Roma 2
2
1Ano kwong, à hwo mwat de hwó yɛt a bemín shɔt, hwà rɔda tɔk ra cuna e ra pyɛ cak wɛt. Jeng de hwó ra a bemín shɔt, hwà sé gang tó mo na shɔt arɔng, yaga hwo de hwó yɛt shɔt o hwó ra pyɛ́ yane mo arɔng. 2Wot a tɔk, shɔt Dagwi e ra vemo de be ra pyɛ́ yerê yemo ya sé tyɛng. 3Ko hwo, hwó yɛt a yɛn shɔt, mwa ano de hwó ra pyɛ́ yerê yane mo arɔng. A sé a hwo, hwà rɔda hywit o shɔt Dagwi arɛt? 4Kɛ rɔ̌ hwô byɛnɛng nepyak nerat mɛ na gbɔng niri mɛ arɛt? Hwà tɔk wɛt a? Dagwi a vɔk nerat, yaga yɛ e simo nɔng o gwong, na hwo doyo yi e banɛn mō. 5Ko yey mō ya sé gbarak, ko hwó to simo hwo doyo yi e banɛn mō wɛt. Yi e negwɔn mō mo, hwà sé tula gbɔng tabak e ra to mo vɔk e jeng de Dagwi a rɔda ba dura shom mɛ. Jeng a yane de Dagwi a rɔda ba dura wɛshɛrɛk shom mɛ de ya sé cik. 6Dagwi a rɔda ba tala kawɛ mwat tyɛng na pyɛ de a ga kana ra. 7Mwa vemo de be re nuyel e de ragâs pyɛ́ ryat, vemo de be jāma na Dagwi a nɔng ɛn gbɔng nerat, na nerey, tanga neken de ne tala hɛ wɛt, Dagwi a rɔda nɔng ɛn neken gbak-gbak. 8Ko mwa vemo de be simo bato mɛn zɔng, vemo de ba kyɛ́ ɛn tsak há na yɛn a raa neves, Dagwi a rɔda tɛ̀ gbɔng shom mɛ e ra yɛn. 9Mwa vemo de be ragas neves ba rɔda di reyɔm na rezot. Pyɛ́ yemo ya rɔda tānga hwo e ra BeYuda e mɛsɛng o ko e ra bemât yére dyuk arɔng. 10Ko mwa vemo de be ragas pyɛ́ de ya sé ryat ba rɔda sɛ̀ gbɔng nerat, na nerey, na yêy dyɛngɛ arɔng. Pyɛ́ yemo ya rɔda tānga hwo e ra BeYuda e mɛsɛng o ko e ra yére dyuk arɔng. 11Yaga Dagwi e dura kasâ bemat wɛt.
12Mwa bemat de be ra banɛn sana tɔk Badu de Dagwi à kana nɔ̂ng Mose yɛn a rɔda wey, mwa ano de yɛn a tɔk Badu mo wɛt. Ko mwa vemo de be ra banɛn ná tɔ̂k Badu, ba rɔda ba ra a yɛn shɔt na Badu mo arɔng. 13Yaga a sé e vemo de be wok Badu zɔng wɛt de ba sé cik e bayîs Dagwi. Ko a sé e vemo de be gyenges Badu, de Dagwi a rɔda ba dura, yɛn a sé cik e bayis mɛ. 14Bemât yére dyuk ba vɔk Badu mo wɛt. Ko kayɛ jeng de be raa Badu mo, be raa vɛ yi na pyɛ de yɛn a di e yey mɛn zɔng, ko e jeng o, yɛn e dura, yɛn a tɔk pyɛ de ya jam na mwat a ra. Ko yɛn e dura ano, mwa ano de yɛn a vɔk Badu Dagwi wɛt. 15Negwɔn mɛn ne dura, ba ga jɛk pyɛ́ de Badu mo be simo e neyey mɛn. Barê yey mɛn arɔng he nɔng nuha e ra pyɛ mo arɔng. Ko báre mɛn he tang ɛn e jeng cak wɔgɔ, yɛn a ra tyɛng wɛt, ko e jeng cak he tang ɛn, yɛn a ra tyɛng. 16Pyɛ́ ma yemo de ba rɔda ba di e jeng de Dagwi a rɔda ba ra a barê neyaang de ha sé e neyey bemat shɔt; ko a rɔda ba ra shɔt o yi na Yɛsu Kristi. Yɛgɛt Yat de ma sé shara yɛ̄ ya dura, pyɛ́ mo ya rɔda sè tyɛng ano.
