Romanos 8
8
Tjejóchónxini ti Ncha̱kuén Díos
1A̱ndá ijie ti sin tinkáchónki Cristo Jesús la í kohya ijie̱ chrókjuasótexín sin. Jehe sin la í tjinkakonhña sin sinchexiteyá sin ti nkehe ndáchro a̱sén sin. Jehó tjinkaon sin sinchexiteyéhe sin ti Ncha̱kuén Díos. 2Ti nkehe tꞌe̱to̱an Ncha̱kuén Díos mé tjajon kjuachón kixin tinkáchónkini Cristo Jesús la tíha mé kjua̱tse̱n ti ijie̱ chrókꞌuenxíni. 3Díos la kjuacha kjuíchꞌe ti nkehe kjuachahya kjuíchꞌe ti ley kuènté Moisés kixin jeheni la kjuachahyani kjuínchexiteyáni tíha. Méxra̱ Díos mé ichrꞌán chꞌan ti Xje̱en chꞌan kꞌóna chojni. La ikui kꞌuenyákohe̱n ti iji̱éni kaíni la kjua̱tse̱n chꞌan ti ijie̱ chrókꞌuitjáñaxíni. 4Mé xi̱kaha kjuíchꞌe chꞌan kixin jeheni jína chrókjuínchexiteyáni ti nkehe tꞌe̱to̱an ti ley la chrókjuinchexiteyéhyani ti nkehe ndáchro a̱séni ó. Náhí. Chrokjuinchexiteyéheni ti nkehe ndáchro Ncha̱kuén Díos.
5Ti chojni tjinkaon sinchexiteyéhe ti nkehe ndáchro a̱sén sin, mé táhó tjenka̱yáxin sin. A̱ndá ti sin tjinkaon nchexiteyéhe Ncha̱kuén Díos la xritjeyá sin ti nkehe kuènté Ncha̱kuén Díos. 6Ti sin jehó tóxakohen ti nkehe ndáchro a̱sén ó, la táha tsꞌenxín sin. A̱ndá ti sin tóxakohen ti nkehe kuènté Ncha̱kuén Díos, la tsochóntaxín sin kjuachón la ko kjuaxróxin tsꞌejó sin. 7Méxra̱ ti nkexro jehó tóxakohen tsjeyá ti nkehe ndáchro a̱sén ó la nínkakohen sin Díos, kixin tjinkakonhña sin ti ley la ko xitjahya tsitekaon sin tíha. 8Jehe sin mé tóxríhi̱n sin ti nkehe ndáchro a̱sén sin la xitjahya sinchexiteyá sin ti nkehe tóxríhi̱n Díos.
9A̱ndá jahara la nchexiteyéhyara ti nkehe ndáchro a̱sánra. Náhí. Nchexiteyéhéra ti Ncha̱kuén Díos, ti chaxín chontara ti Ncha̱kuén Díos. A̱ndá ti nkexro chóntahya Ncha̱kuén Cristo la jehya kuènté Cristo ti jehe sin. 10Ti tjejoko̱ara Cristo la ti a̱sánra la tjechón kixin Díos kꞌóxika ti iji̱ára kixin kuitekáonra, kjánchó ti cuerpo la itsꞌen kixin ti ijie̱ kjuásinra. 11#1Co. 3:16.*La ti chontara ti Ncha̱kuén Díos, ti nkexro kjuínchexechón Cristo Jesús, la ti Díos kjuínchexechón Cristo mé kja̱xin tsochjéhe chꞌan kjuachón ti cuerpo kuèntára chónta itsꞌen.
12Mé xi̱kaha kíchóni, ticháxi̱n sinchexiteyáni ti nkehe tꞌe̱to̱an Díos, la í chrókjuinchexiteyéhyani ti nkehe ndáchro a̱séni. 13Ti chrókꞌuejora éxi ti ndáchro a̱sánra, la tíha tsꞌénxi̱nra. A̱ndá ti si̱nchexiteyéhéra ti Ncha̱kuén Díos ndá itsꞌen ti nkehe ntaxin kjuénka̱yáxinra, la jehó Ncha̱kuén Díos tsꞌejóchonxínra.
