yasa, nu nthu na ahhansha sa kechiwa tsü meya laaben. 32Hi nthu yyiwa tsü yasatha sa nu nthu ghinyithu ciwi kebenthu ya tsüghena qhethiketen sa thsüden. 33Hi aghi sengho nthu jügü zighe pi asang yyi wi bvü thsü; nthu nyunutithu yasa nu nthu yyiwa tsü yisha thsüaben. 34-35Isathu nthu na teshi nkesa yyiwa tsüna mehaitsü kemnan mapi saya ben; nthu kushi pi nthu ghinyithu yyi wi keben jü tsü teshi pi mnanya thsüden.
36“Nthu thothu na kushiyyi wi ben khe hi nthu sapi qhethiketen sa thsü nu ameghü na aghangwa kemosha hhai lela messi nu bvü thsüden. Nthu na aghi tukebvü ti bvü, nu aghinyithu na nthu kete wi nmi lela nthu na khuli thsüaden. 37Anyi thola nthu njügü lela nthu na khokho ccü kemeshüli nu khuli, nu nthu ghinyithu ssikaghashenya nben. 38Nthu na kushiyyi wi shü nu nthu ghinyithu yyi na nthu mejiaben. 39Nthu anyi kezeng-u ketan ghinyithu yyi wi hang keben tsüna nthu ketanla nthu nu nthu bamyithu kesami ghena dediaben.
40“Isala nthu shicüthu na mathu kesami nu mathu bamyithu na hi kaghanineng nu matang kesa ghena 41hi mathu shun nu kushi pi mathu ghinyithu yyi wi kesunchi kesa kesami tsü khishiben. Asakhen wi nthu shicüthu na mathu kesami nu kematang kutimen mukeya seng wi mathu satemeni chi lethu, 42#Ade 28.13,14; Ade 26.3,4; Ade 17.7,8. hi Jakob, Isak, nu Abraham ssinu cenkethenjüh tsü meshenchi nu ayyi pi inyithu cüle ijüh khuchi kethengwa tsü sa nengben. 43Isani, atuwa sa ayyiwa wi anyithu nben thsü la nu tsü ya mehaitsü mnanya thsüten, nu mathu na iyenthu nu ijüh khukechithu hhaghe kesa kutimen nmu thsüthu yishü. 44Isala mathu na ghinyithu yyi wi keben wi lela hi mathu teshi nu yasatha sa nben, isalethu hi Apvüwa mathu Nyiza na mathu ssinu cenkethenjüh tsüpi asakhen sa keben ghena. 45Hi Apvüwa, mathu Nyiza sale kesalina hi kekhang pi mizzatenti tsüdi ccüca nu Ejipt wina inyithu ssi keshhugho wi mathu bamyithu ssinu cenkethenjüh tsü saneng den.”
46Ayenthu nu ajühkhukechithu ha tsüdila Apvüwa na Israel nyithu ghena Sinai Yikha wi pi Mosa kecü.
Iliyochaguliwa sasa
LEVIYEN 26: RENGNBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.