BeYuda be gyeng Badu Dagwi wɛt
17Ko di hwo, hwó tâng tó mo, à WoYuda, ko hwà tɛ̀ gap mō e ra Badu Dagwi. Hwó to dak kaa wɔgɔ, nesa na sé e tē mō na Dagwi. 18Hwà tɔk pyɛ́ de Dagwi e simo, ko hwà tɔk pyɛ́ de ya dal na nerat, yaga a sé yi na Badu mɛ mo de ba basa a hwo pyɛ́ yemo. 19Hwó ye sana tô yey wɔgɔ, e hwo wɛ de hwó hwɔlɔ a bebók gwele, ko hwó to dura á vemo de ba sé e ji lwīl negbey. 20Hwó masa a betɔn, ko hwó to basa a nèy arɔng, yaga Badu mo ba ga nɔng o tɔ̂k mwa, na be to dura a hwo tsak hâ mwa. 21Ko hwo kwong, hwó basa a bemat behak, ko yaga sɛ́ de hwó basa a tó mo wɛt arɛt? Hwo de hwó shara há wɔgɔ, be shigi wɛt, yaga sɛ́ de hwó shigi arɛt? 22Hwo de hwó tē, bemat be ra nejwang wɛt, yaga sɛ́ de hwó ra nejwang arɛt? Hwo de hwó kyɛ́ o cī sizɔng, yaga sɛ́ de hwó kyese wɔ̀ shigshi e kwɔn de be tikis ɛ̀ yɛ̄ arɛt? 23Hwó dak kaa yaga hwà tɔk Badu Dagwi, ko hwó gyili Badu mo; yi ano, hwó tɛ̀ be tik nà nɔ̂ng Dagwi nerey, 24sede remo de bà jɛk e Bwok-basa Dagwi wɔgɔ, “E yin BeYuda de yin e tɛ̀ bemât yére dyuk be ha há ves e ra Dagwi.”
25Wɔ́ e cwɛl ha vɔk sɛlɛ, ka sede hwó gyenges Badu Dagwi. Ko ka sede hwó gyilsit Badu mo, ko hwà ga tɛ́ o sede ba ga wɔ́ a hwo e cwɛl wɛt. 26Ka sede womo de ba ga yosom hɛ wɛt e gyenges pyɛ́ de Badu mo be simo, ko Dagwi a rɔda di ɛ sede ba ga yosom hɛ. 27Mwat de e gyenges Badu mo, mwa ano de ba ga yosom hɛ e rebek mɛ wɛt, yɛ a rɔda gang o, hwo WoYuda, na shɔt. A rɔda ra ano, yaga hwó gyili Badu, mwa ano de hwà vɔk Badu mo de bà jɛk vɛ, ko ba ga to yosom hwo arɔng. 28Yaga a sé e bwang bayis mɛ wɛt de gwo tɛ̀ mwat a sè WoYuda wo mwin. Yosom hê mwin arɔng ha sé pyɛ de be di kɛ pyɛ de be ra a mwat e rebek mɛ zɔng wɛt. 29Wey, mwat de a sé WoYuda e yey mɛ, e yɛ wɛ de a sé WoYuda mwin; ko yosom hê mwin ha sé hemo de be ra e yêy mwat. A sé e Gabik Dagwi de he tɛ̀ mwat a sè WoYuda e yey mɛ, ko a sé e neha Badu de ba jɛk zɔng de ne tɛ̀ ano wɛt. Yerê mwat wane e sey nerey mɛ yi na mwat wɛt ko yi na Dagwi e negya.
Iliyochaguliwa sasa
Roma 2: bomBI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
