ROMA BATII 8
8
Yaa Ninwuna Niɛta Alɛ Busi Nkpa.
1Nunua, lɛpɔɔ olo kuonwii nsinnaa diɛta batii ba niɛbla ni onwii ku Kristo Yesu. 2Diekye kufiofa ko niekye ni Ninwuna kamɛ, ninta ni otii nkpa, di Kristo Yesu onwii ɔbla kamɛ, ntoodiki mi eekyeko okpile ku kukpi nnɛɛ kamɛ. 3Diekye lɛsaa le di kufiofa dilabafuo ni ɔbla, ta otii letembi lawa ni kasɔ oso, Yaa ntɔɔbla. Yaa lalo okpile lɛpɔɔ di suoto sina kamɛ di obe wɔ aayɔ nnwɔɔ omu nɔɔ Obi aakyesee nii. Aawa di otii letembi kamɛ fɛ kpileblatɛ alɛ abawɔɔsa okpile. 4Yaa labla nle mmle alɛ, awo ba ninsi ni fɛ mmle di Yaa Ninwuna komiɛ nii, ninanle fɛ mmle di suoto sina nkpa komiɛ nii, alɛ kufiofa lewo le boomiɛ ni kaamɛ loo kabla nimu.
5Batii ba ninsi ni nkpa fɛ mmle di suoto sina lɛma komiɛ nii, asaa ya di suoto sina mbɔmbɔ lete suoto ko mambu disi. Kafɔɔ mba ninsi ni nkpa di Yaa Ninwuna suoto, Yaa Ninwuna kamɛ asaa suoto ko mambu diisi. 6Otii wɔ nimbu ni disi di suoto sina asaa lete suoto, kukpi anwɛ. Kafɔɔ otii wɔ nimbu ni disi di Yaa Ninwuna asaa suoto, anwɛ nkpa ku atoko ɔkyɛ ole. 7Nkpo oso otii wɔ nimbu ni disi di suoto sina asaa lete suoto, ankple Yaa lo, diekye ankyɔɔ Yaa kufiofa kotoko. Nwaako kafɔɔ, diidii, ɔlɔbafuo nwu kotoko ɔkyɔɔ. 8Batii ba ninsi ni nkpa fɛ mmle di suoto sina lɛma kɔtɔkɔ ma nii, blaafuo Yaa anu obuo.
9Kafɔɔ nse Yaa Ninwuna lefũ kasiɛ kaamɛ lee, ni biesinsi nkpa di suoto sina kanya, kafɔɔ fɛ mmle di Yaa Ninwuna komiɛ nii. Nkpo oso nse Kristo Ninwuna diesi di otii owo kamɛ, ni aale Kristo ole. 10Kafɔɔ nse Kristo nsi ye kaamɛ, kuntɛ suoto lee sina makpi ta sikpile oso, anwuna lee nnya abasiɛ nkpa. Diekye Yaa ntɔɔta ye lɛbɛ. 11Nkpo oso nse Yaa Ninwuna le niatakatɛsa Yesu diakyeko ni bakpi kamɛ nsi ye kaamɛ, ni otii wɔ niatakatɛsa ni Kristo Yesu yi, abasɛnkɛsa suoto sina lee se nimakpi nii, diefe ni diɛ Ninwuna nɔɔ le ninsi ye ni kaamɛ oso.
12Nkpo oso, babiloo, bukpe ɔkpɛ dikaatɛ alɛ buɔbla nii. Kafɔɔ diele nwu ninle alɛ buasiɛ nkpa fɛ mmle di suoto loo sina komiɛ nii. 13Diekye nse buosiɛ nkpa fɛ mmle di suoto loo sina komiɛ nii, bubakpi. Kafɔɔ nse buɔyɔ Yaa Ninwuna buolo suoto sina nkpa kpile nwu, ni bubawɛ nkpa. 14Diekye batii ba di Yaa Ninwuna kɔkpaa nii, mma ninle Yaa babi nɛ. 15Yaa diɛta wo lɛyɛkɛ Ninwuna, alɛ, buakple balanle. Kafɔɔ Ninwuna le ɛɛta wo ni kɔbla wo babi nɔɔ. Nioso diefe ni diɛ Ninwuna nwu suoto, munlɛɛ Yaa bulɛ, “Abba” lɛsɔdiki nɔɔ ninle alɛ Teete nii.
16Yaa Ninwuna nimu ku ninwuna loo lɛbla onwii diodiki nintuo alɛ Yaa babi bule. 17Ni se Yaa babi nfɛ bule, ni bubale nwɔ ate saa. Ni awo ku Kristo nimale Yaa ate saa nwu munta baawo. Bubakpa fɛ nnwɔɔ kafɔɔ nse buɔnya dibuo fɛ mmle di Kristo lanya ni dibuo.
Bubawɛ Suoto Lɛyɔɔ Le Nikɔwa Nii.
18Nwaako di mmle kɔnya nii, nse bɛɛyɔ dibuo le buɔɔnya ni miɛ bɛɛkaatɛɛsa di leklekle le babadiki mantuo nii, ni dibuo nwu diedie lɛsalɛsaa. 19Asaa ya di Yaa lɛbla nii, amuu konyu osuku osie kanya anta obe wɔ di Yaa madiki babi nɔɔ antuo nii. 20Diekye asaa ya mmle di Yaa lɛbla ni amuu lebuo di dibuo kamɛ. Ninanle ni nnya amu nietuna ni nkpo, kafɔɔ Yaa omu niɛta osuku nkpo. Kafɔɔ ɛɛta ma osuku onyu alɛ, 21abadiki asaa ya mmle amuu ankyeko kukpi nnɛɛ kamɛ dii, anta kafɔɔ alɛ manwɛ leklekle ku ɔnyɛɛɔtɛ wɔ di Yaa babi mawɛ nii.
