Roma 1
1
1Bwok-rwang gwomo yi e vwɔ hom Bulus, sam Kristi Yɛsu. Dagwi a yila me na me sè tom Yɛsu, ko a to tik me jaram, yaga na me shara Yɛgɛt Yat mɛ.
2A sé e Yɛgɛt Yat o de Dagwi à kana sira e ra yɛ̄ yi na bezarap mɛ, sede remo de bà jɛk e Bwok-basa mɛ. 3Yɛgɛt Yat o ya sé e ra Hwey mɛ, Darwey mot Yɛsu Kristi: E rà rehâ sángâl hɛ e ji rebek — há sè yi e yére Davit. 4Ko e rà rehâ gabîk hɛ de ha sé jɛrɛ — ha sé Hwey Dagwi. Dagwi a dura ano na gbɔng reto yi na sene hɛ yi e reku. 5Ko a sé yi na Kristi de Dagwi, yi na nerat mɛ, a nɔng me nɔrɔ hemo, ma sé tom Yɛsu, na me nɔ̂ng reza mɛ nerey. A ra ano, yaga na me bin tɛ̀ bemat yi e mwa yére bemât jey yɛn a sey tsak o, na yɛn a to gyeng hâ Dagwi arɔng. 6Ko yin arɔng yin a sé e ji vane de Dagwi a yila hɛn na yɛn a sè vê Yɛsu Kristi. 7Bwok-rwang o gwa sé vey na yin mwa e Roma, yin de Dagwi a tɛ̀ yey mɛ na yin, ko a to yila hin na yin a sè bemat mɛ:
Tik na Dagwi Da mot tanga Darwey Yɛsu Kristi be dura a yin nerat mɛn, na be tɛ̀ yey min ye dyɛng.
Bulus e simo na a wɔ̀ di ɛn e Roma
8E mɛsɛng o, ma feng a Dagwi hom yi na Yɛsu Kristi yaga yin mwa. Ma feng, yaga ba sé kyě ha rehâ sêy tsak o min e jêy mwa. 9Dagwi a sé mwât nuha hom. Yɛ womo de me ra a yɛ fwôm sharâ Yɛgɛt Yat e ra Hwey mɛ na yey hom mwa, yɛ a tɔk, me bare na yin 10kayɛ jeng de me ra won. Me lolo, yaga na Dagwi a simo na gwong gwo wunta hɛ, yaga na, e yɛnɛ mo, me kyɛm me vey na yin e jeng yemo. 11Me wok cwey di in, yaga na me nɔt in nerat nehak de Gabik Dagwi he nɔngɔs, yaga na neyey min ne tɛ́ ɛn gak. 12Me simo me di in, yaga na me tanga yin wot a rɔda gwɛ̌ a bemot gap: Yin, yaga yin a tɔk gwong de ma sey tsak o na Kristi, ko me, yaga ma tɔk gwong de yin a sey tsak o na yɛ arɔng.
13À begwa, me simo na yin a tɔk, zang pyak ma ga yong ɛ̀ na me vey na yin, ko pere vey e jeng yemo, ba ga dul me nà vey o. Me simo na me tɛ̀ behak e hane na yin be raa Kristi, sede remo de ma ga ra e ji bemât yére dyuk cak arɔng. 14Ba tɛ̀ me na me ra fwom e ji bemat de be jut bato mɛn yɛn a sé berey o tanga vemo de yɛn e jut ɛn ba sé berey o wɛt, e ji vemo de ba vɔk tɔ́k tanga vemo de ba vɔk tɔ́k wɛt. 15Pyɛ ma yane de ya tɛ̀, ma vɔk cwey sharâ Yɛgɛt Yat vey na yin de yin a sé e gbɔng repomô Roma arɔng.
Retô Yɛgɛt Yat
16Ma vɔk rekyên Yɛgɛt Yat wɛt, yaga retô Dagwi ra sé ra fwom yi na yɛ̄, na a sey nekên kawɛ mwat de a sey tsak o na yɛ̀. A tānga sey nekên BeYuda e ngyen, ko e bama mo nè vemo de ba sé BeYuda wɛt. 17Yɛgɛt Yat o ye dura wɛshɛrɛk gwong de Dagwi e tɛ̀sɛ bemat be sè cik e bayis mɛ. Gwong o, yi e susu mo vɔk e yɛnɛ mo, gwa sé ngan: Bemat bē sey tsak o na Dagwi. A sé sede remo de bà jɛk e Bwok-basa Dagwi wɔgɔ, “Mwat de Dagwi a tɛ̀ a sè cik e bayis mɛ, yaga a sey tsak o na yɛ, a rɔda vɔk neken.”
