Ngeera 27
27
1Otepanki̱sya byokugyenda kukora mwakya,
kubba ti̱wegi̱ri̱ kikugyenda kubbaho mu kiro.
2Leka bantu bandi boobo bakuhaariize,
kukira we wenkei kwehaariiza.
3Mahi̱ga na musinyi biicala byozoho,
bei̱tu̱ ki̱ni̱ga kya mudoma, kikira bi̱byo byensei̱.
4Muntu wa ki̱ni̱ga abba mubiibi,
bei̱tu̱ wei̱hali̱ akiraho.
5Kirungi kucomera mu rwatu,
kukira kwolokya ngonzi mu̱kyebi̱si̱i̱re.
6Kulamba kwa munywani kubba kwa mananu,
bei̱tu̱ ku̱ramu̱kya kwa munyanzigwa b̯ubba b̯u̱gobya.
7Mwi̱cu̱tu̱ yooyo akoba b̯uhooki tib̯ukunola,
bei̱tu̱ ali nzala, na kilulu akyeta ki̱nolu̱.
8Muntu aleka makaa gaamwe akazaahira handi,
abba nka nnyoni̱ gi̱ti̱gi̱ri̱ kizonza kyagyo.
9Maku̱ta gaku̱b̯u̱nyo kurungi gasemaza mutima,
na mukagu gurungi guleetwa kuhanuura kurungi.
10Otalyebeera munywanwo, rundi munywani wa bbaawu,
kandi otalib̯ungiiranga weenyu̱ nooli mu bizib̯u,
mu̱taahi̱, akira munyaruganda akuli hadei.
11Mwana wange bbanga mu̱gezi̱, osemeze mutima gwange,
kwokwo ntunge kyakwi̱ramwo akumbihiza.
12Akwetegereza awona kabii ni̱kakwi̱za niyebbala,
bei̱tu̱ ntwarwa gyecoberab̯wecoberi̱ nigiwonawona nakyo.
13B̯wema b̯wa ategebeerwe, b̯uli na kusembwa musimbo,
asagika munyamahanga alinakumusasulira.
14Kakubba muntu akeera ku̱ramu̱kya mu̱taahi̱ neitoko,
kiwonwa nka mukyeno.
15Mu̱kali̱ weizongobo,
eisana nka ndagali̱ gikutuntula gitakwamuka.
16Kumugaana kuzongoba oisana okutanga mpehu,
rundi kukwata maku̱ta mu ngalu.
17Kyoma nka kukiteekera kyoma,
kwokwo de muntu ateekera mwi̱ra.
18Woroora musaali okwi̱za kugudyaho byana,
linda mukama waamu akwi̱za ku̱ku̱si̱i̱ma.
19Nka muntu kuyeewona mu meezi̱,
kwokwo de mutima gwamwe gwolokya kiki kyali.
20Kuzumu nka kukutadweb̯wa baku̱u̱,
kwokwo de mei̱so ga muntu gatajwaha kuwona.
21Feeza na zaabbu bi̱pi̱mwa mworo,
bei̱tu̱ muntu api̱mwa bikumuhaariiza.
22Mudoma nowomukuuta heehi̱ ku̱mwi̱ta b̯wi̱ti̱,
b̯udoma waamwe tib̯umumalikamwo.
23Weega kulinda kurungi ntaama na mbu̱li̱ zaamu,
kandi oteeho mutima ku nte zaamu.
24Kubba itungu tilyomeeraho biro na biro,
na kondo giicalaho biro byensei̱?
25Isubi b̯ulyoma, hameraho lindi,
na lya ku lusahu balisala nibalisoorozera bisolo.
26Okusobora kutunda ntaama na mbu̱li̱,
kugula itehe na bilwalu.
27Okwi̱za kubba na mate ga mbu̱li̱ oganywe na mu̱gi̱ gwamu,
kandi bahala bakori̱ baamu baganywe gababi̱mbe mibiri.
Iliyochaguliwa sasa
Ngeera 27: LUGUNGU
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2025, Wycliffe Bible Translators, Inc. All rights reserved.