Ngeera 26
26
1Nka byalu ku̱bi̱tetagi̱sya mu kyanda, rundi ndagali̱ mu b̯wi̱re b̯wa kukesa,
kwokwo ki̱tetagi̱sya kuha mudoma ki̱ti̱i̱ni̱sa.
2Nka mantanta akwelongoolya atakwi̱cya,
kwokwo na mukyenu gutaakwate muntu gutagira b̯u̱si̱gi̱ki̱ro.
3Mbooko zikuuta mbaraasi, nkobba nizibboha mi̱nwa mya ndogoyi̱,
mubbeere gukuuta mugongo gwa mudoma.
4Mudoma otali̱mwi̱ramwo mu mu̱li̱ngo gwa b̯udoma,
aleke nawe otalibba nka yo.
5Bei̱tu̱ nookwi̱ramwo badoma, bolookye nka kubali basu̱ru̱,
kwokwo baleke kwezeta ba magezi̱.
6Kutuma mudoma b̯ukwenda,
obba wetemi̱ri̱ ntege, kandi weeteeri̱ mu kabii.
7Nka magulu ga mulima kugeicala nigasuleeba,
na lugeera lubacwera mudoma tulubba namugasu.
8Kuha mudoma ki̱ti̱i̱ni̱sa
oisana nka kubbohira i̱hi̱ga ku kimancuuru.
9Lugeera lwa badoma bacwa,
kiisana nka mu̱tami̱i̱ru̱ kwezokola ihwa mu ngalu.
10Muntu akoresya mudoma milimo rundi muntu gyakagi̱i̱rye,
eisana nka mulasa mbasi atabali̱ri̱i̱ri̱.
11Mudoma ei̱ri̱ra kukora byab̯udoma,
eisana nka mbwene gi̱i̱ri̱ra bituna byagyo.
12Waaweeni̱ho muntu akwezeta wa magezi̱?
Bantu bani̱hi̱ramwo birungi mu kukira yo.
13Mugarei akuweera, “Ntali gili hanzei mu muhanda!
Ntali gili mu ngu̱u̱do!”
14Nka mulyangu kugwicala nigwehinduhindulira ha pata zaagwo,
kwokwo de mugarei eicala niyehinduhindula mu ntabbu gyamwe.
15Mugarei waakolya itongi mu nnyeni̱,
li̱mu̱jwahya kulita mu mu̱nwa.
16Mugarei yeezeta mu̱gezi̱
kukira bantu musanju bei̱ramu nakwegyendereza.
17Muntu yeezi̱ngi̱i̱rya mu mpaka zitakumukwataho,
eisana nka muntu akukwata mapokopo ga mbwene gyateegi̱ri̱.
18Eisana nka muntu mugweraru,
aku̱hu̱ngu̱u̱lya mworo naalasa na b̯uta,
19yooyo muntu agobya mwi̱ra,
naakoba nyakali kusandaara b̯u̱sandaari̱.
20Nkwi̱ hazitali mworo gu̱lu̱mambe,
na mu̱hesi̱ hatali tihabbaho izongobo.
21Muntu abyokereerya izongobo aleeta kulwana,
nka nkwi̱, rundi makala gakwaka gatakumalikira.
22Makuru gacwe ganolira akugegwa
nka bidyo bi̱nolu̱ kubiicala mu nda.
23Bantu babaza birungi nibakutekereza kukora bibiibi,
beisana kyese ki̱si̱i̱gi̱rwe feeza.
24Muntu wa nnobi̱, agobyagobya bantu na bigambu byamwe,
kandi b̯u̱gobya ab̯u̱bi̱sa mu mutima gwamwe.
25Nab̯walibazanga birungi teetei̱, otalimwikiriza,
kubba ali na bibiibi musanju byabi̱i̱ki̱ri̱ mu mutima gwamwe.
26Nnobi̱ gyamwe gisobora kwebi̱sa hab̯wa bu̱gobya,
bei̱tu̱ b̯ubiibi b̯wamwe b̯ulizooka hasyanu̱ mu bantu beicala nabo.
27Muntu alilima b̯u̱hya, ali̱b̯u̱gwamwo,
kandi muntu abi̱ri̱ngi̱tya i̱hi̱ga yooyo li̱mwi̱ri̱ra.
28Kalimi kab̯u̱gobya kanoba gi̱kagobeerye,
kandi kunweneeka kuleeta kuhwerekeera.
Iliyochaguliwa sasa
Ngeera 26: LUGUNGU
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2025, Wycliffe Bible Translators, Inc. All rights reserved.