14Kixin kaín ti nkexro nchexiteyéhe ti Ncha̱kuén Díos la tꞌóna xje̱en Díos. 15#Gá. 4:5-7.#Mr. 14:36; Gá. 4:6.*Ndá ti Ncha̱kuén Díos ó kꞌuayéhéra la jehya yóhe̱ ti nkehe kuékꞌe̱tua̱nhanra ósé kixin chróchrakonra. Náhí. Ti Ncha̱kuén Díos chóntani la kꞌónaxíni xje̱en Díos la ti Ncha̱kuén chꞌan nchexraxinkaoni kixin jína tsondáchroni: “Jaha Itꞌéni.” 16Mé xi̱kaha ti Ncha̱kuén Díos tónoexín a̱séni kixin kꞌónani xje̱en Díos. 17La ti ó kꞌónani xje̱en Díos la kja̱xin tsꞌáyéhe̱ni ti nkehe tsjajon chꞌan éxi tsíndáchro chꞌan ósé, tsꞌáyèkoni Cristo. Mé ti chaxín tsjasóteni éxi Cristo kjuasóte, ndá chrꞌéxi̱n tsꞌejókoni chꞌan la tsꞌáyéhe̱ni ti kjuachaxin kuènté chꞌan.
Ti kjuachaxin ijié itsi chrꞌéxi̱n
18A̱ndá ijie la tóxakuenhñani kjónté nkehe tsꞌatsínkani tsjasótexíni kixin tíha la ninkehó sínkíhya, kixin tíha tso̱yóe̱hya ti nkehe tsꞌáyéhe̱ni chrꞌéxi̱n kixin a̱ntsí náxrjón tíha. 19Kaín ti nkehe tsíkꞌóna la tjejóchóhen kixin tso̱noxín kaín ti nkexro tsíkꞌóna xje̱en Díos. 20#Gn. 3:17-19.*Kixin ti chjasintajni la ko kaín ti nkehe tsíkꞌóna la tsꞌitjáña, la jehya kixin xi̱kaha tjinkaon ti nkehe tsíkꞌóna. Náhí. Kixin xi̱kaha tsíkꞌe̱to̱an Díos. Ndá kaín ti nkehe tsíkjichꞌéna Díos la tjejóchóhen 21kixin tsochónta kjuachaxin tsꞌitjáñahña. Ndá náxrjón tsꞌixin kaín nkehe éxi náxrjón tsꞌejó ti sin tsíkꞌóna xje̱en Díos. 22Ó noheni kixin kaín ti nkehe kjuíchꞌéna Díos la na̱xa̱ tꞌèya, tsjánka éxi ijnko chojnichjin tjoté sinchekokjíhi xje̱en xi̱kaha. 23#2Co. 5:2-4.*A̱ndá jehya jehó ti nkehe tsíkꞌóna tjotéhe. Náhí. Kja̱xin jeheni tjasóteni kjónté chóntani Ncha̱kuén Díos éxi ti nkehe sa̱oxén kuákjani kjuajon Díos. Ti na̱xa̱ tjejóni ntihi, tjejótjasóteni, la tjejóchóheni kixin tsjindaxín tsꞌónani xje̱en Díos la ko tsꞌáyéhe̱ni ti cuerpo chónhña itsꞌen. 24Ó kuaáni kixin tinkáchónkini Cristo, la tjejóchóheni ti nkehe na̱xa̱ tꞌikonhñani ntihi. Ti chrókꞌuíkoni ti nkehe tjejóchóheni la í ticháxi̱nhña chrókꞌuejóchóheni. Ti nkehe ó tꞌikoni la ticháxi̱nhña na̱xa̱ chóheni chrókꞌuíkoni. 25Ti chóheni ti nkehe na̱xa̱ tꞌikonhñani, la ticháxi̱n kjuaxróxin chróchóheni, chrókꞌóxrjéhyani.
26La xi̱kaha ti Ncha̱kuén Díos la tjinki̱tsa ti jeheni kixin noehñani nkexrín tsonixje̱he̱ni Díos. A̱ndá ti Ncha̱kuén Díos tjinki̱tsa nixja̱xi̱n ti jeheni, kjónté tjachahyani jína tsonixje̱he̱ni Díos. 27Díos mé nohe nkehe tóhen a̱séni la ko nohe nkehe nixja ti Ncha̱kuén chꞌan, kixin ti Ncha̱kuén chꞌan chrónóa̱xi̱n éxi tjinkaon Díos, la nixja̱xi̱n chꞌan ti sin tinkáchónki Díos.