Shôm Dagwi vey na bemasi
18Dagwi a sé dura shom mɛ wɛshɛrɛk yi e lagwi. Shom mɛ mo ye hwo e ra mwa vemo de be kyɛ́ ɛn Dagwi tanga e ra vemo de be ragas neves detidetu. Yi na negwɔn neves mɛn o yɛn e dulus bemat yi e tɔ̂k tsak o. 19Yɛ a sé dura shom mɛ, yaga kayɛ pyɛ de bemat be kyɛm be tɔk yɛ e ra Dagwi ya sé a yɛn tɛɛrɛ. Dagwi pyɛ mɛ a ga tɛ̀ pyɛ́ mo tɛɛrɛ e bayis mɛn. 20Yimo yi e jeng de Dagwi à yong jey, pyɛ́ de à yong ye dura a wot wɛshɛrɛk yerê mwat de Dagwi a sé, mwa ano de wot a tɔk di ɛ na bayis mot wɛt. Ye dura, reto mɛ ra vɔk yɛnɛ wɛt, ko yɛ a sé Dagwi mwin. Yaga ano, bemat o ba tɔk ra cuna e ra pyɛ cak wɛt. 21Mwa ano de yɛn a tɔk Dagwi, ko yɛn a nɔng ɛ nerey sede Dagwi wɛt, yɛn a to feng a yɛ arɔng wɛt. Ko báre mɛn ha tɛ́ ɛ yapyi zɔng, ko neyey mɛn de na tɔk bare pyɛ cak wɛt na tɛ́ ɛn mwangalang. 22Mwa ano de yɛn a tē, yɛn a vɔk netsitsɛng, ko yɛn a tɛ́ ɛn betɔn. 23Yɛn a kyɛ́ ɛn nà ré a Dagwi de e ku wɛt fongol, ko yɛn a re a cī fongol e negya, yēmo de ba yong sede bemat de be kushu, kɛ sede benon, kɛ ngyāma, kɛ pyɛ̂ gabaga.
24Yaga ano, Dagwi a tik ɛn e de ragâs cwey pyɛ́ vyes de ye tɛ̀ ɛn ligis, yēmo de neyey mɛn ne simo. Ko yɛn a ragas pyɛ̂ rekyen na bemɛn. 25Yɛn a sege tsak o e ra Dagwi na bɔs. Yɛn a re a pyɛ́ de ba yong fongol, na be to ra a yɛ̄ fwom, ko ba tik nà re a mwat de a yong yɛ̄ fongol. E yɛ̀ de a vey na be somo hɛ gbak-gbak! Ano.
26Yaga pyɛ́ de yɛn a ra mo, Dagwi a tik ɛn e de vɔkɔs cwey pyɛ́ vyes de ya tɛ̀ ɛn na yɛn a ragas pyɛ̂ rekyen. Beha arɔng ba ga vɔ be kyɛ́ ɛn nà dyɛngɛs na beras e gwong de gwa sé tyɛng, ko ba dal na simo be dyɛngɛs na bemɛn. 27Ano arɔng, beras ba kyɛ́ ɛn nà dyɛngɛs na beha e gwong de gwa sé tyɛng, ko ba vɔk gbɔng cwey dyɛngɛs na bemɛn. Beras ba ragas pyɛ́ de ya sé byɛm-byɛm na bemɛn. Yi ano, ba hwɔtɔ a bato mɛn tabak de ha jam yaga buru mɛn.
28Sede remo de yɛn a kyɛ́ ɛn nà vɔk tɔ̂k Dagwi e neyey mɛn, ko Dagwi a tik ɛn na yɛn a bare yapyi zɔng, yaga na yɛn a ra pyɛ́ de ya sé naka be ra yɛ̄ wɛt. 29Neyey mɛn na sila na kayɛ pyɛ de ya sé cik wɛt, na neves, na gananâng pyɛ́, tanga nengyas. Yɛn e kyɛ́ ɛn nà simo mwat hwak a sɛ̀ pyɛ cak, ko be mɔbɔs bemat; be ragas yol, be kwɛlsɛng bemat, ko be ragas netsitsɛng neves arɔng. Yɛn e ryɔgɔt bemat, 30ko be to ha há ves e ra bemat. Be bɛrɛng Dagwi fus, ko be byɛs bemat; be toros bato mɛn, ko be dak ragey arɔng. Yɛn e vey na begwong bepas na be ra neves, ko yɛn e gyeng hâ beda na beneng mɛn wɛt. 31Yɛn e tɔk bare pyɛ cak wɛt, ko yɛn e gyeng há de yɛn a ga kana ha wɛt. Yɛn e dura tɛ̂ yey wɛt, ko yɛn e wok nemwishish mwat hwak arɔng wɛt. 32Bemat o yɛn a tɔk redu Dagwi wɔgɔ, mwa bemat de be ra pyɛ́ yemo ba sé jāma a bato mɛn reku. Ko mwa ano, yɛn e re nuyel na ragâs yɛ̄, yɛn e to ra pyɛ de ya dal negwɔn nane mo na neves wɔgɔ, yɛn e simo a behak be ragas yɛ̄ arɔng.
Iliyochaguliwa sasa
Roma 1: bomBI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