22Diekye buye bulɛ, diɛbase ni bia miɛ, Yaa asaa ya ɛɛbla ni amuu konu dibuo, ootũuni fɛ mɛlakatɛ wɔ di lɛmɛ konu nii. 23Kafɔɔ diele asaa ya di Yaa lɛbla ni lete, nikootũuni, kafɔɔ ku awo ba di Yaa lɛta ni Ninwuna nɔɔ fɛ lɛtasaa kasale, buotũuni di suoto loo kamɛ, buonyu osuku kafɔɔ osie kanya bulɛ, Yaa mafũ wo fɛ babi nɔɔ, munwɛ ɔnyɛɛ ɔtɛ. 24Osuku onyu wɔ mmle oso, buawɛ didiki nɛ. Kafɔɔ nse buɔnya lɛsaa le buonyu osuku munta nii, ni diesinle osuku onyu. Diekye otii kuonwii ninnya lɛsaa le oonyu osuku anta nii. 25Kafɔɔ nse buonyu osuku munta lɛsaa le munɔɔnya ni ku anu loo, ni munnkpee otu munnyu lɛsaa nwu osuku nɛ.
26Nkpo kafɔɔ di Yaa Ninwuna nkyakaako awo ba niɛwa ni kasɔ nɛ. Diekye buoye mmle okle buapɛ ɔlaa munta ni Yaa. Kafɔɔ Yaa Ninwuna nimu ntikiti Yaa lekoto diisi loo di ditũuni kamɛ alɛ bulaafuo ni kasɔ odiki. 27Yaa wɔ ninye ni batii situ kamɛ, n-ye lɛsaa le ninsi ni di Ninwuna disibu kamɛ. Diekye Ninwuna nwu ntikiti Yaa lekoto di batii nɔɔ disi fɛ mmle di Yaa omu komiɛ nii.
28Buye bulɛ lɛsaa lele di Yaa lɛbla ni, dilɛ diɛta batii ba nimbɔmbɔ nwɔ nii, mba ɛɛlɛɛ ni di dibiesaa nɔɔ ɔbla suoto. 29Batii ba di Yaa n-ye ɛɛtɛ nii, eediki mma kafɔɔ lete alɛ baadie Obi nɔɔ, alɛ Obi nɔɔ kale obi nɔɔfo di babilɛma kpinwu kamɛ. 30Nkpo oso mba di Yaa lediki lete ɛɛta ni suoto, mma kafɔɔ ɛɛlɛɛ nɛ. Mba kafɔɔ ɛɛlɛɛ nii, mma nwu ɛɛta lɛbɛ nɛ. Mba ɛɛta ni lɛbɛ, mma kafɔɔ ayooto ɛɛtakatɛsa katoo nɛ.
Lɛsalɛsaa Dilaafuo Awo Ku Yaa Ntɛɛ Ɔsɛ.
31Di nle mmle suoto, be bukpe mumbuɛ? Nse Yaa n-yɛ wo kamaa, owe nimafuo wo ɔkpɛko? 32Ni nse Yaa leyila ɛɛyɔ Obi nɔɔ omu ɛɛta ole diisi loo, anansĩ nwɔ ɔyɔ ɔta, be oso anaafuo wo asaa bule amuu ɔyɔ ɔta di sifutulɛ nɔɔ nwu suoto? 33Owe nimafuo ɔlaa ɔyɔ di Yaa batii ba eediki ni suoto? Yaa omu niediki ma ɛɛta ma lɛbɛ. 34Ni owe nfɛ nimafuo ma lɛpɔɔ olo? Kuonwii dilaafuo. Kristo Yesu ninle otii wɔ niakpi nii, lɛsaa le nintikanko ni ninle alɛ, Yaa lasɛnkɛsa nwɔ aakyeko bakpi kamɛ, akpe nkpa asi di Yaa oletanɛɛkyɛ, ootikiti nwɔ lekoto diisi loo.
35Ni owe nimafuo lɛbɔmbɔ le ninsi ni di awo ku Kristo nntɛɛ obudi? Dibuo ɛɛ, nimiina ɛɛ, ditikanko ɛɛ, kɔka ɛɛ, lɛkyɔtɔ ɛɛ, lɛyɛkɛsaa ɛɛ, sɛɛ kukpi? 36Disi di Kɔkpana Klekle Kukũ kamɛ alɛ,
“Afɔ oso, busi di kukpi nnɛɛ kamɛ obe lele.
Bɔɔbla wo kafɔɔ fɛ bafoso ba bɛɛkpaa boofenko ni olo.”
37Kafɔɔ di n-ya mmle kamɛ, bulenke balenkeetɛ, diefe di Kristo wɔ nimbɔmbɔ wo ni kamɛ oso. 38-39Diekye lefũ lenu nlɛ, lɛsalɛsaa dilabafuo lɛbɔmbɔ le ninsi ni di awo ku Yaa ntɛɛ obudi ta Saate loo Kristo Yesu oso. Bia kukpi ee nkpa, ee Yaa batɔkyɛntɛ ee anwuna kpile, ee obe wɔ mmle ee nwɔ nikɔwa nii, ee otimi owo ee n-ya ninkpe ni di osi, ee n-ya niekyo ni fanfa ee lɛsalɛsaa kuninwii bɛɛbla nii, dilabafuo.
Iliyochaguliwa sasa
ROMA BATII 8: snw
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2008, Wycliffe Bible Translators, Inc. All rights reserved.
