LEVIYEN 21
21
Keqhaikedithu Kemetha
1Apvüwa na Mosa kiza nu Aaron nyi keqhaikedithu wi khi thsü, “Keqhaikedi kesüla ma shili keshü wi kevhü keccüna kekuli sa nu ma ketanla ma sapi nmetha thsüla nsala, 2tsüna ma ba, ma jja, ma tsa, ma nga, ma cünyuwa, 3nyelela ma tssüggüwa na ma jjen wi hang nu npi n-nukewa nkenye tsü. 4Ma shilithu keshü wi ma ketanla ma sapi nmethala nsala.
5 #
Lev 19.27,28; Aye 14.1. “Keqhaikedi kesüla ma nonke-ü pi nyu ccücale kesalina ma lica, apang kenye ce nyelela ma sa handhi pvü tsüti sa nben. 6Ma metha nbenthu yishü, nu inyankenyen nsala. Ma atsse pi kekinyi sapi hi cü keten ghena ma metha nbenthu yishü. 7Keqhaikedi kesü na nza keqheza menkedsa nyelela pvünyimetha nkenye nyelela nyu ma yisha kesa nyi yaya nben, ma metha kesalina. 8Anyithu na keqhaikediwa tsüna methale nsathu yishü, kepaghenanye ma atsse pi kekinyi sapi hi cüden. 9Keqhaikedi kesü nga na keqheza menkedsa sa wa lethu ma ma ba nyankenyün ben; ma pi mecangthiaben.”
10Keqhaikedi ntsawa tsüna adeli pi ma li wi keshusha chi nu ma satemetha pi keqhaikedi thsümeni pi pvü thsü theng, tsalina ma anonkegü ghena ma li mehhe nyelela ma thsümeni mezüqhe pvü nsala. 11-12Ma khuthipi satemetha pi hi wi chidha, tsalina ma ketanla keccüna wi ma sapi nmetha nyelela hi kemetha Nithsüjjen teshi nu keshü jjenwi kedu ghena tsü nakhiya nben, tsüna ma ba nu ma jja na shü ben lela. 13Ma pvünyimetha kesü yapi ma wubvü saben, 14denyile nyelela nyu ma yisha kesa nyelela keqheza menkedsa nyi yaya nben. Ma ma mizza wi pvünyimetha ketan yaben. 15Nyelethu ma tsangathu metha kesathu tsüna keccüna wi nmetha laben. Hi, Apvüwa nu hi ma khuthipi Keqhaikedi ntsawa sa thsüdha.
16Apvüwa na Mosa kiza nu 17Aaron wi khi thsü, “Nshicü nyu ghojünkeya nyi kesüla atsse pi hi wi kekinyi sakeya nmi. Matsü ghaketen tsüdi wila ha nieben. 18Anyi kesüla hathu ha ma miwi ben nu nyu ghojünkeya nyi na kekinyi saya nben: anyon nkemu, accükiccü, atsikemili nyelela atsi yasakesa; 19akwen nyelela accü nkemehai nyi; 20ageshikiccü nyelela kenonen nyi; anyon nyelela ahyu wi khumakhujü kepvü nyi; amca sa kesa nyi. 21Aaron shicü keqhaikedi kesüla nyu ghojünkeya nyi na atsse pi hi wi kekinyi sakeya nmi. 22Hati kesa nyi na pi hi kekinyi tsse kemethawa nu kemetha ntsawa la dsaya mehai, 23isala ma nyu ghojünkeya nyi ghena ma kemetha keshonthsü nyelela kekinyipen tsü tetsaki ghoya nben. Ma kemetha hathu nyankenyen yishü, kepaghenanye hi Apvüwa, hi tsüthu sapi metha thsüle.”
24Mosa na hawa ha khipi Aaron, Aaron tsathu, nu Israel nyithu tsüdila kiza.
Iliyochaguliwa sasa
LEVIYEN 21: RENGNBSI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.