28Ó noheni kixin Díos la tsjinki̱tsa kixin kaín nkehe la chrókꞌuaxrje jína kixin ti sin tjue̱he chꞌan, kixin kꞌuéye̱he̱ chꞌan sin kixin xi̱kaha tjinkaon chꞌan. 29Ti sin tsíkjeyá Díos ósé la tsíkꞌeye̱he̱ chꞌan kixin tsꞌóna sin éxi ti Xje̱en chꞌan, kixin ti Xje̱en chꞌan mé tsꞌóna ti ixjan sa̱o kuènté ti íso sin kícho chꞌan. 30Mé xi̱kaha ti sin tsíkjeyá Díos ósé mé kja̱xin kꞌuéye̱he̱ chꞌan ti jehe sin, la ko ti sin kꞌuéye̱he̱ chꞌan, la kꞌóxika chꞌan ti iji̱é sin, la ti sin kóxika chꞌan iji̱é la kjuajon chꞌan ti kjuachaxin ijié kuènté chꞌan tsochónta sin.
31¿A̱ndá nkehe chróchroni? Ti tjue̱he Díos ti jeheni la, ¿xá nkexro chrókjuacha chrókónínkakohen ti jeheni? 32Kixin Díos la kjuikuénhña ti Xje̱en, kjuajon kꞌuenyákohe̱n chꞌan kaíni, a̱ndá ti ó kjuajon Díos ti Xje̱en, la kjá kaín ti íso nkehe la tsjajon chꞌan. 33¿A̱ndá nkexro chrókjuacha chrókjuanchia ijie̱, chrókónínkakohen ti jeheni? Kixin Díos mé kjueyá ti jeheni la ó kꞌóxika chꞌan ti iji̱éni. 34¿Nkexro chrókjuinchekjasóte ti jeheni? Kixin Cristo la ó kꞌuenyákohe̱n chꞌan ti jeheni la ko kja̱xin xechón chꞌan la itjen chꞌan ti itja chjina kuènté Díos itjen nkaya nka̱jní la tjenixjayákohe̱n chꞌan ti jeheni. 35¿Xá nkexro chrókjuacha chrókuakitsjehe ti jeheni ti tjue̱heni Cristo? Kjónté chrókjuasóteni o̱ chrókónínkaon chojni o̱ kjónté chrókꞌuenxíni kjinta o̱ chróchóntahyani ikéni o̱ siín kjuaxikaon chrókꞌuenxíni la mé chrókjuachahya tíha. 36#Sal. 44:22.*Éxi ndáchro ti xroon itén Díos:
Ti tinkáchónkini ti jaha la siín kjuaxikaon kaín ña̱o chrókꞌuenxíni.
Chrokꞌóñá sin ti jeheni éxi tꞌóñá sin kolélo.
37Kaín tíha la a̱ntsí chrókjua̱cha̱xi̱ni kixin kjuachaxíen ti nkexro tjue̱he ti jeheni. 38Méxra̱ ó noheni kixin ninkehó nkehe tsjachahya tsakítsjeheni ti tjue̱he Díos ti jeheni. Kjónté ti itsꞌeni, o̱ kjónté ti tjejóchóni, o̱ kjónté ti sin ángel, o̱ ti kjuachaxíen ti jínahña, o̱ kjónté ti nkehe sítóhen ijie, o̱ ti nkehe tso̱hen chrꞌéxi̱n, 39o̱ ti nkehe siín nka̱jní, o̱ kaín ti nkehe siín chrínkí nonte, o̱ íjnko nkehe kjuíchꞌéna Díos. Kohya ninkehó nkehe tsjacha tsakítsjeheni ti tjue̱he Díos ti jeheni kixin kjua̱ko̱xi̱n chꞌan kixin Ìnchéni Jesucristo mé kꞌuenyákonhe̱n ti jeheni.
Iliyochaguliwa sasa
Romanos 8: poeNTplus
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2016, Wycliffe Bible Translators, Inc. All rights reserved.
