Romanos 7
7
Kjuíncheyóe̱xin Pablo ti tóte̱he chojni
1Kíchóni, jahara ó choxínra ti ley la ó nohara kixin ti ley la jehó chónta kjuachaxin tsꞌe̱tue̱hen ti chojni na̱xa̱ tjejóchón. 2Éxi ijnko chojnichjin tsíkóte̱he la ti xìi tjan la chónta kjuachaxin tsꞌe̱to̱an ti na̱xa̱ tjechón chꞌan. A̱ndá ti ó itsꞌen chꞌan, la ti tjachjin la í tsítuenhña tjan. 3Méxra̱ ti chrókuákja tjan íjnko chojnindoa ti na̱xa̱ tjechón ti xìi tjan la tjasin tjan ijie̱. A̱ndá ti ó tsíkꞌen ti xìi tjan, la í kohya ley tsjanchia ijie la jína tso̱te̱he tjan íjnko chojnindoa, la jehya ijie̱ tíha.
4Mé xi̱kaha jahara kíchóni, Cristo kꞌuényáko̱hanra ndá jahara la éxi tsíkꞌenra kixin ó kꞌónara ti cuerpo kuènté Cristo, la í tꞌe̱tua̱nhñara ti ley. Landá ijie jahara mé kuènté Cristo, ti nkexro ikꞌuén la ko xechón ínaá. Mé xi̱kaha jína chrókjuichꞌeheni ixra̱ Díos. 5Ti na̱xa̱ kꞌuékjasini ijie̱, ndá ti kuíhini ti nkehe ndáchro ti ley la a̱ntsí kjuasixíni ijie̱ ti cuerpo kuènténi, la tíha kjui̱xi̱n ti tsꞌenxíni. 6A̱ndá ijie la éxi ikꞌuéni, la ti ley la chóntahya kjuachaxin na̱xa̱ tsꞌe̱tue̱hen ti jeheni. Ijie la í kohya nkehe tꞌinkákonhe̱n kixin jína sichꞌeheni ixra̱ Díos kixin kꞌónani ijnko chojni ni̱xin kixin ti Ncha̱kuén Díos kꞌuáyéhe̱ni. A̱ndá í tꞌe̱tua̱nhña ti ley tsíkjin sin ósé.
Ti ijie̱ chóntani
7 #
Ex. 20:17; Dt. 5:21. *A̱ndá, ¿nkehe chróndáchroni? ¿Á chróndáchroni kixin ti ley la ijie̱ ní? Kja̱ náhí. Kixin chrókónoehñani nkehe ti ijie̱ ti chrókókohya ti ley chróchronka. Chrókónoehñani kixin chrókjuakꞌehya a̱séni ti nkehe kuènté íjnko chojni ti chróchronkahya ti ley kixin “Chrokjuakꞌehyani a̱séni ti nkehe kuènté íjnko chojni.” 8A̱ndá ti ó kónoheni ti ley, la ti ijie̱ la a̱ntsí kjuacha kꞌue̱tue̱hen ti jeheni la a̱ntsí tjinkaoni sichꞌeni kaín ti nkehe nduáhya ndáchro a̱séni. A̱ndá ti chrókókohya ti ley la chrókónoxínhña ti ijie̱, la ti ijie̱ la chróchóntahya kjuachaxin.
9Ti ósé la kꞌuénoehñani nkehe ti ley tsíkꞌe̱to̱an Díos. A̱ndá ti ó kónoheni nkehe ti ley, la a̱ntsí kjuasini ijie̱, la ti ijie̱ kjuasini mé chrókꞌuenxíni. 10Mé xi̱kaha ti ley chrókjuajon ti kjuachón mé kjui̱ka̱o ti kjuachꞌén. 11#Gn. 3:13.*A̱ndá ti ijie̱ mé kjuacha kꞌue̱to̱an kixin sinchexiteyáhyani ti ley. A̱ndá ti ley mé kjuanchia ijie̱ tsꞌenxíni.
12Méxra̱ ti ley la chaxín jína, la ko ti nkehe tꞌe̱to̱an Díos la kja̱xin jína la ko tjóá. 13Méxra̱ ti nkehe jína la, ¿á táha chrókꞌuenxíni ní? Kjá náhí. Ti ijie̱ kjuasini mé tsꞌenxíni, mé xi̱kaha kjua̱ko̱xi̱n kixin chaxín ijie̱ tíha. Méxra̱ kónoxín ti ijie̱ kixin jína ti ley. Mé xi̱kaha kjua̱ko̱xi̱n ti ley kixin ti ijie̱ tjasin chojni mé nkehe jínahña.
14Ó noheni kixin ti ley la kuènté Díos tíha. A̱ndá jeheni la kjuínchexiteyáni ti nkehe ndáchro a̱séni kixin ti ijie̱ la kjuacha kꞌue̱tue̱hen ti jeheni. 15#Gá. 5:17.*Méxra̱ tienxínhñani kixin ti nkehe jína tjinkaoni sichꞌeni la chꞌehyani, a̱ndá ti nkehe tóxrìenhñani sichꞌeni la táha ti sa̱o ichꞌeni.
16A̱ndá ti ichꞌeni ti nkehe tjinkakonhñani chrókjuíchꞌeni la mé xi̱kaha tjatso̱anxíni kixin ti ley la jína. 17A̱ndá jehya jeheni ichꞌeni ti nkehe jínahña. Náhí. Ti ijie̱ chóntani mé ichꞌe tíha. 18Kixin jeheni ó noheni kixin ti nkehe ndáchro a̱séni sichꞌeni la kohya nkehe jína. Méxra̱ tjinkaoni chrókjuínchexiteyáni ti nkehe jína, kjánchó tjachahyani sinchexiteyáni. 19Kixin chꞌehyani ti nkehe jína tjinkaoni la ti nkehe jínahña tjinkakonhñani chrókjuíchꞌeni, mé tíha ichꞌeni. 20A̱ndá ti ichꞌeni ti nkehe jínahña tjinkakonhñani chrókjuíchꞌeni, la jehya jeheni ichꞌeni tíha. Náhí. Ti ijie̱ chónta a̱séni mé ichꞌe tíha.
21Mé xi̱kaha ti tjinkaoni chrókjuíchꞌeni ti nkehe jína, mé kónoheni kixin a̱ntsí ichꞌeni ti nkehe jínahña. 22La kjónté xi̱kaha la tóxríhi̱ni chrókjuínchexiteyáni ti ley kuènté Díos. 23Kjánchó tꞌikoni kixin ti nkehe ndáchro a̱séni mé tꞌinkákonhe̱n ti nkehe tjinkaoni chrókjuínchexiteyáni. Mé xi̱kaha ti ijie̱ chóntani mé éxi tjechjínaxíni.
24Nóani. ¿Xá nkexro chrókjua̱tse̱n ti ijie̱ chónta ti cuerpo kuènténi, chrókꞌuenxíni? 25Kjuasáye Díos kixin ikui Ìnchéni Jesucristo kuaáxini chꞌan. Mé xi̱kaha ti a̱séni la noheni kixin tjinkaoni chrókjuinchexiteyéheni Díos, kjánchó ti cuerpo kuènténi la ndáchro kixin chrókjuinchexiteyéheni ti ijie̱.
Iliyochaguliwa sasa
Romanos 7: poeNTplus
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2016, Wycliffe Bible Translators, Inc. All rights reserved.
